Olme di carboni – Impronta di carbonio – Carbon footprint

Cetantis voltis che o vin sintût nomenâ la “olme di carboni” o ancje la “olme ecologjiche”.
E o podìn fâ fente di capî par no parê mâl, ma ce robe ise dabon?
Provìn daurman a figurâsi la olme di un pît plui o mancul 45 di scarpis, che al da miôr la idee, sul savalon bagnât: il segn dal passaç di une persone che no passe inosservade. Par disfortune, nol bastarà un scravaç par scancelâle. Par agnorums, si le varà denant dai voi cul risi ancje di inçopedâsi.
◆ Tornìn indaûr ai agns ‘90 dal secul passât, cuant che doi ricercjadôrs canadês, W. Rees e M. Wackernagel, cul fin di capî l’impat dal gjenar uman sui ecosistemis, i dan chel non a une gnove metodologjie.
In peraulis puaris, un calcul rût des risorsis naturâls fruiadis tal cercli complet di produzion e smaltiment dai refudums, tignint cont des cuantitâts di tiere e di aghe dopradis e des emissions diretis e indiretis dai gas sidrere, soredut anidride carboniche (CO2).
◆ I gas sidrere a son sostancis chimichis. Te atmosfere terestre a mantegnin regolâr il calôr e lis radiazions dal soreli. Se a mancjassin, la Tiere e sarès frede e inabitabile. Chei principâi a son: anidride carboniche (CO2), metan (CH4) e protossit di azot (N2O).
◆ La lôr emission e ven dai combustibii fossii (petroli, carbon, gas naturâl). Ju clamìn “fossii” parcè che a vegnin di ce che al reste di plantis e bestiis restadis sot tiere e sot i mars par milions di agns. Dopo brusâts, oltri a produsi energjie par fâ lâ indenant il nestri mont (industriis e traspuarts, par esempli), a liberin tal aiar ancje dute la anidride carboniche che a vevin imagazenât te lôr vite. Metìn dongje ancje i disboscaments, la agriculture, i arlevaments intensîfs e o podarìn capî buine part des causis dal suriscjaldament dal clime. Tant par capîsi: masse anidride carboniche e puarte al stes risultât di une cuvierte pesante che e scjalde la Tiere plui di chel che al covente.
◆ La incressite incontrolade di chescj gas e met in moviment un cercli viziôs: il calôr al reste inscjaipulât inte atmosfere e la evaporazion des aghis e cres cence control. Lis consecuencis lis viodìn tai fenomens climatics che a fasin pôre.
◆ Ma cence energjie no podìn lavorâ, movisi, fâ di mangjâ, vivi po. Une buine soluzion al probleme al è produsile cu lis fonts rinovabilis, cognossudis tant che naturâls parcè che a van indevant a formâsi e no intossein. A son lis aghis di flums, lâts e mâr, dal soreli, dal aiar, dal calôr gjeotermic de Tiere che tal cûr al rive fintremai a 6.000 grâts centigrats.
◆ In struc, il metodi de olme di carboni al fotografe i consums e i stîi di vite des personis, des comunitâts e di cemût che l’ambient al reagjìs.
Si pues fâ cont che par produsi une maiute cu lis maniis curtis, si stimin 4 toneladis di aghe e 4 metris cuadris di tiere. Par une steche di cjocolate, 1 tonelade e mieze e 2,5 metris cuadris.
◆ Duncje la olme nus sclarìs ce che al vûl dî lâ masse indenant a pet des disponibilitâts dal planet.
I studiôs a àn calcolât che in dì di vuê o stin fruiant aromai un planet e mieç e che, se no cambiarìn mût di fâ, tal 2050 nus coventaran doi.
Di bon, tignìn ad a ments che o podìn inmò lâ a cessecûl. Par capî dulà che o sin in fal, cemût mendâ e ancje informâsi, si scuen informâsi. Al va ben ancje internet, salacor cirint su Google “Calcul de olme ecologjiche”. Tic e tac si pues fâ une prove svelte dal impat che i nestris costums (alimentazion, mobilitât, stamp de cjase li che o sin a stâ, …) a àn sul ambient. Al somee un zûc, ma al pues jessi istrutîf plui di tantis peraulis!
◆ Cence lassâsi cjapâ dentri dal baticûr, tal so piçul ognidun di nô al pues fâ alc, cuant che e je la pussibilitât. Se no je, cirìnle! Provìn a cuistâ la mangjative vignude sù dongje di cjase e te stagjon juste; lassìn pierdi imbalaçs di plastiche e il “dopre e bute”; imparìn a comedâ e a butâ vie dome cuant che no si pues fâ di mancul; doprìn i mieçs publics e la biciclete; no stin a lassâ piade la lûs se no covente, …
◆ Fasint dut chest sigûr che no tornarìn ae miserie nere dai nestris basavons. O podarìn, dut câs, judâ fîs e nevôts a vivi miôr di ce che si prospete.” ❚