Lyra: Elsa Martin e Stefano Battaglia a cjantin Pasolini e nus puartin intun viaç musicâl inte tradizion e inovazion, tra passât e futûr

A i 6 di Març 2025 al è jessût Lyra, il gnûf album de cjantante Elsa Martin e dal pianist Stefano Battaglia, une opare rafinade dedicade a Pier Paolo Pasolini. Publicât di Artesuono, il disc al incrose la vôs e il pianoforte intun dialic poetic di dodis cjançons ispiradis ai viers in furlan dal grant poete.
◆ Il doprâ la lenghe furlane nol è un câs: par Pasolini al jere un tornâ aes sôs lidrîs, un puint tra la infanzie e la ricercje espressive. Lyra al ten dongje cheste ereditât e le trasforme in sun, metint dongje tradizion e sperimentazion.
◆ Lis cjançons a fondin tradizion liriche, musiche popolâr e sonoritâts contemporaniis, dant spazi ae improvisazion. La sensibilitât interpretative di Martin e Battaglia e esplore il potenziâl de peraule poetiche, valorizant la ricercje dal furlan. La lenghe no je dome un veicul di significât, ma un strument musicâl che al rinfuarce la potence evocative dal test.
◆ Pasolini al viodeve in cheste lenghe un strument di libertât, buine di esprimi emozions ancestrâls. I doi artiscj a tradusin cheste vision in musiche, tornant a dâ vite ai soi viers cuntune forme gnove e intense.
◆ Di timp la artiste e sotlinee la impuartance de lenghe furlane inte sô musiche, viodintle come une lenghe siore di storie e mistîrs, buine di fâ vignî fûr dut il spessôr emotîf dai siei tocs: «O ai sielt il furlan pal gno cjant, parcè che al è sun ancjemò prin che peraule.»
◆ Martin e Battaglia a lavorin insiemi za di dîs agns, condividint la passion pe poesie e pe valorizazion des lenghis minoritariis. L’omaç a Pasolini al è un svilup naturâl dal lôr percors, a testemoneance dal lavôr fât in passât.
◆ Battaglia i veve za dedicât al poete il dopli album Re: Pasolini tal 2005, e cualchidune di chês composizions a torne a vivi in Lyra. Ancje Martin e à esplorât il mont pasolinian cul disc Linguamadre: Il Canzoniere di Pasolini (2020) e cul spetacul Rosada!.
◆ La lôr colaborazion e je cressude intun lavôr di ricercje atente e meticolose, centrât su la fusion tra peraule e sun, dant gnove vite a tescj che za di bessôi a son plens di musicalitât.
◆ Il furlan in Lyra nol è dome un regâl aes lidrîs di Pasolini, ma il cûr dal progjet. Il poete al reinvente la peraule midiant de nestre marilenghe, creant un univiers liric dens di intimitât e universalitât. L’album al amplifiche cheste tension, tornant a dâur ai tescj une dimension musicâl e contemporanie.
◆ Intune epoche di omologazion, Lyra al è un at di resistence culturâl e un invît a tornâ a scuvierzi la diversitât linguistiche.
Tal 2025 si ricuardin cincuante agns de muart di Pasolini e Lyra e contribuìs a mantignî vîf il so pinsîr, trasformant i siei viers in suns che a rivochin ancjemò vuê.
Cun Lyra, Martin e Battaglia a fasin un omaç a Pasolini e ae sô lenghe, esaltant la sô musicalitât e la sô potence evocative. Un album destinât a lassâ il segn, come lis peraulis dal poete che lu à ispirât. Par savê di plui sul album e sui progjets dai artiscj, stait daûr di Elsa Martin e Stefano Battaglia su lis lôr plateformis social e sui sîts: www.elsamartin.it e www.stefanobattaglia.com ❚