Ors in Slovenie, cjavris in Istrie: cuâl avignî?

Di une bande si à chê di tignî il lôr numar controlât, di chê altre bande si vûl prudelâlis par vie che a riscjin la estinzion. E je la situazion (dal dut contrarie) di chestis dôs bestiis, la prime in Slovenie e la seconde in Cravuazie.
◆ Tachìn dal Paîs nestri vicin. La convivence cui ors in Slovenie al è un fat storic; jessint une tiere siore di boscs, i ors a àn culà il lôr ambient ideâl par passisi, cressi, vê une famee. I fastidis però a vegnin dal rapuart cui umans, che planc a planc a slargjin il lôr teritori di residence. In cheste maniere, al è facil vê a ce fâ cui ors, che a son almancul 700 in dut il Paîs. Jessint la cressite de lôr popolazion stabile, il Guvier di Lubiane al à decidût di dâ il permès di fâ fûr 206 esemplârs dentri dal 2026. Daurman a son saltadis fûr lis vôs dai animaliscj, disint che al è un maçalizi che al fasarès dam soredut ai ors plui piçui, che a riscjin di pierdi lis lôr maris. Tant che bote e rispueste, un studi fat di ricercjadôrs de facoltât di Biotecnologjiis de Universitât di Lubiane al dîs che, se nol sarà fat in curt nissun intervent, al principi dal 2027 in Slovenie i ors a saran almancul 1.100: za in dì di vuê la lôr densitât e je 30 voltis plui alte di chê de Scandinavie in rapuart ae superficie totâl. Magari cussì no, ogni tant i incuintris tra oms e ors no van a finî ben, e tai fats di croniche si scuen regjistrâ la muart di un uman che ai ors no ur è plasût…
◆ Te part cravuate de Istrie, invezit, la Regjon e la popolazion locâl si stan messedant par salvâ la cjavre istriane, raze autoctone, che se 150 agns indaûr e veve uns 20 mil esemplârs, tal 1942 14 mil, cumò e riscje la estinzion. Par chest, a nivel istituzionâl al è nassût il progjet “Naša istarska koza” (“La nestre cjavre istriane”), par stiçâ la adozion di un esemplâr (a distance). Cumò il numar des cjavris adotadis al è rivât a plui di 200; tra i ‘gjenitôrs’ a son fameis, aziendis, scuelutis, proprietaris di ristorants e parfin Comuns. Un an di adozion al coste 500€, il sostignidôr al pues invezit meti trop che al vûl pal progjet ma cence adotâ. Lis cjavris, arlevadis in Istrie di almancul doi mil agns, a son stadis impuartantonis pe economie locâl, tant che sul steme de Regjon e figure propit une cjavre.. ❚