Pai 350 agns de muart dal compositôr
di San Vît dal Tiliment
Chest an al cole un altri inovâl impuartant, i 350 agns de muart di Gian Giacomo Arrigoni, organist, mestri di capele e compositôr di San Vît dal Tiliment, un dai plui grancj rapresentants de musiche in Friûl tal periodi Baroc. Un siôr musicist che si è fat un non ancje tal forest, tant che tal 1633 al jere atîf a Viene come “organist di sô Maestât Cesaree”, cemût che al risulte scrit intal testament di un altri non furlan de musiche: Alessandro Orologio. Di fat al veve lavorât sot dai imperadôrs di Austrie Ferdinant II e III. Tornât in Friûl tor il 1640, al à à vût la incarghe di organist de parochiâl di San Vît dal Tiliment e ancje chê di mestri di capele. Al è autôr di une vore di biele musiche, come lis Cjançons sacris, Concierts di cjamare, Salms, Motets e Madrigâi.
◆ In ocasion des fiestis in onôr di chest princip de musiche dal Friûl di amont, si è ocupade tant e une vore ben di lui la associazion “Accademia d’Archi Arrigoni”, cul so president Sante Fornasier e cul diretôr artistic Domenico Mason, didate e violinist. La Academie e à in atîf une lungje schirie di concierts in Patrie e fûr, tant che la rassegne “San Vito Musica” e il concors internazionâl di violin “Piccolo Violino Magico”. E à publicât di resint un CD dedeât a un altri inovâl, chel di Antonio Salieri, a dusinte agns de muart, ancje lui musicist imperiâl, ma plui inlà tal timp, ae cort di Josef II, tal periodi Classic de musiche.
◆ Il disc al è jessût pe prestigjose etichete internazionâl Brilliant Classic e al ten dentri i Concierts par pianoforte e orchestre di Salieri, cul pianist Costantino Catena e la direzion di Giulio Arnolfi. Regjistrât intun lûc iconic de musiche in Friûl, ven a stâi la Fazioli Concert Hall di Sacîl, dulà che si realizin i pianofortis aromai plui famôs tal mont, a cheste produzion e je vignude daûr une tournée une vore preseade in nûf citâts talianis.
◆ Tra lis tantis iniziativis de Academie di Arcs Arrigoni si scuen sigûr ricuardâ la opare di divulgazion des composizions dal stes Arrigoni. E à grande impuartance la publicazion dai “Concerti di camera”, rivade dopo di une operazion di ricercje filologjiche une vore serie, cu la trascrizion in notazion moderne des sôs oparis. Un volum jessût pe cjase editore Libreria Musicale Italiana, une istituzion, par cure dal ricercjadôr grêc Pyrros Bamichas de Universitât di Atene.
◆ Il volum al è il prin tassel editoriâl dal progjet “Giovanni Giacomo Arrigoni (1597- 1675): musicista e compositore friulano tra San Vito al Tagliamento, Vienna e Venezia”. Un percors di ricercje indreçât ae valorizazion, midiant di ricercjis musicologjicis e di iniziativis di promozion di caratar divulgatîf e didatic, de figure e des oparis musicâls di un musicist e compositôr furlan di sigure grandece. ❚