La furlane e la pizzica. Ise vere o no che chestis danzis a àn alc ce spartî?

Si cîr une lidrîs comun tra la pizzica, la danze popolâr dal Salent, e la furlane, la nestre danze che vie pai secui e à subît diviersis trasformazions e che ipotesis, soredut di bande di Gilberto Pressacco, le fasin rimontâ inte gnot de Glesie di Aquilee. Par chest e je nassude une convenzion, un protocol di intese tra la Regjon Friûl – Vignesie Julie, la Regjon Pulie, la Fondazion “La notte della taranta”, la Fondazion Friûl e la Union grups folcloristics dal Friûl – Vignesie Julie, cun chê di vierzi studis e altris ativitâts di valorizazion di chescj patrimonis che si crodin in cualchi maniere vicins.
◆ A son previodûts events e festivai riunîts, incuintris e altris ativitâts di divulgazion, par meti in sene la pizzica e la furlane, cjapant dentri artiscj, zovins, apassionâts, studiôs, par analizâ fonts, confrontâlis, discutilis, ancje midiant dal lavôr di universitâts e scuelis, istituzions culturâls e promotôrs des dôs danzis tradizionâls. Une iniziative interessante, come che al à dit l’assessôr puliês Fabio Amati: «Cheste storie e je nassude dal incuintri cun Gabriele Pelizzari, cu la opare di Gilberto Pressacco e lis sôs indagjins su la gnot de Glesie di Aquilee e i terapeutis. Risultât? Une grande sorprese, une ipotesi cun tancj indizis di meretâ une prove: la pizzica e la furlane a podaressin jessi leadis cetant, almancul sul principi. E alore, la idee di meti insiemi Pulie e Friûl, in graciis a un finanziament dal Consei regjonâl e di un pat sotscrit ator de maravee dal paviment musîf de Basiliche patriarcjâl di Aquilee». Il vicepresident de nestre Regjon, Mario Anzil, e la assessore Barbara Zilli a àn afermât che «cun chest protocol la Regjon e conferme la volontât di valorizâ e promovi il patrimoni imateriâl condividût, tornant a saldâ il dialic tra teritoris unîts di lidrîs culturâls une vore antighis: si trate di un acuardi cetant interessant che al à l’obietîf di esplorâ fondis cristianis che propit di Aquilee si son daspò slargjadis in altris areis, fint ancje tal Salent».
◆ Il discors si fâs stimolant, ancje parcè che al supere une vision limitade dal fâ ricercje, no pontant dome a ce che al sucêt des nestris bandis, ma vierzintsi al confront e incrosant esperiencis, sigûr diferentis, e par chest propositivis. La inciertece di chestis operazions no à di fâ pôre, dut altri, e à di coventâ par meti in fuarce lis risorsis, tant in cont dai studis che dai studiôs, nestris e lôr, par une taule condividude di savês che a puedin puartâ a scuviertis impensadis. La realtât puliese, inte sô ativitât dedicade a riscuvierzi e a atualizâ i lôr repertoris musicâi, e pues fânus di bon esempli e stiçâ une riflession serie di scambi di informazions, e nô compagn, in direzion contrarie, passant la mode autoreferenziâl, no plui utile, dal “fasìn di bessôi”. Magari e je vere: «Ognun al bale cun sô agne», ma e je ancje vere che, come che al à scrit un anonim: «Cui che nol bale, nol sa ce che al sucêt». E no si bale di bessôi. ❚