Daspò dal sucès dai oms tal 2024, il sodalizi dal president Daniele Puntel al cîr sodisfazions ancje cu lis fantatis di mister Marco Rossi
Intal 2024, la Associazion Sportive Furlane e à puartât pe prime volte une scuadre di balon, formade di zuiadôrs di lenghe furlane, ae Europeada, il campionât european des minorancis linguistichis ricognossudis intal continent vieri.
La iniziative e je stade une vore preseade di ducj, ancje parcè che il cjapitani Nicola Tonizzo e compagns, vuidâts dai alenadôrs Mauro Lizzi e Devid Trangoni, a son stâts bogns di vinci il titul confrontantsi cuntune vore di aversaris di nivel alt.
◆ Si podarès dî che, dopo mangjât il prin frico, ti ven voie di lâ indenant e, clâr, Daniele Puntel, Gabriele Violino e la clape de ASF a àn pensât di puartâ inte Regjon Friûl-Vignesie Julie la prossime manifestazion, intal 2028.
Otignude la responsabilitât di meti adun l’event, si podevial fâ zuiâ dome i oms? Sigûr che no!
◆ Cussì, di bot, je vignude fûr dal cjapiel di Puntel e Violino la scuadre feminine. O, almancul, la idee de scuadre di meti sù, cu lis diretivis dal alenadôr clamât a vuidâ lis fantatis furlanis: Marco Rossi.
◆ Il progjet, che al è sburtât de Federazion dal Balon, al è stât presentât tal stadi di Udin, inte sale “Alessandro Talotti” dal Comitât Olimpic regjonâl, ae presince di Silvia Contardo, delegade de sezion regjonâl de Leghe Nazionâl dai diletants pal setôr feminin, e di Chiara Dazzan, assessore al sport dal Comun di Udin e, fin a cualchi an indaûr, zuiadore professioniste.
◆ Stant che par fâ une scuadre al covente che la Associazion Sportive furlane e sedi afiliade ae Federazion dal balon, come che al è stât fat pai oms cu la Union di Martignà, ancje pes feminis si è scugnût peâsi a une societât cul codiç de Federcalcio. No podeve jessi nissune altre che il Tavagnà dal president Roberto Moroso.
◆ Un sodalizi che al è stât bon di rimpinâsi intai nivei plui alts dal balon feminin talian, rivant ancje in Champions League. Cumò la situazion e je un tic plui complicade e lis zalis e blu dal Tavagnà e zuin in serie C. Dut câs, la bandiere furlane intal ambit feminin dal balon le àn simpri puartade lôr, par agns e agns, e al è just che la ASF e vedi vude voie di dâsi dongje.
◆ Fondamentâl, in dute la organizazion, la part di Maria Giovanna Vida, bielzà responsabile dal setôr feminin te Associazion Sportive Furlane e presidente dal Udin feminin di balon. Cu la sô esperience e la cognossince dal setôr e sarà un pilastri par dutis e ducj.
Inschiriâ une formazion feminine nol è cussì banâl in Friûl. Massime pensant che la scuadre e scuen jessi fate di zuiadoris che a fevelin furlan: cundizion indispensabile par competi ae Europeada. I numars des frutis che a pratichin il balon zuiât al è simpri plui bas, e lis miôr a son cjapadis daurman des scuadris plui fuartis ator pe Italie. Par dut chest, ancje il Tavagnà al fâs fature a lâ indenant.
◆ Al è par chest che il vice president de clape zale e blu, Domenico Bonanni, vie pe presentazion de scuadre de ASF, al à marcât la impuartance de iniziative: “Masse dispès – al à dit Bonanni –, lis zovinis plui fuartis a son clamadis des scuadris plui impuartantis cuant che a son ancjemò masse piçulis: si sticin ambizions e si nasin pussibilitâts ma, tantis voltis, si finis par fâlis sentâ in bancjute a tirâ sù delusions, e par chest daspò a molin. Mi fâs plasê sburtâ la Associazion Sportive Furlane a lâ indenant cu la iniziative, che e vedi ancje un valôr di promozion par sburtâ tantis di lôr intant a tacâ a zuiâ e daspò a restâ in Friûl e, de bande dal Tavagnà, o din dut il jutori che al covente”.
◆ Metude sù la scuadre dai oms, e inmaneade la formazion des fantatis furlanis, che si cjataran un tic par volte, la Associazion Sportive Furlane e ponte al massim pussibil pal 2028, cuant che la Europeada e rivarà in Regjon. Lâ daûr dai oms di Lizzi e Trangoni, bielzà bogns di vinci, nol sarà facil pes fantatis, massime se si pense che a zuiaran in cjase devant dai tifôs furlans e, sante scugne, un pôc di pression si sintarà.
Dut câs, par dâ ai apassionâts il dret di bati lis mans ancje aes fantatis e, robe che no fâs sigûr mâl, garantî la paritât di gjenar, Daniele Puntel e Gabriele Violino a àn vude la pensade juste. Cumò la bale e passe al alenadôr Marco Rossi che al varà di tirâ sù une scuadre competitive: a son plui di trê agns di timp par cumbinâ. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
Bielzà usât a vinci cu lis feminis: mister Rossi si sente te bancjute de ASF
Dôs copis Italie, un secont puest in serie A e la cualificazion ae Champions League cul Tavagnà. Il curriculum dal alenadôr clamât pe scuadre des fantatis furlanis al è cetant impuartant. Marco Rossi, che di zuiadôr al à cognossût la serie B (Reggina, Spal Salernitana, Ravenna e Pordenon), al è stât une vore preseât cuant che al à lavorât cu la scuadre dal president Roberto Moroso. E i risultâts a disin che la sô esperience no si pues discutile.
◆ La Associazion Sportive Furlane e je lade sul sigûr ancje sul non dal mister in seconde: Alessandro Campi, che cun Rossi al à mateât propit a Tavagnà e al cognòs une vore ben dut il moviment balonîr feminin furlan.
◆“Ancje se a mancjin trê agns ae Europeada – al à dit Rossi – nol è il câs di pierdi timp par meti sù la scuadre. Varìn di scomençâ in curt a fâ une prime selezion, par sielzi lis fantatis che a puedin pandi miôr la identitât tecniche sul cjamp di balon e la identitât furlane, dentri e fûr dal ambit sportîf”.
◆ La prime partide des fantatis furlanis e je a calendari ai 15 di Jugn tal stadi “Enzo Beazot” in Cjampagnuça a Gurize: aversariis a saran lis Ladinis. La setemane dopo, a Sante Marie la Lungje, ai 21 di Jugn, si zuiarà la seconde partide, cuintri la Ocitanie. ❚
::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
Il ricuart di Marie Plozner Mentil: plui di un secul daspò, il balon al met dongje i popui
Il diretôr gjenerâl de Associazion Sportive Furlane, Gabriele Violino, al à fevelât intant de presentazion de scuadre des fantatis furlanis, doprant peraulis che a àn tocjât il cûr di ducj.
◆“Par tancj motîfs – al à dit Violino –, meti adun la scuadre feminine al è un lavorâ intal just. O vivìn intune societât indulà che lis feminis a àn biadelore une posizion di rispiet, ancje intal sport. I timps a son madûrs par cheste iniziative e o soi une vore content di jessi achì a screâ la clape. Daspò che o vin vinçût cui oms, no si podeve meti adun la Europeada 2028 inte nestre regjon cence une formazion feminine, che e sedi ancje jê la miôr rapresentazion de identitât furlane. Pensâ che, dopo plui di un secul di cuant che i Austriacs a àn copade Marie Plozner Mentil, une puartadore cjargnele (feminis che, in mût libar e cun coraç, a rivavin in prime linie, par puartâ ai nestris soldâts di mangjâ, vistîts e munizions, ndr), cumò lis fantatis furlanis a zuin la prime partide di une manifestazion sportive stonfade di internazionalitât, pensade par tirâ dongje lis nazions e i teritoris, cuintri lis fantatis ladinis che a rivin dal Sudtirôl, al è cetant biel e emozionant. Al vûl dî che, di chê volte, o vin fat une vore di strade”. ❚