Il Pat pe autonomie te beorcje…

Un partît autonomist aial di stâ di une bande?
O di chê bande che, volte par volte, i conven?
◆ Vuê il Pat pe Autonomie si cjate denant a dôs stradis. Une che e previôt di stâ cuçs te grande coalizion di çampe, viodût che il so segretari Moretuzzo al à corût tes regjonâls dal 2023 tant candidât president propit in chel grup.
◆ O pûr dreçâ il stierç e cjapâ une strade tal mieç, cui voi vierts e lis orelis spiçadis, atent a dut ce che si môf.
◆ Cun pragmatisim e cence ideologjiis che a paralizin, cirint di puartâ cjase dut ce che si pues pe cuistion autonomiste in materie economiche e culturâl.
◆ A stâ fers di une bande, viodudis lis percentuâls di consens, il pericul al è chel di deventâ residuâls, cence vê un pês reâl tes decisions e, disìnsal dut, cence chê capacitât di ricat, uniche vere “regule” in politiche.
◆ Al massim, in chel câs, il rûl di un partidut autonomist al sarès demandât dome al carisme dai siei rapresentants, in forme estemporanie e no come capacitât ordenarie di incidi pardabon te coalizion.
◆ Di chê altre bande, si podarès cori il pericul di jessi considerâts un tichinin masse cualuncuiscj, e oportuniscj, di privilegjâ la rivendicazion ancje strumentâl rispiet a une politiche serie dal fâ. In chest i “doroteos” democristians a jerin mestris e il lôr pês, ancje se corint minoritarie, al è stât plui alt dal lôr consens. E la DC e veve la atitudin a jessi maiorance…
Un piçul partît autonomist puedial permetisi di pensâ e operâ come se al fos maiorance?
◆ Cjalìn Udin. Trop incidial il Pat pe Autonomie tes decision de zonte di De Toni? Il core business dal moviment vegnial puartât indenant te capitâl dal Friûl? O si spudino balins ancje nome a pensâ di fevelâ par furlan, se mai cualchidun al pense di fâlu?
◆ E sì che a Udin, come a Codroip, il Pat al à vût un ciert pês tal risultât eletorâl di chês aministrativis. Isal un pês che si viôt? No nus pâr… E alore bisugnarà cambiâ solfe. No je une sielte facile ma vuê si scuen.
◆ Parcè che, restant fers e cence une linie clare, si riscje di sparî, e tornâ a meti in pîts un partît, par di plui autonomist – ven a stâi cence riferiments romans – no je une strade par nuie facile.
◆ E bisugne jessi clârs e vê posizions netis ancje cu lis listis civichis. Parcè che guviernâ in maniere federâl lis tantis “tribûs” civichis presintis e inlidrisadis sui teritoris al è just e sacrisant, ma bisugne stâ atents di no cori il risi di deventâ un partît “autobus” pai siôrs des preferencis che, no volint cjapâ posizions claris, a montin sul “pullman autonomist” in campagne eletorâl e, dopo elets, a dismontin subit lant a infuartî il Grup miscliç. ❚