Fruts come riuçs: dal sut di peraulis ae montane

Par tacâ chest viaç mataran intal mont des peraulis, o vin pensât di lâ a viodi lis definizions peadis a cualchidun che tal principi de sô vite nol fevele: l’om.
◆ Un frutin a pene nassût, di fat, par talian si clame “infante”, dal latin “infans”, li che “fans, fantis” al jere il participi presint dal verp “fari”, ven a stâi fevelâ. La partesele negative “in” denant e marche il fat che nol pues cjacarâ. Come che a savaran ducj i zuiadôrs di cjartis, dut câs, in dì di vuê il “fant” nus fâs pensâ a un che al va a piduline, al contrari dal cavalîr. Chest parcè che la peraule che e significave zovin, in gjenerâl, e je stade doprade vie pe Ete di Mieç pal servidôr (il stes significât dal “boy” inglês), il famei o il garzon (ve li ancje il “garçon” francês), che i tocjave ancje di lâ a pît daûr dal paron a cjaval (che dopo al deventarà “fantin”). Di li, no i è volût cuissà trop par passâ ancje aes trupis dal esercit.
◆ Par inglês, un infans pene nassût al è un “baby” (dal francês “bebè”, par associazion cui prins viers fats), biel che par todesc si dopre ancje il tiermin “Säugling” (frutin di lat, di “saugen”, ven a stâi tetâ, supâ). “Fant”, dut câs, al è restât tal francês (“enfant”), ma ancje tal sloven “fant”, cul sens di zovin e morôs, biel che par furlan o vin “fantat/e” e ancje lis formis “fantacin/e”, “fantaçut/e” o “fantulin/e”.
◆ Il tiermin plui doprât in Friûl, dut câs, al reste “frut/e”, che si puarte daûr dute une simbologjie poetiche e scuasit bibliche (“fructus ventris tui”), ancje se i studiôs nus visin che in veretât une volte il verp “frutâ” al vignive doprât pes bestiis, duncje il frut al jere il piçul dai nemâi, massime des vacjis, che a jerin “frutarolis”.
◆ Altris formis locâls di frut/e a puedin jessi “bambin/e” (cun divignince onomatopeiche, dai viers che al fâs il frut piçul, o ancje dal grêc “bambaino”, o ben “tartaiâ”), “canai/e” (di “canalia”, o ben “un grum di cjans”, par solit doprât par talian cuntun significât negatîf, ma ancje dit par scherç o cun ironie a cui che al fâs dispiets), creature, fiol/e, mamul/e (di frut che al tete e che duncje al è simpri tacât ae mari), nini/e (cjarinatîf, forsit dal latin “minimus”, ancje par toscan o intal spagnûl “niño/a”), pipin/e, pup/pupin (dal latin “pupa”, pipine o frute), puem/e, putel/a (dal latin “putus”, fantacin).
◆ Gjavade vie la dimension romantiche al tiermin “frut”, duncje, ve che o sin pronts ancje par lâ a viodi lis peraulis che a definissin chê che “e puarte” il canai, o ben une femine “intun stât interessant”, ven a stâi incinte o gravide (parcè che la panze e pese, duncje e va daûr de fuarce de gravitât), che par furlan “e spiete”, “si alce il grumâl” o, in sens plui pratic, “e je plene”.
◆ Lant a cjalâ chês altris lenghis, l’inglês al è forsit il plui fedêl al latin, cul tiermin “pregnant” che al ven di “praegnans” (“pre”, o ben prime e “gignĕre”, ven a stâi gjenerâ), biel che par spagnûl o cjatìn “embarazar”, dal verp portughês “embaraçar”, cul sens di “impedî”, ma ancje di “peâ” (di “baraço”, curdele). E je duncje une cierte afinitât cul latin “incingere”, une forme cjatade fûr te Ete di Mieç par dî che lis feminis in chest stât no metevin la cinture, ma ancje cul sens di pesantece e plenece, ricuardât dal todesc “schwanger” (pesant). Par sloven, invezit, si cjate “noseča”, dal verp “nositi” che al vûl dî puartâ.
◆ Magari cussì no, no dutis lis maris che a spietin a rivin dopo a viodi il lôr frutin. In cualchi câs, il part nol va a bon e si à un abort (dal latin “aboriri”, vie dal nassi, duncje murî), li che la femine, par furlan, “e dispiert”. Par inglês o cjatìn la formule “miscarry” (puartâ mâl, duncje pierdi), li che invezit par todesc o vin “abbrechen” (rompisi vie, intal sens di distacâsi).
◆ Par fortune, par solit la gravidance si siere cuntune nassite, e la femine e parturìs, deventant une “puerpera” (di “puer” e “parere”, o ben che e parturìs un frut), par furlan “latoane” (tal sens che e prodûs lat, ma forsit ancje di jet, par vie de cundizion che le puarte a stâ distirade) o “primarole” (se al è il prin part).
◆ Par sierâ, une ultime peraule, che intal mont furlan e à vût une atenzion speciâl. La placente (dal latin “fuiace”, ma di divignince greghe, tal sens che e à une forme scliçade) par furlan (ma ancje par talian e par latin) e vignive clamade “secundine”, par vie che e jere la seconde robe, daspò dal frutin, a vignî fûr dal utar de femine.
◆ E se il frutin al vignive fûr cu la cjamese (intal sac amniotic)? Ben, inalore al podeve ancje nassi “infans”, ma di grant al sarès stât destinât a lassâ dut il mont… cence peraulis. ❚