La coltivazion biodinamiche inte aziende Puntel di Cleulis

La aziende agricule biologjiche di Ursule Puntel e je nassude in maniere uficiâl tal 2008. O sin a Cleulis, frazion dal comun di Paluce, a 900 metris sul nivel dal mâr. “In realtât – e dîs Ursule –, la aziende no si sa cuant che e je nassude: si trate di une aziende familiâr di chês che ducj a vevin in Cjargne une volte, cuntune vacjute, un ort, un cjamp. Duncje, o ai puartât indevant ce che e veve mê mari e prin di jê la famee di gno pari. Cuant che mi è rivade a mi, judade dut câs simpri di mê mari, o vin pensât di dâi alc in plui ae aziende, certificantle cul biologjic. Nô o lavorìn in maniere il plui pussibil naturâl, no doprìn prodots o acolts tossics. Il ledan des bestiis al va dret a coltâ i nestris terens, prâts e cjamps e cuant che o vin problemis di pedoi o alc altri tes plantis, o fasìn decots e impacs cu lis jerbis. Al è di agns che o vin une coltivazion biodinamiche – ancje se no le vin mai certificade, parcè che no rivìn a stâ daûr in maniere scrupulose a ducj i detais –, ma dut chel che o podìn fâ o cirìn di fâlu, tignint di voli in ciertis lavorazions no dome la lune che e cale o che cres ma ancje il dislontanâsi o il svicinâsi de lune ae tiere, tignint cont de energjie des costelazions e dai planets. Di chescj studis si ocupin di plui mê mari e mê agne. Se une dì o ai di lâ a gjavâ lis cevolis, ur domandi a lôr. Dut chest nus da un tic di ritmi, massime cuant che tu âs tancj cjamps e no tu rivis a vê dut regolâr. Cun chest sisteme, tu âs un ritmi e tu rivis a stâi daûr ancje al rest. Nô o vin ancje animâi – dôs vacjis, dôs cjavris e cuindis gjalinis –, e di Istât o vin i prâts di stâur daûr. Se jo no ves l’aiût dai miei gjenitôrs e dai miei fradis, ma ancje dal gno om e dai miei cuatri fîs, no rivarès a fâ tant. Daûr dal gno non e je une aziende di famee e al è un lavorâ insiemi. Nol è nuie di dificil.”
◆ Il fat di jessi in mont e di coltivâ prodots biologjics al puarte cun se une strade in salide. Di fat, Ursule e dîs “Il gno lavôr plui grant al è chel di stâi daûr ae burocrazie che mi impegne un grum di timp. Invezit di slizerînus, nus cjamin simpri di plui e nus gjavin energjiis. Di cuant che o sin biologjics, o vin une o dôs visitis ad an di control, e la mê aziende e je considerade compagne di chês grandis: la burocrazie che e fronte la mê piçule realtât e je compagne di chê di une aziende cun 500 vacjis…. Tai controi, i ispetôrs si fermin une dì interie e a visitin dute la aziende e lis coltivazions. Par chestis, o ai di compilâ un regjistri indulà che o segni dut ce che o semeni, il gjenar di semence che o dopri, indulà e cuant che le compri, ce che o vent e la cuantitât che o vent… par fortune che no mi domandin ancje a di cui! In chei dîs li o soi gnervose parcè che o vûl vê dut a puest, e ogni volte che mi controlin al mancje alc… E cussì mi rive la “no conformitât” che o ai di risolvi intal timp di 60 dîs, se no mi gjavin il biologjic.”
◆ Ursule e à ancje un laboratori di trasformazion dal lat indulà che e prodûs doi gjenars di formadi: une formadiele frescje di 4 – 6 setemanis e un formadi cremôs sot vueli; intun altri piçul laboratori si fâs la lavorazion e la sielte des jerbis che a coventin a Ursule par prontâ tisanis unichis. I siei prodots si puedin cjatâ ogni lunis, di 5 agns incà, tal Marcjât dal contadin di Tumieç.
◆ La sô e je une grande passion, compagnade di une grande volontât. Lis fadiis no mancjin e e rive a pêl a cuvierzi lis spesis, ma e dîs: “o cîr di dâ l’esempli ai miei fîs e di cjapâju dentri tai lavôrs de campagne, però al è impegnatîf par me. Ce che o volarès che a capissin al è che al è un ben pal teritori: nô o seìn dut e il nestri paîs al è biel net. O tignìn a cheste tiere.” ❚