In cusine par cirî la misure di dutis lis robis, spieli perfet de armonie universâl

Fabula fertur: l’Homo Furlanus, soredut il mascjo de specie, no si impace di cusine. Probabilmentri la sô antighe lidrîs di cjaçadôr, testemoneade di cetancj reperts archeologjics de Ete preistoriche inte nestre regjon, lu sburte a sta lontan dai fornei. Il so compit al è chel di copâ la bestie, puartâle cjase sù pe schene, lassant che a sedin lis feminis dal clan a spelâle, preparâle e cueile. Ae fin, cuant che e je pronte, si sente e al mangje, lui par prin ben si intint, dal moment che la prede e je stade procurade di lui, duncje al à il dirit di difamâsi plui di ducj chei altris, dimostrant cussì la anime patriarcjâl incontestabile de societât e de culture furlane. Al è evident che ancje in chest câs si trate di une liende. E i documents de storie nus rivin a regalâ cetantis testemoneancis contrariis, partint za dai documents plui antîcs. Par esempli inte Biblioteche Vuarneriane Antighe di San Denêl e je conservade un copie dal secul XII di un librut di ricetis scrit di Isaac Iudaeus, un miedi ebreu che al veve studiât intune scuele islamiche, gjestide de Moschee di Al Qairam, in tal Sud te Tunisie. E za cheste e sarès une notizione, pai timps ignorants e plens di tristerie che o stin vivint! Un miedi ebreu che al ven inscuelât dai arabis. Une lezion che o varessin di imparâ, al contrari dai esemplis di disumanitât che lis cronichis contemporaniis nus puartin devant dai voi ogni dì.
◆ Ma tornìn al libri. Copiât in Normandie, al rive probabilmentri intal ream dai Normans di Sicilie e li al reste fin cuant che Fidrì II di Svabie lu puarte come regâl al Patriarcje di Aquilee intun dai siei viaçs diplomatics inte Patrie dal Friûl. Segnâl che l’argoment al jere calcolât impuartant e preziôs. Intant si dimostre che nol impuarte il mût e la maniere chi tu preis il to Diu, ma e je la salût dai Umans che e devente il riferiment de nestre vite, duncje il benstâ, che al principie propit de taule. Po dopo si conferme la convinzion di Galenus, il miedi che al à permetût di fâ passâ lis cognossincis sanitariis de Ete Antighe ae Ete di Mieç, par la cuâl l’Om al è un grop là che i cuatri elements cosmics, ven a stâi l’Aiar, la Tiere, il Fûc e la Aghe si misclicin insiemi, partint di ce che o mangjìn ogni dì. E ce che si cjate dentri dal plat al va a produsi umôrs che a decretin il nestri caratar, la nestre indole e personalitât. Il gustâ tant che medisine, duncje, misurade cun atenzion e sapience par vivi a dilunc e preservâ la nestre salût. Cualchi ricete? La polpe dal miluç, fate dolce cu la mîl, e cuete in croste sot dai cops. Us visial alc? Il strudel! O pûr il struc dal miluç lassât fermentâ: il most! O ancjemò: il vuardi spelât, brustulât e fat boli, duncje filtrât e gustât cjalt: il cafè di vuardi! Par no cjacarâ di cais, talpins di purcit, goulasch di ors… Insome, cuasi la prime atestazion di ce che o podaressin clamâ in dì di vuê “cusine tipiche”. Simpri inte Vuarneriane si conserve ancje la copie di un “De conservanda sanitate” di un miedi amì dal umanist furlan Varnîr, Jeremie de Simeonibus, che seguitant chê stesse tradizion al compon un tratât cetant siôr di ricetis di cusine pensadis par fâ il ben dal cuarp e de anime.
◆ La prospetive e je simpri la armonie individuâl che e devente un spieli perfet di chê Cosmiche, e l’Uman al è il spieli perfet di dut l’Univiers, une specie di “Mappa Mundi”, la misure di dutis lis robis. Tratâ mâl il cuarp al à ripercussions une vore griviis sul Mont, e tratâ mâl il Mont, spreseant la Nature, al puartarà ae “malatie” e duncje ancje ae distruzion, ae muart dal cuarp e al sviliment de sô anime spirituâl. E ancjemò une volte dut al passe di cjarte in cjarte intune colezion di ricetis di preparâ, une plui buine di chê altre, e magari, intune altre ocasion, o podaressin ancje contâuses, par consegnâ cualchi sugjeriment a chei che a àn passion di “cogarie”.
◆ E ce si puedial dî di chel Martinus, cogo dal Patriarcje di Aquilee, che intal secul XV al scrîf e al publiche il so “De honesta voluptate”, che voltât dal latin al sune tant che “Le gjonde oneste”? Calcolât un dai prins libris di cusine – tal sens che no si trate di une opare di medisine dietetiche, ma propit di un recipiari là che si dan conseis sul mût di preparâ i plats che a vignaran puartâts in taule pai ospits. Chest al ven fat in maniere che la zentilece, la cortesie, il bon savôr, il plasê di condividilu cui amîs, a puedin deventâ un segnâl fuart di civiltât e di culture profonde. Fra lis pagjinis di chest librut si cjate adiriture la prime testemoneance dal frico, clamât “caseum in pastellecto”. Bisugne calcolâ che cheste opare e fo la prime a jessi publicade a stampe inte nestre Patrie. Un libri di cusine considerât adiriture plui impuartant des “Constitutiones” di Marquart, che al viodarà il turcli dome cualchi an plui tart. Come a pensâ che prime al ven il bon gustâ, e dopo la leç! Duncje tiere di cogos, la nestre! Fat esemplificât ancje di tancj leterâts che a scriverin cjançons e madrigâi sul bon mangjâ preparât di lôr pai amîs. In particolâr une “cjazon di gnoccis” di Plutarco Sporeno, e o sin tal secul XVII, là che si contin dutis lis puartadis e ducj i plats preparâts, de jentrade fin al dolç. Sopis, mignestris, colomps, sfranzei, tortis e confets, par no fevelâ di vin bon, di Clauian, di Prosec, di Buri e dal Cuei… insome, une specie di esaltazion dal golôs. Propit come Ciro di Pers, cusin di Ermes di Colorêt, che simpri intun manuscrit vuarnerian nus conte dal mangjâ, sempliç e sclet, che lui in persone al imbandìs pe brigade dai bogns amîs, inte sô vile di campagne.
◆ In timps plui dongje ai nestris, cemût no ricuardâ chel grant e gjeniâl cogo cjargnel, Gianni Cosetti di Tumieç, che a Rome, propit tornant a scomençâ di une tradizion antighe, fate di paisaçs e di memorie, di tiere e di sobrietât, al à riscuviert lis ricetis des nonis, ma tornant a leilis intune clâf moderne, cence tradî il lôr spirt origjinari. Al sostignive che il client al à di jessi educât a tornâ a cjatâ intal plat la emozion di une apartignince. Storie, passion e lenghe dentri de tace e su la tavaie. E in di di vuê? Tancj brâfs zovins, che a àn il cûr di invistî preparazion, timp e prospetive di vite inte art antighe dal cusinâ. Tignint simpri presint che il furlan nol mangje: al guste. Forsit imparant dal timp de miserie, si fâs bastâ ce che al à. Lu met adun su la taule cun chê sapience fate di passion e di savôr. La uniche che nus salve dal jessi consumadôrs, e nus manten umans. Intal cûr. E inte coradele! ❚