La autonomie speciâl sot de Serenissime

Al veve reson Tite Vico cuant che al fevelave di “cors e ricors de storie”. Ancje in Friûl o sin daûr a cjalâ, magari cussì no cence bati cee, ae venetizazion sistematiche de Regjon. Un altri 1420! Cence barufis, cence vueris, cence ferîts e muarts ma in forme plui fine ma no mancul pesante: midiant di concors ad hoc, decrets dal president de zonte regjonâl e indicazions tai conseis di aministrazion. E cussì il diretôr dal ERSA al è venit, parcât te agjenzie agricule in spiete di pension. La direzion di A&T 2000 e je lade a un venit, e par no falâ, ancje chel che al è rivât secont te graduatorie al è venit. No si sa mai che al coventi un diretôr ancje ae NET. Il president de zonte regjonâl al è veronês cul agravi di jessi cressût a Triest, il sindic di Udin padoan. Lis decision su fâ o no fâ la dighe sul Tiliment tra Dignan e Spilimberc e vignarà cjapade de autoritât di bacin di Vignesie. La sorintendence al patrimoni artistic e culturâl e tornarà uniche sot il Venit, di dulà che si jerisi gjavâts, dopo di une bataie tal 1980. Lis partecipadis de Regjon Informest, Finest e la stesse Friulia une volte a disposizion in maniere salde des impresis de nestre regjon, vuê a vegnin dopradis plui dai venits che dai furlans. Fintremai il Consorzi DOP dal formadi “Montasio”, che al cjape il non de mont de Val Racolane, al à gjestion aministrative venite. La Cantine di Cjasarse e je lade a Conean e lis tieris furlanis, soredut tal Friûl di soreli a mont, a vegnin compradis dai viticultôrs di di là de Plâf che no àn plui cjamps des lôr bandis par meti Prosec.
◆ La furnidure de mangjative tai ospedâi de regjon e je di une dite magnagati visentine. Friûl di fat invadût.
◆ Zaia, che al è di Gorgo al Monticano, tacât dal confin, al calcole il Friûl la otave provincie dal Venit e i assessôrs e conseîrs regjonâi furlans no disin et. Sparide fintremai la cisilute di Glemone che intun ciert moment e pareve motivade su la cuistion furlane.
◆ Aromai no si fevele nancje plui di Nordest o di Trivenit. Vignesie no rive adore a jentrâ ni in Trentin ni in Sudtirôl. Li la autonomie e je ben interpretade. Dome i furlans si lassin robâ il teritori e pescjâ i pîts cence dî nuie.
◆ Ce che al è stât al torne. Al è evident che pai furlans la storie no je mestre di vite. ❚