Il furlan le à grivie

Certificade la strategjie de “muart cuiete”
La Conference regjonâl di verifiche e di propueste su la atuazion de leç regjonâl 29/2007, davuelte intant che o jerin in stampe intal mês di Dicembar, e veve di verificâ il stât di salût de lenghe furlane e di proponi gnovis azions pal so disvilup. Par fâ chest, a son stâts individuâts cuatri grups di esperts che a vevin, tant che responsabii: pal setôr de istruzion, Patrizia Pavatti; Erika Adami (che o saludìn tant che nestre gnove diretore, ndr) par chel dai mass media; Marco Stolfo pe publiche aministrazion e Donato Toffoli pe politiche linguistiche.
VIERTIDURE CUN ENTUSIASIM La prime dì dal dibatiment, il prin di Dicembar intal auditorium “Comelli” tal palaç de Regjon a Udin, e jere tacade cun grande positivitât e fiducie, ancje par vie di une buine organizazion e di tant public interessât.
PERAULE DI ORDIN, “GRIVIE” A man a man che si leve indevant però, il cuadri de situazion presentade si piturave di scûr. Tant che tal so discors ae fin dai lavôrs, ai 2 di Dicembar, intal cjistiel di Udin, il president de Assemblee de Comunitât linguistiche furlane Diego Navarria al diseve cussì: «Lis relazions a palesin une situazion une vore grivie pe lenghe furlane. Cheste peraule, “grivie”, e je stade ripetude une vore. Si pues ancjemò recuperâ, ma no se si va indevant come tai ultins 10 agns. E la colpe e je de politiche».
MUART CUIETE Sandri Carrozzo su lis nestris pagjinis al veve scrit di une strategjie de “muart cuiete” dal furlan. Ven a stâi che la politiche e da pe lenghe cuatri bêçs juste avonde par no stiçâ polemichis, ma no crodint che al sedi un dirit fondamentâl di vê di dâi dignitât complete e tant di mancul une oportunitât. E ce che nus ven di dî, al è che la Conference lu à certificât.
Redazion