Marie, diretore di gjornâl in Friûl plui di 60 agns fa

Imagjinaitsi une femine zovine, cumò si disarès une frute, ma i tiermins a mudin di significât tal timp; tai agns Trente dal secul stât, nassude tal ‘13, e jere za une femine, zovine tant che si vûl, ma pronte par lavorâ. Che po al voleve dî lâ a servî: la marche di fabriche pes feminis furlanis e cjargnelis di chê volte, salacor tant che la assistente di famee pes ucrainis di cumò. E vîf tun biel paîs de Cjargne, Midias, biel in chê volte come cumò; ancje se, cjalantlu cui voi di vuê, o olmaressin mancul bosc, plui prâts e nemâi, plui int. Ma la int e à di sostentâsi e cul biel no si passisi e alore si è libaris di scugnî lâ.
Imagjinaitsi duncje Maria Del Fabro, o Maria di Plaça come che le clamin in paîs, a servî a Udin li di un om che al è un biel sogjet. Al podarès vivi cuiet fasint il dentist o odontotecnic ma nol è mût di bonâlu: al è un di chei socialiscj libertaris che a vuelin la rivoluzion sociâl e che a crodin che la liberazion e à di valê ancje par un piçul popul tal mieç de Europe: il popul furlan. E intant che la pratiche cul biel titul «Felice Marchi. Anarchico. Pericoloso» si ingruesse tai uficis des poliziis fassistis, che ogni volte che al rive a Udin cualchi alt papavar dal regjim lu puartin par un pâr di dîs in galere, che cuant che si à di esponi il tricolôr lui si refude e al ven menaçât, jê e sint di volê simpri plui ben a chel om, no plui a chel che i da lavôr. Che al devente il so di om ancje se par tant timp no si maridin: maridâsi e je une convenzion borghese, une cjarte dal Stât.
Imagjinaitsi cheste fantate, cence une istruzion formâl, ma tant inteligjente e svelte, che e compagne so om te fondazion di un gjornâl che al reste te storie de lenghe furlane e dal Friûl: Patrie dal Friûl; prime e lavore te part aministrative distributive po ancje, in gracie de capacitât di osservazion e dal studi, tal lavôr redazionâl, cence paraltri comparî mai tes “firmis” dal gjornâl.
Ma a un ciert pont, cuant che une part impuartante de redazion e ancje il diretôr a molin, e je jê che e devente diretore, dal Setembar dal 1953 fin ae fin dal gjornâl, tal 1965. Par dî la veretât e veve za tacât tal 1952 cul Cjavedâl, un gjornâl no alternatîf ae Patrie ma segnâl de insodisfazion di Felix e di Marie pe impostazion “culturaliste” di cheste.
Imagjinaitsi une femine tun ambient di int ancje anticonformiste ma dome masculin, par no dî maschilist, e cun dut achel e rive benon a fâsi rispietâ; alore, ma ancje vuê, la presince feminine tal ambient autonomist o nazionalitari (o ce che o volês) e jere, e je, une vore scjarse e la mancjade incorporazion de sensibilitât e dal savê feminin inte pratiche politiche e culturâl coletive e je un segnâl sigûr di faliment. Jê e je une impuartante ecezion. Cun di plui jessi diretore di un gjornâl politic, in chê ete, no mi somee une robe tant comune; che no vegni valorizade nancje dai “studis des e su lis feminis” al è pôc comprensibil.
Imagjinantsi dut chest (e si podarès continuâ) mi somee clare la reson, miôr, lis tantis resons par invidâ a ricuardâ, a dîs agns de muart, cun agrât e afiet cheste piçule cjargnele, elegante e fuarte esploradore di un gnûf protagonisim feminin furlan. ❚
✒ Donato Toffoli