“La sapienza dei ciliegi millenari”
une racuelte par piano e violoncel
Jê e je une artiste di Monfalcon, une cjantante une vore preseade che si môf sedi tal mont de musiche classiche, de opare e de musiche corâl, che ancje inte dimension de musiche pop. E cumò o vin il plasê di scuvierzile ancje inte sfere de creativitât compositive. Si clame Mara Corazza, une sopran liriche lizere, pianiste e ancje compositore, juste apont. E à publicât il so prin album, vot composizions par pianoforte e violoncel, sunât di bande di un musicist furlan, di Udin, di grant nivel: Andrea Musto. Il disc al à titul “La sapienza dei ciliegi millenari”, regjistrât intai studis Artesuono di Stefano Amerio a Cjavalì, e sunât suntun pianoforte Fazioli, di Sacîl, une altre realtât furlane cetant ricognossude. Si trate di composizions di savôr cult, ma proietadis intune dimension une vore atuâl, dongje de musiche di stamp lizêr, ancje se la perizie di scriture e je cetant rafinade, rivant a plasê sedi al scoltadôr informât e atent, sedi a chel che inte musiche al cîr soredut un motîf di evasion e distrazion.
◆ Il non dal disc al ricalche une passion di Mara Corazza pal Gjapon, e al cjape a riferiment i siei arbui plui rapresentatîfs, simbul di bielece, ispirazion creative e poesie. Chestis plantis a devin vê invidât la compositore a mostrâsi in maniere vierte e cence pôre, al contrari di ce che plui di cualchidun, come che jê mi à riferît, i veve conseât di fâ, lassant stâ la scriture musicâl. Invidie, dispiet, malconsei, va tu a capî. Invezit Mara, dopo un biel toc indulà che e je restade blocade, ancje se scrivi musiche e je une passion che e puarte indenant di cuant che e jere piçule, e à alfin decidût di no scoltâ plui conseis di bande di int svalutante, dant ae lûs cheste sô prime creature musicâl. E e à fat une vore ben! Il disc, presint su dutis lis plateformis digjitâls e ancje in formât fisic, al sta otegnint di fat une vore di preseaments. Us consei di lâ a scoltâlu, magari digjitant il titul su Spotify, o scuvierzarês la perizie compositive di une furlane plene di ispirazion, sintiment e çate tecniche, buine di meti insiemi in maniere cetant origjinâl il sintî e il fâ scoltâ.
Ogni composizion, come se al fos il cjapitul di une vite che e cjate corispondencis tai vivûts universâi, si caraterize par une cjantabilitât proprie, penetrante e volitive, sostignude di costruts armonics par nuie artificiôs, pluitost naturâi e convincents. Al ven dificil categorizâ il gjenar, come che o ai dit e je musiche di nature culte, ma tal stes timp funzionâl aes dimensions dal pop. E funzione, e je buine di rivâ a ducj, e je musiche contemporanie cuntun caratar divulgatîf che al cjape.
◆ L’element poetic al è luminôs, come che a invidin a capî i titui des composizions: “Vento a favore”, “La sapienza dei ciliegi millenari”, che i da il non al disc, “La ruota del tempo”, “Le mie ali”, “Il mondo attraverso i miei occhi”, “Legàmi”, “L’anima risale…e germoglia”, “I doni del presente”.
◆ Ogni toc e je une narazion, a son romanzis cence peraulis, indulà che la liriche dispès e je afidade al violoncel in tramis contrapuntistichis che si instrecin ai cuintricjants dal pianoforte.
Il disc al è stât presentât ae fin di Març intal Atelier di Giorgio Celiberti, un apontament dut esaurît, la prime ocasion par sintî dal vîf dut chest lavôr che inte sô integritât al disglagne un sens di grande libertât.
◆ Come che mi à contât Mara Corazza: «Cheste racuelte e ten dentri la espression complete des mês potenzialitâts: sunâ, cjantâ, componi. E je la realizazion dai miei siums tal scansel. O ai vivût resistencis in chest sens, ma ae fin o ai decidût di scoltâ la mê vôs interiôr, e o ai simpri di ringraciâ cetant il violoncelist, gno grant amì, Andrea Musto, par vê simpri crodût in me, par vêmi invidât a creâ, e lui stes al à volût dâ vôs aes mês melodiis sunant, in maniere maraveose, il violoncel. O speri prest di podê proponi chest progjet in altris situazions, sunant dal vîf, un altri aspiet dal gno mistîr che mi cjape une vore: condividi art e sintiments cu la int, cence filtris ma cun grande spontaneitât».
Par dutis lis informazions sul disc, o par vêlu tal formât fisic, scrivêt ae artiste Mara Corazza, us rispuindarà cun grant plasê: maracorazza31@gmail.com ❚