Dai 22 ai 24 di Avost: cinc concierts corâi
e degustazions intune mense comune
tra musiche e spiritualitât
E conte dîs agns la manifestazion culturâl che e unìs lis antighis plêfs cjargnelis, la musiche corâl e i prodots alimentârs dal teritori preparâts des aziendis agriculis dal lûc. E je “La lungje gnot des Plêfs in Cjargne”, che si davuelzarà in trê dîs, di vinars ai 22 fin domenie ai 24 di Avost in cinc plêfs, cun concierts e degustazions di matine, tal dopomisdì e di sere.
◆ Organizât dal Côr dal Friûl-Vignesie Julie cu la direzion artistiche di Cristiano Dell’Oste, tai dîs agns di cheste rassegne si vûl lâ indenant cul principi origjinari dal progjet, interessât ancje a promovi e a sostignî il “Cjamin des plêfs in Cjargne”. Chest al è un itinerari in vincj tapis par 260 km in totâl, un pelegrinaç tra monts, valadis e aghis cun ponts di soste propit intes plêfs storichis, che dîs a son di calcolâ lis plui antighis, par vie dal document datât 1247 che al descrîf lis decimis che ognidune di chestis e veve di viersâ ogni an al Patriarcjât.
◆ Cun di plui chest event, che ogni an al clame dongje tante int, tra apassionâts di musiche corâl, di mont, di cjaminadis, di esperiencis in nature, dal bon mangjâ gjenuin, al ponte ancje in chest inovâl a dâ valôr ae acustiche dai lûcs, stant che in chescj ambients sacris e jere la musiche vocâl chê privilegjade. Si vûl ancje promovi lis bielecis artistichis che chescj lûcs sacris a conservin: statuis, palis di altâr, frescs di alt valôr dispès fats di artiscj e artesans de Cjargne. No di mancul, “La lungje gnot des Plêfs in Cjargne” e invide realtâts corâls che a vegnin di dut il Friûl e ancje dal forest, in particolâr dai Paîs confinants, Austrie e Slovenie prin di ducj, come che al sarà ancje chest an. Formazions di ogni sorte, côrs masculins, feminîi, miscs, vôs blancjis, grups vocâi e côrs grancj, che a cjantin in diviersis lenghis e che a proponin tra i plui varis programs musicâi sacris, de musiche gregoriane a chê contemporanie, scjavaçant la storie de musiche di ogni continent.
◆ Cheste iniziative no intint clamâ dongje grandis sdrumis di int, stant che si à di vê ancje rispiet pai lûcs, e duncje no si trate dome di un “spetacul corâl”. Pluitost si invide a une riflession di nature spirituâl, in fuarce dal messaç di racuelte a une elevazion de anime. L’invît, duncje, al è chel di partecipâ a cheste manifestazion cun cussience. In chest sens si inserìs ancje la propueste des degustazions che a vegnin ufiertis ae fin dai concierts, come intune mense comun, votade ae condivision e ae poie des ativitâts produtivis di agricultôrs e aziendis agriculis locâls che a preparin pitancis e cercjis a km zero.
◆ Il program dal decenâl da “La lungje gnot des Plêfs in Cjargne” al tache vinars ai 22 di Avost, inte Plêf di Sant Stiefin a Cesclans, cul conciert dal Côr dal Friûl-Vignesie Julie direzût di Alberto Busettini, cun daûr la degustazion de Aziende Agricule Sabrina Rovis.
◆ Sabide ai 23 di Avost, aes 16.00 inte Plêf di Sante Marie Oltribût di Tumieç, e je la Schola Aquilejensis direzude di Claudio Zinutti a proponi un program cun diviers cjants dal repertori aquileiês, e daspò la degustazion ufierte dal Caseificio Val Tagliamento. Aes 18.30, inte Plêf di Sant Martin a Vile di Verzegnis, de Cravuazie al rive il Côr Academic di Zagabrie, cu la direzion di Jasenka Ostojicˇ e ghiringhel de Aziende Agricule Nico Plozzer. Cheste realtât corâl e je une vore innomenade, cun concierts in dute la Europe e diviersis publicazions discografichis. Domenie ai 24 di Avost invezit, aes 11.00 inte Plêf di Sante Marie di Guart a Davâr, de Slovenie al ven il Zbor sv. Nikolaja di Litija, un côr direzût di Helena Fojkar Zupancˇicˇ, che al compagnarà la messe e daspò al larà indenant cuntun conciert curt. Ancje chest côr sloven al à une grant innomine tal setôr de coralitât europeane. Infin, aes 18.00 inte Plêf di Sante Marie di Castoie a Soclêf, il côr Hugo Wolf di Marburc (Maribor), une ecelence direzude di Aleš Marcˇicˇ, al sarà protagonist dal conciert finâl, cuntune ultime degustazion de Aziende Agricule La Sisile. Par ogni informazion si pues scrivi a info@corofvg.it o clamâ al numar 392 5390090. “La Lungje gnot des Plêf in Cjargne” si realize in graciis al contribût dal Ministeri talian de culture, de Regjon Friûl-Vignesie Julie, de Fondazion Friûl e di Prima Cassa Credit Cooperatîf Fvg, in colaborazion cul Cjamin des Plêfs in Cjargne, Silent Alps, Usci Fvg e Carniarmonie. ❚
