MEDITANTLIS TAL SO CÛR. E cumò lait in ligrie

Il timp al cor e o cjalìn za al avôt dal popul furlan pe solenitât dai Ss. Ermacure e Furtunât. Ca di cualchi dì si cjatarìn a Aquilee. Il nestri pinsîr al va ai agns passâts e la domande e reste simpri la stesse: in chê Messe varìno di avilîsi o di ringraziâ, dome pensâ o ancje gjoldi insieme?
La rispueste e je clare: stin contents.
Al è vêr che la visite dal Pape Benedet XVI te nestre tiere come Furlans e come Patriarcjins nus à deludût: si spietave un Messâl roman par furlan o cualchi dirit ricognossût pe nestre glesie, ma nuie al è sucedût; e chest al va a lôr vergogne e a nestri credit: un lôr debit che al cres simpri di plui.
Ancje daprûf di chescj fats, bisugne domandâsi ce che al vûl dî in zornade di vuê: centri e periferie.
Nô, par Rome, o sin une periferie parcè che lôr a àn ancjemò la vecje e superade mentalitât dal monopoli dal mont, de ecelence de lôr teologjie, de sacralitât de lôr potestât. Ma chest tai agns doimil al puce tant di ditature.
Al diseve Blaise Pascal tes sôs grandis intuizions, che ogni pont dal mont intîr al è in contemporanee centri e periferie. Il centri nol è chel che plui al è potent e al domine; il centri dal mont e dal avignî a saran la persone umane e il propri popul. In chest sens, Gjerusalem te preiere dai Salms e jere il centri dal mont e in chest sens par nô il centri e je Aquilee e Rome la periferie.
E chest an si presentarìn a Aquilee cuntun fat che nissun fint a cualchi mês indaûr al varès imagjinât: il grant Event de leture continuade de Bibie par furlan, moment di glorie di dut il nestri popul. E si cjatarìn par ringraziâ i doi campions che la diocesi no rive mai a nomenâ ancje se si fâs biele de lôr lûs: Pre Checo Placerean e pre Antoni Beline. Che di fat, la Bibie voltade par furlan e je merit lôr.
Chest però al è ancjemò masse pôc. Tune societât li che lis radiazion a copin, i cudumars a menin la peste, la aghe e pues intosseâti e i nûi dal cîl distruziti, li che internet ti presente milions di stradis ma no tu sâs cuale che e je chê juste, mi somee che pre Checo e pre Antoni a àn semenât une semence buine: la promozion de culture popolâr, la origjinalitât des etniis, i dirits des minorancis, il rispiet de spiritualitât de int, une liberazion umane…. al è chest l’avignî nestri e dai popui, soredut dai piçui. O sin piçui, e je vere, ma dai grancj dal mont e de lôr sience il Signôr al dîs: “O fruçarai la sapience dai sapients e o ridusarai a nuie la inteligjence dai inteligjents”. (1 Cor 1,19)
Ringraziìn il Signôr, fasìn cressi la semence butade, lavorìn pal mont che al à di vignî, restìn alternatîfs a cheste vecje Europe che e cole, a une catoliche Italie che e fâs dûl, a cheste societât che e je simpri plui deludude e strache.
L’arbul di Aquilee al cressarà; partecipìn al avôt dai Ss. Ermacure e Furtunât ricuardant l’invît dal Benedît di Pasche: “E cumò lait in ligrie; che e sedi armonie fra di voaltris. Mangjait di fieste grande e dant ancje a di cui che no ‘nd à. E no stait a avilîsi, parcè che vuê la vuestre fuarce e je tal Signôr”.
pre Tonin Cjapielâr