EDITORIÂL – I profetis a àn simpri reson, ancje se al somee di no

Tropis voltis vino fevelât di profetis? O vin dite cetante reson che a vevin a dissegnâ il Friûl di vuê cul pinsîr di îr. Nol è un câs che si clamin profetis, ven a stâi che a mostrin lis robis prime che a sucedin. I predis di Glesie furlane, i scritôrs e i poetis, ducj a jerin dacuardi che dome salvant la identitât di un popul, chel furlan, si podeve sperâ in alc di miôr pal doman. In plui: dome tignint dûr sul spirt furlan si podeve frontâ la scomesse de modernitât.
Par chest, tancj che a fasevin a pueste confusion tra tradizion e conservazion, tra identitât e razisim, no son stâts a sintîju, anzit ur àn dât cuintri come che a fossin la espression plui rancurose de “jacquerie” o de restaurazion.
Po dopo, cualchidun al fevele di decressite, dut un colp chei stes che a sberlavin cuintri Beline, che i smicjavin a pari Turolt dome cuant che ur faseve comut, si cjatin a fâ osanna ai gnûfs filosofs e al lôr pinsîr.
O sin rivâts al pont che i sorestants talians, par cirî di tirâ fûr un cualsisei ideâl che al movi une sorte di cussience coletive, a àn spindût miliarts pes fiestis de unitât di Italie; che il guvier, par salvâ ce che si pues di chest stât, si presente cu la muse seriose e professionâl di Monti par fâ dismenteâ lis seradis di Arcore e la mangjadorie dai partîts.
Ma i furlans àno di fâsi fuarce cjalant ae storie di Rome, ai gnûfs teorics de economie o aes butadis dai “grilins”?
Nô o vin forsit tal nestri jessi furlans, la pussibilitât, chê tignince, par cjalâ il mont di vuê e cirî di comedâlu un pêl.
Mi visarai simpri di ce che mi à dit une volte Moni Ovadia: «Il Friûl al è un regâl di Diu ai furlans, ma stait in vuaite di no butâlu vie». Ancje i profetis a son un don dal Signôr, ma no son mai scoltâts. Tropis voltis no vino butât vie ce che nus pandevin?
Cumò che a son muarts, al somee che cualchidun al torni a pensâ che forsit a vevin reson, cumò che ancje il Friûl al è in pericul come popul, come istituzion e soredut che i siei zovins a tornin a viodi dongje la strade de emigrazion, cualchidun si impense di chei che a scrivevin: «Cence autonomie, cence autoguvier o sin destinâts a jessi simpri sotans». ■
DREE VALCIC