Ploiis mai regjistradis inte storie, chês coladis su Cormons e Vierse

No cate che l’Autun meteorologjic si fasi tacâ cul prin di Setembar, il Setembar dal 2025 al è stât in sostance un mês estîf pal Friûl, cun temperaduris mediis inte planure sui 19/20°C, di 0.5°C plui cjaldis rispiet ae medie dai ultins dîs agns, di 1°C plui altis dal trenteni 1991-2020. Cjapant simpri i ultins dîs agns a riferiment, la prime decade e je stade in medie, la seconde 1°C plui cjalde e la tierce 0.5°C plui cjalde. La temperadure medie dal mâr a Triest e je stade simpri intal novantesim percentîl plui alt, fale il prin dal mês. Si son viodûts burlaçs inte gnot jenfri il prin e i 2 par vie di une depression atlantiche, cun ploie fuarte su la Pedemontane a Pognet (65 mm/h a Clausêt) e di buinore su la Marine (72 mm/h) a Fossalon, altris burlaçs intes stessis zonis intal dopodimisdì e ancjemò su la Marine di sere. Dut câs, lis perturbazions plui intensis si son vudis jenfri i 10 e i 16. Ai 10 une depression mediteranie e puarte ploione su la Marine (200mm a Lignan e 250 e Bibion), plui debile su la planure e su la Cjargne ocidentâl. Daspò di cualchi dì plui variabile, ai 16 di Setembar une depression su la Europe Centrâl e rive fin sul Friûl in cuote, puartant l’indiç CAPE (Convective Available Potential Energy, o ben Energjie Potenziâl Convetive Disponibile) a 1630 J/kg aes dôs dopodimisdì (un indiç jenfri 0 e 1000 al è sfavorevul pai burlaçs, 1000-1500 al vûl dî burlaçs isolâts, 1500-2000 burlaçs probabii e plui grant di 2000 burlaçs fuarts e forsit bissebovis), riclamant aiar umit meridionâl intai strâts bas. Si à vût prin un burlaç jenfri Glemone e il Cjanâl dal Nadison, daspò jenfri Forgjarie e il Cjars, che si è disvilupât in supercele e al à puartât tampieste fin 3-4 cm di diametri. Ultins burlaçs, mancul fuarts, jenfri i 22 e i 27. Pal rest dal mês, bon timp di stamp anticiclonic e cjalt.
◆ Il mês di Otubar invezit al è stât autunâl, cuntune temperadure medie di mieç grât plui frescje rispiet al 1991-2020, cuntune fase une vore plui frede sul principi dal mês (3°C sot medie). I dîs di ploie a son stâts dai 5 ai 11 (di plui a Jevât), ancje lôr in medie, ma dai 6 ai 19 di Otubar nol à plot piç (fale cualchi gote ai 9), un interval di timp une vore lunc! Lis ploiis a son stadis fuartis dome inte fasse orientâl, cui tipics passe 400mm vignûts jù a Musi (un dai puescj li che al plûf di plui in Europe). Fronts atlantics a àn puartât ploie ai 5, ai 21-22 e ai 24 di Otubar, compagnâts di aiars fuarts (buere tal prin câs, siroc inta chei altris, e tal ultin câs cun tampieste a Triest) e nêf in mont (in gjenar adalt, ma ai 5 di Otubar, sbassade fin ai mil metris). Sul mudâ dal mês, lis temperaduris si son alçadis e aiar di garbin al à menade ploie.
◆ La prime part dal mês di Novembar e à viodudis temperaduris in linie cui ultins trente agns e bon timp dai 3 dal mês fin ai 15, cuant che une depression iberiche e à inviât il passaç prin di un front cjalt e, daspò, di un front frêt. Chest front frêt al à dade origjin a une des situazions plui dramatichis dai ultins agns in Friûl. Di fat, si è cumbinât cu la orografie des Prealps, cuntune temperadure dal mâr cjalde, plui di 1°C parsore de medie dai ultins 30 agns dai 6 ai 17 di Novembar, e une particolâr direzion dai vints dominants in direzion Ovest-Est. Il garbin, jevât sù des Prealps, al à riclamât aiar meridionâl, sglonf di umiditât par vie dal mâr cjalt, e ancje chest si è cjatât a vignî alçât sù des Prealps a Jevât de planure. Si è formade une linie di convergjence: une fasse ferme intal spazi dulà che l’aiar al è lât indenant a alçâsi e a fâ sù un nûl di burlaç par dute la gnot jenfri i 16 e i 17, produsint ploiis estremis: plui di 250 mm in 12 oris a Cormons, un event mai regjistrât prin! Il Judri al à stramontât sot di Cjopris e al fat finî sot aghe Vierse, che e à vût di jessi evacuade. Une colade di Pantan a Breçan e à tirât jù trê cjasis de Cente, copant dôs personis.
◆ Un altri front frêt plui setentrionâl al à puartade ancjemò ploie inte sere dai 17. Passât chest front, lis temperaduris si son sbassadis e si son viodudis lis primis criùris inte planure. L’aiar frêt jentrât di Miezegnot si sburtarà fin dentri dal Mediterani, inviant une depression sul golf dal Leon che e puartarà nêf fin a 500 metris ai 20 e 21 dal mês. Corints setentrionâls a mantignaran lis temperaduris bassis, ma cun biel timp, par cualchi zornade, fin ai 26-28 di Novembar che il stes scheme de depression frede sul golf dal Leon al varès di ripetisi e lassâ puest, ae fin dal mês, al Anticiclon des Azoris. ❚