Stop de Comission a une altre ICE a pro de tutele des minorancis
Altiero Spinelli al diseve che la Europe no cole dal cîl. Cun chês peraulis al veve chê di marcâ il fat che par fâ sù une Europe unide e democratiche e covente la mobilitazion dai citadins, de int, des comunitâts. Cundut di chês che a puedin jessi lis contradizions politichis e ideologjichis che si palesin a fuart, massime tai ultins timps, par sigûr une maniere par fâ sù la Europe tacant dal bas e je chê de colaborazion e de cooperazion jenfri citâts, teritoris e istituzions locâls. In cheste suaze a cjatin puest i zimulaments tra citâts di diviers Stâts europeans, che a son in chel istès une forme, un risultât e fintremai une cundizion di disvilup di chê colaborazion.◆ Inte suaze di Friuli Doc a Udin, ai 12 di Setembar stâts, e je stade inmaneade une zornade di incuintri fra i rapresentants di un trop di aministrazions locâls che za di tancj agns a son implicadis in zimulaments e in altris modalitâts di colaborazion cun chê de capitâl dal Friûl. Vie pe buinore li dal Salon dal Popul di Palaç D’Aronco lis delegazion des aministrazions di Villach (Austrie), di Maribor (Slovenie), di Esslingen am Neckar (Gjermanie), di Székesfehérvár e Óbuda-Békásmegyer (Ongjarie) e di Tarnów (Polonie) a àn presentât lis lôr comunitâts e i progjets di cooperazion teritoriâl là che a son implicadis. Cun di plui il sindic di Udin, Alberto Felice De Toni, e chel di Tarnów, Jakub Kwaśny, a àn firmât un acuardi di cooperazion, che in curt e cjaparà la forme concrete dal zimulament. Intervistâts di Radio Onde Furlane, i doi sindics a àn marcât lis tantis afinitâts che a metin in conession lis dôs citâts, intant che il document che a àn sotscrivût al definìs tant che cjamps di colaborazion chei de culture, de istruzion, de economie, dal ambient, dal sport e dal turisim. Tornant a riclamâ une declarazion sù par jù compagne di chê fate intant de cunvigne de buinore de bande dal president dal GECT (Grup European di Cooperazion Teritoriâl) che al ten dongje Gurize, Nova Gorica e Šempeter-Vrtojba, Paolo Petiziol, De Toni al à ancje marcât che Udin, juste tant che capitâl dal Friûl e cul vê cussience di chest, al pues disvilupâ relazions fuartis e impuartantis cul rest de Europe e cul rest dal mont. Ce che al nas, al devente. Viodarìn.◆ Par intant, se si va dilunc a provâ a fâ sù la Europe tacant dal bas, i vertiçs des istituzions de Union Europeane (UE) a somein simpri plui impegnâts a scjafoiâle e fintremai a disfâle, cun esitancis e cencenament di ogni sorte, massime tal cjamp des relazions internazionâls, che a divegnin de vision nazionaliste che e je proprie dai diviers guviers dai siei Stâts membris. Chel stes ategjament e chê stesse situazion si palese dispès ancje cuant che a vegnin cjapadis decisions in cont di cuistions che a varessin di vê un valôr di fonde par rindi concrets i principis che a stan daûr dal sproc «unide inte diversitât». Un câs emblematic in chest sens al è chel de comunicazion de volontât de Comission Europeane di no vê intenzion di puartâ indenant la Iniziative dai citadins europeans (ICE, une sorte di propueste di leç europeane di iniziative popolâr) che il so titul al è “Politiche di coesion a pro de avualance des regjons e de sostignibilitât des culturis regjonâls”. La CE e à comunicât che no pues disvilupâ cu la adozion di almancul di un at legjislatîf chê propueste, fate indenant di un comitât promotôr vuidât dal Consei Nazionâl da Seclêrs (la minorance ongjarese inte regjon de Bucovine in Romanie). Chê decision e je stade motivade prin di dut cun chê che e je stade definide la ambiguitât de espression “regjons nazionâls”, doprade inte ICE cun riferiment ai teritoris là che a son presintis in maniere significative comunitâts linguistichis o nazionâls minorizadis. ❚
