A Lui in vot comuns de Cjargne
Si slargje Festival Darte, la manifestazion musicâl dai concierts partecipâts in Cjargne, dulà che la int dal lûc si fâs direte promotore dal teritori, dant acet al public in lûcs sugjestîfs, sedis di concierts e visitis vuidadis. Rivât ae sô seste edizion, il festival inmaneât dal Comun di Darte, cu la direzion artistiche afidade ae flautiste udinese di nomee internazionâl Luisa Sello, al ten dentri altris sîs comuns cjargnei, par une intese che e funzione: Çurçuvint, Paulâr, Tumieç, Trep Liussûl, Sudri, Verzegnis e Zui. Cun lôr ancje la Comunitât di mont de Cjargne, il Comitât di Sant Florean, Carnia Greeters, la Cjase des Arts di Gurize, i Amîs de Musiche di Udin, il Consorzi Turistic di Darte e, dal forest, la innomenade associazion Boesendorfer Wien.
◆ Une rassegne che e cres e che chest an si davuelzarà di sabide ai 5 fin domenie ai 20 di Lui, par un totâl di undis concierts e cinc events colaterâi, tra cjaminadis e visitis in museus e galariis. «Festival Darte – come che nus conte la diretore artistiche Sello – al cjale il non, par furlan, dal antîc toponim comunâl cjâr a Giosué Carducci, e al cjape dentri paîs e borcs des valadis dongje. Il sottitul de manifestazion al è “la aghe e conte”, duncje la Bût e il Cjarsò par prins, che a traspuartaran in sens metaforic e reâl il sunôr di diviersis lenghis e la bielece dai lûcs intune trame di repertoris, musiciscj e grups musicâi che si miscliçaran cu la int dai paîs e des frazions tocjadis. Al è un event partecipât, indulà che i abitants si integrin cui artiscj invidâts.
◆ Il prin apontament al è sabide ai 5 di Lui, aes 21.00 tal Palaç Savoie di Darte, cu la Orchestre di arcs La Sinfonietta dal Friûl, invezit la dì dopo, aes 10.30 inte glesie di Chiusini di Dimplan, e sunarà la arpiste Anna Sofia Didic, vincidore dal premi “Zovins talents”, e daspò si fasarà une escursion, adate a ducj, viers Alzeri, dilunc de Bût, e aes 12.00 si tignarà il conciert inte glesie di San Nicolò cu la promesse furlane Filippo Craglietto, ancje lui arpist.
◆ La seconde part de rassegne e tacarà ai 12 di Lui cu la visite aes 16.00 dal Museu Civic Archeologjic “Iulium Carnicum” di Zui, cun dopo il conciert dal doi “Estroverso e Danza” inte glesie di San Lenart. Aes 21.00 invezit, inte sale polifunzionâl di Sudri, al sarà protagonist il cuartet Athanor Guitar. Il dì dopo, aes 18.00, la sede sielzude e je l’Art Park di Vile di Verzegnis, cu lis “Contis inte ombre” de gjornaliste e docente di storie de art Adriana Ronco Villotta. Aes 19.00 inte plêf di San Martin, e sarà la esibizion dal Extrovert ensemble.
◆ L’ultin fin di setemane di Festival Darte al tache vinars ai 18 di Lui cun doi apontaments inte Galarie di Art Moderne “E. De Cillia” tal comun di Trep Liussûl. Aes 17.00 la visite vuidade ae pinacoteche; aes 18.00 al sarà il moment dal doi flaut e armoniche Filipič-Pechmann. Il dì dopo, intal borc di Castoie dongje Paulâr, al sarà in conciert il doi armonicistic Accordòs e aes 19.00 a La Cjase de Int a Çurçuvint, si esibirà la brilante e zovine violiniste americane Marley Erickson.
◆ Il finâl al è domenie ai 20 di Lui: aes 11.00 visite ai mulins di Dieç e po dopo la esibizion dal armonicist cjargnel Andrea Nassivera, aes 16.00 visite ae cjase museu La Mozartine numar 2 di Paulâr, intal borc San Antoni, e conciert cu la pianiste pluripremiade Tinkara Teinovic e cu la cubie mestri-arlêf Carlo Corazza e Matteo Pettenà. Dutis lis informazions sui programs si puedin cjatâ su la pagjine Facebook “Festival Darte” e sul sît amicimusica.ud.it. ❚