A tante int i da fastidi che cualchidun si permeti di fevelâ e, prime ancjemò, che si permeti di resonâ e di meti in dubi ce che a fasin chei che a àn il podê in man. Cuasi che a cjatassin confuart tal lassâsi comandâ, tal no vê voie di viodi e tal convincisi che e je nete ancje la aghe plui sporcje.
Al è come se chest permetisi di fevelâ al riscjàs di dismovi une cussience che al è masse comut lassâ durmî.
Chei che si justifichin cul vê la famee si dismentein dal mâl che a fasin aes fameis di ducj chei altris.
◆ La nestre peraule e il nestri esempli a metin in pinsîr il podê, i fasin pôre e par solit plui si va sù te famose scjale jerarchiche e plui cheste pôre e cres, daûr di une mascare di sigurece ostentade.
Prins a riclamâ al sens di responsabilitât devant de bisugne di un sacrifici coletîf. Prins a mocâle al prin crocâ de lavine. Il fin, otignût in maniere sistematiche ogni volte, al è simpri chel di metinus un cuintri di chel altri.
◆ Discreditament e difamazion: lis primis armis dopradis. De nestre, la voie di rivâ a dâ il bon esempli. Spes no si acuarzarìn nancje di dâlu, parcè che al è il nestri compuartament ai voi di chei altris ma magari rivarìn a judâ cualchidun, ancje se no lu savarìn mai. A compagnânus simpri invezit e sarà la ridade avilente di cualchi disperât, chê no podarà mancjâ.
◆ I plui zovins a son fîs dal nestri esempli e tal zîr di une gjenerazion si pues ruvinâ dut.
Al è biel pensâ al bon esempli come la forme plui fine di insegnament. E je la plui dificile: dal fevelâ o vin di passâ al meti in vore, no si met nuie te sachete, e soredut, no permet erôrs.
Par insegnâ cul bon esempli, nol covente vê studiât nuie! ❚
Il nestri esempli
Luca Bertossi
