Intant che si stan davuelzint lis iniziativis par GO2025, dulà che Gurize e Nova Gorica a son la citât europeane de culture di chest an, e je rivade le buine gnove che Pordenon e à vinçût il concors pe citât taliane de culture pal 2027. Biei travuarts pes nestris dôs citâts, che a permetin di mostrâ a dut il mont lis bielecis dai doi teritoris e ancje lis ativitâts economichis, culturâls e sociâls di chestis comunitâts.
◆ Ma dulà sono logadis chestis dôs citâts? Dal sigûr a son in Italie e in Europe. Ma sono ancje in Friûl? O vuei dî: rapresentino vuê ancje la identitât furlane di chês tieris che ator di lôr a son cence dubi furlanis? Gurize ise ancjemò capitâl dal Friûl di soreli jevât, ven a stâi ancje di chê gjernazie di int che e vîf ancje a Lucinîs e a Dolegne, a Marian e a Cormons, cuntun caratar cussì ben incjarnât te icone di Bruno Pizzul che di pôc nus à lassâts?
◆ E Pordenon – centri industriâl cuntun tic di puce sot il nâs – che al vûl dâ la idee di modernitât urbane, ven a stâi di jessisi slontanade de ruralitât e sfrancjade di chês ativitâts agriculis che invezit a son ancjemò une vore fuartis tes tieris a man drete dal Tiliment, puedie rapresentâ Spilimberc e Manià, San Vît e Morsan o inmò plui dongje Cordenons, come capitâl dal Friûl di soreli a mont?
◆ Gurize e Pordenon sono in Friûl? Àno une identitât furlane o saressino compagnis se a fossin poiadis in Emilie o in Piemont, o pûr in Baviere o te banlieue di Parîs?
Al è sigûr che une fisionomie furlane plui o mancul volude o no cussiente e sedi, e alore parcè no mostrâle?
Parcè no fâ evidente la ricjece de diversitât culturâl e duncje ancje linguistiche di chescj teritoris? Scomençant de lenghe e de culture furlane, ma ancje di chê todescje e di chê slovene tai programs des ativitâts di GO2025 e – sperìn – di PN2027.
◆ Se vuê la Regjon Friûl – VJ e vûl jessi ancjemò speciâl, ven a stâi cuntun statût di autonomie, la motivazion e va cjatade propit e – forsit dome – te convivence pacjifiche di chestis minorancis linguistichis in chest toc di Europe di doman.
◆ O fevelìn di Gurize e di Pordenon… e Udin?
Ise la “metropoli” dal Friûl come che le pituravin une volte? E ce staie fasint par jessilu? Nus pâr che une volte di plui Udin nol vedi voie di rapresentà dut il Friûl, ni di un pont di viste economic, ni culturâl, ni linguistic, ni politic. E i risultâts si viodin: in Regjon il Friûl rispiet a Triest al conte pôc o nuie. La colpa di chi xela? De Florean? De Venturin? De Meni? O De Toni? ❚
Oh ce biel cjistiel a Udin…
Mastiefumate
