………………………………………………………..
I TRÊ PROVERBIS DI AVOST
La prime ploie di Avost e rinfrescje il bosc
❋❋❋
In Avost ognidun al mangje a so cost
❋❋❋
Se al plûf a Sant Laurinç (10-VIII), al plûf cul cuinç
………………………………………………………..
LA CUSINE
Mignestre di cesarons e latuie
Mignestre di rîs e verduris
Mignestrons rinfrescjants
Paste o rîs frêts e semifrêts
Macarons di scuete cun ragù di faraone
Rafioi di raze
Blecs cun ragù di plui sortis
Risot cu lis cuaiis
Poleçs in rost (tradizionâl plat de Assunte)
Filet di manç marinât cun salade di puar
Cjars rostidis su la gridele
Ostiis di cjars crudis e cuinçadis.
Insalatis di stagjon
Pomodoros e pevarons farsîts
Pevaronade
Verduris frescjis sboentadis su la plache
Salatis di pes di mâr o lessât o marinât
Risot cul folp
Boreto de Gravo
Caparots ai e savôrs
Fetis di pes spade tal for o in rost
Capis indoradis o in umit
Salse di ciespis
Gjelâts, sorbets e macedoniis
Ciespis, angurie e melons
Sirop di moris
………………………………………………………….
IL SANT DAL MÊS – Sant Laurinç
Adiriture 26 paîs te ex provincie di Udin a àn glesiis, capelis e altârs dedicâts a Sant Laurinç, che il so cult al jere sigûr primitîf, prebizantin, invezit altris titui di Sant Laurinç a son stâts zontâts te Ete di Mieç e cualchidun al va indaûr ai secui XI-XIV. Al pues stâi che lis tantis fiestis paganis che a esaltin la potence dal fûc tal mês di Avost a sedin stadis cjapadis sù dal cristianisim te fieste di Sant Laurinç, fissade ai 10 di Avost, propit tal cûr dal segn dal Leon. E cole cuant che il calôr dal soreli al è sore de nature e dai paisaçs e tal cîl de gnot di mieç Istât a trionfin lis stelis che a colin. La tradizion dal popul e diseve che chestis piçulis cometis a jerin lis lagrimis di Sant Laurinç fat martar suntune grande gridele. Ancje tes crodincis popolârs furlanis, la fieste di sant Laurinç e à une funzion di fonde di “suee” o “divisori” dal Istât, e duncje “di passaç” dal so “cûr di fûc” a atmosferis plui clipis cu la vignude des primis ploiis che a rinfrescjin lis zornadis bolintis e lis gnots cjaldis di Avost. ❚
………………………………………………………….
LA FIESTE DAL MÊS – Calendis di Avost
La date dal prin di Avost (Calendis di Avost), che e coincideve cu la suee di mieç Istât, come ducj chei altris divisoris stagjonâi (mieç Invier, mieze Vierte e mieze Sierade) e lis datis dai solstizis e dai ecuinozis, par antîc e vignive cetant festezade. I Celtis a celebravin il Lughnasadh, la ultime des cuatri fiestis magjichis agrariis e stagjonâls dal lôr calendari solâr, invezit tal 18 p.d.C. l’imperadôr Cesar August al istituì lis Feriae Augusti, di dulà che al ven par talian il “Ferragosto”. No si sa ni cuant ni cemût che cheste impuartante fieste di mieç Istât e sedi sbrissade dal prin al decim cuint dì dal mês, là che e je stade cjapade dentri de fieste religjose de Assunzion de B. V. Marie. Il costum di fâ fieste ae colme dal Istât si infuartì dal sigûr par vie de polse des oparis agrariis prime di tornâ a tacâ i lavôrs des vendemis, segnant une sorte di fieste di metât cicli; une poesie di Nicolò Morlupino (sec. XVI) e conferme il fat che in Friûl a vignivin celebradis trê grandis fiestis peadis ae anade agrarie: il Carnevâl (che al preanunzie la scree dai lavôrs), il Prin di Avost (che al segnave la polse des voris di Istât) e Sant Martin (che ’ndi segnave la conclusion). ❚
……………………………………………………
FRIÛL CONTADIN. Lis voris dal mês
Tal mes dal “soreli leon” il contadin al pues polsâ, ancje se tai ultins dîs di Avost al à di preparâ semplis, sutinis, brentiei e cuinçs par jemplâju di aghe (une volte a vignivin metûts dilunc di canâi, roiis e riui) par sglonfâur lis dovis e cussì otignî la tignude perfete dai moscj. Grant lavôr in mont cu lis mandriis intal ultin mês par monteâ, intant che sul mâr e va indenant la stagjon siore de pescje. In chest mês si cjapin sù ciespis, fîcs e nolis, intant che tai orts lis feminis a semenin salatis di tai, rucule, ravanei, valeriane, spinaze, vuaìnis, cevolis e ai e a rimplantin lidric ros, indivie, verzis, brocui e cicorie. Cun tante bondance di ortaiis lis feminis a puedin ancje pensâ ae lôr conservazion midiant essicazion sot dai rais bolints dal soreli o in vâs di veri dopo vêlis sboentadis sot sâl, zucar, asêt, spirt, salmuerie, e v.i. ❚
…………………………………………………
LA TRADIZION DAL MÊS – La Cuarte di Avost
Di cualchi secul e esist in Friûl la tradizion di celebrâ te cuarte domenie di Avost une grande fieste che, tal moment di fonde dal passaç climatic e stagjonâl, e siere cun solenitât la fin dal Istât. Une volte, par cheste fiestone di ultime scansion stagjonâl si veve simpri luminariis sflandorosis, musichis di contor e bondance di mangjative e di vin. La fieste de Cuarte domenie di Avost, che e clamave dongje tante int, e lave indevant fin tart cun lûs, suns e baldoriis. Cuant che al bateve miezegnot, cuasi se e fos pardabon la ultime gnot dal Istât, si jevavin sù berladis, si traevin mortarets e fûcs artificiâi che a pandevin il lôr cricâ tal cidin dulintor dai paîs, sclarint e colorant il grant cîl stelât. Cu la fieste de Cuarte domenie di Avost, i nestris vons a saludavin l’Istât, la stagjon dai puars – come che si usave clamâle – parcè che ancje chei che no vevin nuie a podevin nudrîsi mangjant pomis o verduris di ort e di cjamp e a podevin vistîsi cun cualsisei svelandrin. Tal dì dopo de grande fieste, i contadins a tornavin a començâ lis voris de campagne, ven a stâi lis tant spietadis vendemis, che si slungjavin fintremai ae seconde metât de Sierade, cuant che altris sants e altris fiestis religjosis a varessin segnât la conclusion dal cicli agrari e a varessin misurât la progressive colade de lûs e dal calôr a pro des ombrenis te tarde Sierade e de rivade dal prin frêt. ❚