Fondazion Friûl adun cu la Casse Dipuesits e Prestits par judâ il disvilup des comunitâts

Intervents par che i edificis publics a sedin plui eficients cuintri de straçarie energjetiche, anticipazion des spesis di progjet, jutori par puartâ insom i intervents finanziâts dal PNRR; e ancjemò, rifinanziament par convertî i prestits a tas plui di favôr. A son tancj i imprescj e i servizis finanziaris che la Casse Dipuesits e Prestits e met a pro dai ents locâi ancje de nestre regjon: par ilustrâju la “Cassefuart” dal guvier talian e à inmaneât a Udin un incuintri che al è stât ospitât de Fondazion Friûl, socie de CDP come chês altris fondazions bancjariis.
◆ Te biele sale dal Palaç Antonini Stringher il president de Fondazion Bruno Malattia e il responsabil des Relazions Business PA pal Nord Est talian di CDP Paolo Palmieri a àn fevelât di cemût che la Casse Dipuesits e Prestits e puarte indevant in dute la Italie progjets di interès coletîf e cuntun valôr intrinsic pes comunitâts locâls. Cjalant a dute la regjon, dal 2022 al 2024 la CDP e à judât 100 sogjets, supuartantju cun 90 milions di euros di risorsis. Cun di plui, cul Plan Strategjic 2025-2027, la CDP e je daûr a slargjâ la sô funzion potenziant la sô rêt sui teritoris.  
◆ “Il compit des fondazions bancjariis al è chel di sburtâ la cressite dai teritoris – al à dit intal so salût introdutîf il president Bruno Malattia – e nô lu fasìn cun aleâts impuartants dal sisteme istituzionâl come la CDP. O vin volût ufrî un moment di confront pai aministradôrs e i tecnics dai ents locâi che a cirin imprescj concrets e inzornâts par puartâ indevant miôr i invistiments publics, intun moment dulà che la capacitât di programâ e realizâ intervents di cualitât, in timps sigûrs e cun avonde risorsis, e je une sfide ma ancje une oportunitât gruesse”.
◆ Di bande sô, Paolo Palmieri al à ringraciât “la Fondazion Friûl, che e conferme la relazion salde che si è disvilupade intal timp intune colaborazion continue e zovevule. Chest dialic cuntune realtât presinte e concrete nus permet di realizâ lis miôr cundizions pe cressite dal teritori a nivel economic e sociâl. Come CDP o sin dongje des istituzions locâls te lôr opare di ogni dì, par fâ cressi la cualitât de vite de popolazion”. ❚