Gardiscje: nassude inte vuere, cressude inte culture

Prin di jentrâ inte ete dal Iluminisim, us invidi a lâ jù dilunc dal Lusinç. Di fat, no podìn ignorâ la dade di timp cuant che Gurize no je stade la uniche capitâl intal Friûl orientâl. Par no pôc timp, si cjatà acompagnade de citât plui meridionâl di Gardiscje.
◆ No crôt di esagjerâ disint che, in chest ultin lûc, la vuere si riflet in cuasi ducj i ambits e in ogni periodi clâf. La conession e je za evidente tal toponim, che al è di gnûf slâf: di “gradíšče”, “lûc centât”, ma in câs ancje “lûc difindût”, “cjistiel” o “fortificazion”.
◆ La prime citazion: “in loco qui dicitur Gradisca”, dal 1120, secui prin che Vignesie e decidès di rindile di fat inespugnabile. Jenfri i agns Setante e i agns Novante dal Cuatricent, la Serenissime, che e veve bisugne di frontâ lis scorsadis otomanis, e costruì la fuartece di Gardiscje, cuntun perimetri pentagonâl. Dut câs, al fo un altri nemì a gjavâle vie des sôs mans: tai agns dal conflit di Cambrai, juste ai 19 di Setembar dal 1511, la guarnigjon si rindè ai Imperiâi.
◆ Come ricuardât la volte passade, nancje la faturose Vuere di Gardiscje e servì a puartâle indaûr tes grifis dal Leon di Sant Marc. La svoltade plui impuartante e rivà cuntun altri cjapitul belic distrutîf, che però e incrosà in maniere indirete il destin di cheste part de Contee. Ancje se la esose e infinide Vuere dai Trente Agns e jere aromai daûr a finî, l’imperadôr Ferdinant III di Asburc, che al jere in dificoltâts finanziariis, al decidè di paiâ ae sô maniere un dai siei creditôrs, Zuan Antoni di Eggenberg, membri di une famee stiriane une vore siore.
◆ Dopo vê refudât lis propuestis di Vignesie, che no si jere ancjemò rassegnade, tal 1647 il sovran al separà dal Stât gurizan un dai siei distrets, la Cjapitanie di Gardiscje, elevantle a Contee Principescje e vendintle al nobil nomenât par 315.000 florins. Il zovin Stât al podè finalmentri lassâsi indaûr la ombre des armis e des distruzions, trasformantsi di une citadele militâr funzionâl intun centri residenziâl sontuôs. Chest al fo soredut in gracie di un aministradôr valent: Francesc Uldarì della Torre, cjapitani de Contee te seconde metât dal secul.
◆ Il periodi al fo prosperôs e plen di vite culturâl: i dams causâts de ultime vuere a forin comedâts e a forin fats sù o completâts edificis elegants, sedi pal ûs public, tant che il Mont di Pietât e la Loze dai Marcjadants, sedi chei privâts, tant che il Palaç de’ Comelli-Stuckenfeld e il Palaç dai Torians, il municipi di vuê. Il disvilup nol jere dome urban, ma ancje economic e sociâl: a forin adotadis misuris par supuartâ la istruzion, la agriculture, il cumierç, l’artesanât e parfin la industrie, in mût particolâr tal cjamp de sede.
◆ Ancje se il Sîscent al è ricuardât par solit come un secul di puaretât, soference e stagnazion par tancj Stâts europeans, culì, tal cjanton sud orientâl dal Friûl, fameis e figuris scognossudis de plui part a jerin un fâr di previdence economiche e di buine gjestion. ❚