“Poben sarès ore di lâ tal jet, fruts, il fûc si sta studant e son chestis ultimis faliscjis ch’a emplin di lusôr la gnot. Ma prin di lâ a durmî, us vûl contâ incjimò une storie. Certi’ storiis si puedin contâ dome di gnot. Certi’ storiis no an fin e no an inizi, si puedin contâ e ricontâ e son simpri gnovis. Baste zontâ un toc di lune, un frut intune scune e un paîs indurmidît”.
◆ E comence cussì la storie che si ispire a une liende dal Cjanâl da la Aupe, che Moretti e à rielaborade e ilustrade cun dissens vivarôs, curâts intai particolârs plui piçui: il gjat, la cogume, il frut che al duar, i arbui, la lune, i miluçs dismenteâts su lis ramacis crotis, lis cjicaris, i salams e dute la cantine di Toni Scuete, lis pignatis, lis canevacis e v.i. E, clâr, i doi protagoniscj de storie: il lôf e la bolp. Simpri insiemi, simpri plens di fam e simpri a cirî alc di meti sot dai dincj. Il lôf al è un gnognul scuintiât che nol sa contâ cuatri, la bolp e je smafare, e dopre il cerviel e no i displâs di fâi cualchi scherç al so amì. No mancjin altris personaçs: Poldo, il gjat che i plâs tant il lat, e Luziute, la femine che e rapresente la gjenerositât cence pretesis. Tantis voltis, intes storiis, no je une morâl. Ma cheste, salacor, e insegne che bisugne simpri pensâ ben aes consecuencis des azions che si fasin.
◆ Il librut di formât cuadrât (21 par 21 cm) al conte vincjevot pagjinis. Al è editât de cooperative Pavees di Bordan. In linie cun tantis altris publicazions de cooperative, ancje cheste e je une esplosion di colôrs, e al è il test che i fâs di supuart aes ilustrazions e no il contrari. No par nuie la dediche introdutive e je par ducj i fruts che a san svolâ cence alis. Cemût si fasial? Lassant libare la fantasie di cjalâ cun voi inocents dute la magjie dal mont che nus cercene.
◆ A completâ il libri, inte ultime pagjine, si cjate la traduzion taliane dal test de conte.
Alc di dî al reste su la lenghe doprade, che e varès vude bisugne di une revision par eliminâ cualchi talianisim inutil e ancje cualchi fal di grafie (rôbe, par es.). ❚
