Ocjo a no screâ l’Orcolat FVJ, se no al ven jù un altri taramot

Triest, dongje place Oberdan, une matine.
“Oh, cui che si viôt! Si à di vignî a Triest par becâti?”
“Dovê di conseîr regjonâl, Toni. Vuê o vin une sentade dal Consei. E tu, cemût mai a Triest?”
“Une di chês cagneris che i tocjin a un sindic di paîs piçul. Il diretôr dal servizi regjonâl al à cjatade une peraule stuarte e si stravie cul fâmi pierdi timp tai coridôrs de regjon.”
“Puedio judâti, Toni? Tu sâs che o soi pratic di chei smaneçs.”
“Eh, Sandri… o sai che tu sês ben navigât a Triest, ancje masse! Ma o ai za cumbinât. E jere propit une fufigne di burocrazie, dome par rompi i coions. Jo o varès altri pal cjâf. “
“Bon, ma puedio ufrîti almancul un cafè?” “Va ben, Sandri, ma menimi tu dulà lâ in cheste citât foreste.”
“Anìn achì, che mi cognossin. Ce cjolistu?” “Par me un cafè sclet.” “Siora, per piazer, la me fa un nero e un capo in bi.” “Sandri, pal amôr di Diu, fevelistu ancje la lôr lenghe? Ti vin pardabon pierdût tant che furlan?!” “Ma ce dîstu, Toni? O soi furlan, sigûr! Ma o soi conseîr de Regjon Friûl Vignesie Julie. O rapresenti ducj, ancje i triestins.”
◆ “Fevelìnsi clâr, Sandri. Ti ai simpri sostignût ma tu âs di stâ atent di no lâ fûr de cjaradorie. Scomence cul fermâ la vôs jenfri Friûl e Vignesie Julie. No metês plui la liniute che e sclarive che o sin dôs tieris diferentis. E je une peste che e continuais a pandi pardut, par me dome par scancelâ di plante fûr il Friûl!” “Ma dai, Toni, chestis a son fufignis!” “Eh no. Sacrabolt! Al è un pieç che i tiei amîs a van ator a pandi che porcarie di Io sono FVG. Ma no dome. Juste îr o ai sintût tabaiâ dal taramot – che l’an cu ven a son 50 agns – clamantlu Terremoto del Friuli Venezia Giulia. Sono lâts fûr cu la gamele?! Cumò ancje il nestri orcolat isal deventât FVG?!”
“Ma dai, Toni, no stâ a stracapî. Cuant che al capite un inovâl impuartant – e 50 agns dal taramot e je une ocasion di gale, al è naturâl che tancj di lôr a voledin metii il cjapiel parsore.”
“Ma nol è vêr e nancje onest, Sandri, sacrabolt, contile juste! Anzit, za che o sin tal discors ti domandi juste a ti, che tu sês un sorestant, un che al conte in cheste Regjon malnassude, di dâti di fâ par che il cincuantesim dal taramot nol sedi la solite ocasion dulà che e ven fûr dome la nostalgjie, chei stereotips dal Fasìn di bessôi par sierâ cun ce tant brâfs che o sin stâts. Se e ves di vignî fûr cussì, il memoreament dal taramot al sarès dome retoriche sterpe e al passarès cence lassâ nissune olme buine pal dì di vuê e par l’avignî.”
“E tu, alore, ce proponistu?”
“O soi un aministradôr dispatussât dal taramot e cumò o soi sindic. Tal ’76 o jeri zovenut ma za conseîr comunâl dal gno Comun. Dal gno sindic vieli, che Diu lu vedi in glorie, o ai supât dut il bon di chê tragjedie. E o ai dut sculpît tal cjâf. O soi convint che chest inovâl al sedi la ocasion buine no par sierâ dentri dai confins de regjon il ricuart di chel event ma, invezit, par meti in mostre di ducj i talians chê esperience straordenarie che al è stât il Modello Friuli, ven a stâi chel model tecnic, aministratîf e politic che al à metût dongje la Regjon e i Comuns e che, in gracie de colaborazion jenfri sisteme politic e comunitâts di citadins, al à frontât une vore ben chel disastri trement.”
◆ “Vere, Toni. Ma alore ce fâ?”
“Fâ capî che pe prime volte inte storie de Republiche Taliane, simpri centraliste, al à funzionât un sisteme di cooperazion jenfri i diviers nivei des istituzions. Il Stât al à decentrât risorsis ae Regjon e cheste, ancje jê, e à delegât i Comuns. I sindics a son stâts la fonde, il cûr de ricostruzion, cun responsabilitâts frontadis adun cu lis comunitâts tal rispiet de volontât popolâr. Si à di fâ capî a chei che a son a Rome che al è lât dut ben in gracie propit di chel rapuart jenfri Stât, Regjon, Comuns e citadins. E no dome ben ma ancje cun timps avonde curts e tal rispiet de legalitât!”
◆ “Mi somee just pandi chel model ma no sai trop che lu scoltaran chei di Rome. Sêstu sigûr che al coventedi ancjemò in dì di vuê?”
“Al covente massime in dì di vuê metiur denant de muse che chel laboratori de ricostruzion, che al è stât l’unic che al à pardabon ricostruît dut, si ispirave al principi federalist. E che, dopo di 50 agns, chê esperience che e jere pioniere, e che e veve puartât un risultât bononon, cumò e je disfantade.”
◆ “Ma aromai la ricostruzion e je fate e finide. No covente plui.”
“No tu mi âs capît, Sandri. Pandi e valorizâ il Modello Friuli nol è dome par dî che o sin stâts brâfs ma par dimostrâ che che model positîf al è rimplaçât, te politiche di vuê, di un fastidi simpri plui fuart par dut ce che al fevele di autonomie, massime di chê speciâl come la nestre. E che chel model al veve come fonde il rispiet des competencis di ogni nivel de aministrazion, ven a stâi che ognidun al à di fâ il so, plui dongje pussibil dal citadin, intune peraule “sussidiarietât”. Invezit, chel che al va fuart cumò, al è il centralisim, il decidi dal alt, de capitâl, juste chel che in chei altris taramots talians nol à funzionât, al baste lâ a viodi.”
“Toni, o soi cun te. Tu mi âs dade une idee biele. Le puartarai tal gno grup politic. Si podarès proponi di inmaneâ a Rome, l’an cu ven, une biele cunvigne tal Parlament. Modello Friuli nel 50° del Terremoto e Modello dello Stato al podarès jessi il titul.”
◆ “E sarès une biele robe ma, marcomandi Sandri, al varà di jessi clâr che memoreâ nol covente par cjalâ indaûr ma par frontâ il vuê e progjetâ l’avignî. Si varà duncje di memoreâ il taramot come un moment tragjic ma ancje straordenari de storie de Republiche. Se o rivais a inmaneâ cheste cunvigne, al varà di vignî fûr cun fuarce parcè che il Modello Friuli al è stât un spieli de ricostruzion vignude fûr miôr di dutis in Italie. E il dibatit al scuen frontâ, se di no nol covente a nuie, la necessitât di un percors di decentrament aministratîf, di rispiet des autonomiis, di sussidiarietât e, magari, di federalisim. E ancje che il Modello Friuli al à permetût une grande partecipazion democratiche che e à fate la diference. Cumò mieze int no va nancje a votâ!”
“Toni, o scuen lâ – al taie curt Sandri – che e tache la sentade dal Consei Regjonâl. Graciis pe fevelade e pal stiç che tu mi âs dât. O viodarai cul gno partît e o fasarìn sigûr ben.”
“Al sarès bon e just, Sandri, rivâ a fâ soflâ chel spirt mitic dal taramot e tornâ a tirà fûr il rapuart di fiducie jenfri il Stât e lis istituzions locâls. Magari cussì no, o soi convint che no tu rivarâs! I tiei sorestants politics a san bielzà dut ce che o varessin di fâur capî. Ma no cambiarà nuie parcè che a lôr no ur interesse o, miôr, ur interesse dome lâ dilunc a tirâ i fîi di Rome…”
◆”Toni, ti promet…”
“No stâ prometi, Sandri. No soi nassût îr. Graciis dal cafè. Si tornarìn a viodi l’an cu ven. Se tu rivis a inmaneâ ce che o vin fevelât, ti paiarai tant vulintîr un tai di chel sincîr. Mandi.” ❚