“Earth Charter” Cjarte de Tiere

Al jere un om siôr, che al leve ator vistût di purpure e di fîl di lin, e al faseve fiestins ogni dì a la grande. Un puar, che al veve non Lazar, si sentave su la sô puarte a cirî la caritât, dut fodrât di plaiis, seneôs di svuarbâ la fam cui vanzums che a colavin de taule dal siôr.
◆ Pe parabule (Luche 16, 19-31) de messe de ultime domenie di Setembar, mi fermi a chestis primis riis par vie che mi somein la imagjin plastiche concrete dal mont di vuê li che ducj o sin dentri, li che lis fuarpiis de disavualance fra siôrs e puars si stan slargjant e al sucêt ce che al è scrit tal vanzeli: A di chel che al à al sarà dât e al varà bondance, ma a di chel che nol à i sarà cjolt ancje ce che al à (Mateu 25, 29).
◆ La miserie tal mont e conte 3,5 miliarts di puars e une tiere di maravee simpri plui ridusude a fogne di scovacis cu la prospetive che dut si consumi tune tragjedie planetarie. No son peraulis mês ma la constatazion di un document che al à ricevût la firme des massimis istituzions e associazions dal mont: “Earth Charter – Cjarte de Tiere”: 16 principis di fonde, 61 articui e une conclusion che e cjale al avignî, UNESCO, Parîs, an 2000”. La “Cjarte” e presente la tiere come cjase di ducj, e va indenant cu la situazion di cumò, e da i principis par une gnove societât e e siere invidant a une culture de tolerance, de no violence e de pâs (http://cartadellaterra.it/). Chest scheme al dîs pôc; bisugne propit cirî il scrit, leilu e meditâlu par capî che al domande une revision radicâl dal nestri mût di vivi. In chest, i dan reson ancje la Laudato sì e Fratelli tutti di pape Francesc. O zonti che noaltris no fasaressin brute figure cu lis publicazions di Glesie Furlane pal nestri popul; a son ben plantadis, une vore claris e atuâls. Ma la int, pocje o tante no sai, e preferìs restâ peade a une sigurece cence fastidis pluitost che riscjâ par un ben di valôr superiôr. Al scriveve Raimon Panikkar: la vere nemie dal om e je la superficialitât. Noaltris o cjalìn però ai grups alternatîfs e aes personis di buine volontât che tal spieli de Earth Charter a scombatin par une societât no postumane ma semplicementri umane.
◆ Il document al segnale ancje la impuartance di fonde des minorancis e chest mi interesse une vore; i ponts di riferiment e il cuadri gjenerâl pai popui minoritaris a son dal dut gnûfs e al è in chest cuadri che, pene il faliment, o vin di logâsi ancje noaltris de tiere furlane.
◆ Fin vuê, dai agns Cincuante dal secul passât incà, a àn cirût di risolvi la realtât di un Friûl minoritari cu lis curis paliativis de politiche dominante, dai partîts, de alte culture locâl e di une religjon di folclôr. Tante o pocje int, no sai, e je de opinion che il popul furlan al è finît e che al tocje dome compagnâlu a une muart dignitose. Nus sbelein disint: i nostalgjics de vilote a son iludûts e fûr des dibisugnis autentichis de cuantistiche moderne, de robotiche, de inteligjence artificiâl. La Cjarte de Tiere, invezit, e ribalte: a son fûr di troi chei che ridusint dut a tecniche a copiin il misteri de nature, a distudin cûr e umanitât, a eliminin il diviers des minorancis.
Il document al dîs che: “La pâs e je il colm des relazions justis cun se stes, cun altris personis, altris culturis, altris vitis, cu la Tiere e il Dut che ancje noaltris i apartignìn” (n. 16 s.).
◆ Cuant che il furlan, tun esam di cussience impegnatîf, al sarà in armonie cun chestis relazions e lis rindarà concretis, alore al sarà une minorance-popul e al podarà judâ altris minorancis a cjapâ flât. Al sarà pront ancje a dâ la sô peraule par meti lis fondis di une pâs juste tal mont.
◆ Jo o puarti stime ae mê int, o ringracii dutis lis istituzions, autoritâts, circui e associazions che si dan di fâ tai paîs, ma pal moment no metarès i furlans a esempli par une cussience-cussientizazion des minorancis. Masse confusion tal nestri cjâf, masse inibîts di patriotisim, ideologjiis, sotanance, religjon di folclôr e soredut ignorance o pocje stime de nestre storie, culture, identitât. Un popul che al è stât ridusût cussì, al devente vitime di se stes: o al cjate in se lis resons e la fuarce di revisionâ l’implant, o al è destinât a scomparî.
◆ Al sarès ancje interessant domandâsi cun ce mentalitât che i furlans a proponin la soluzion dai conflits, ce che a pensin dai armaments, dal rûl dai esercits, in ce posizion che si metin fra agressôrs e agredîts, ce credenziâls che a presentin par voltâ la vuere in pâs e definîsi popul di pâs. La pâs no ven jù dal cîl come une plovisine dolce e lizere, ma bisugne dâle dongje toc par toc cu la buine volontât e il sudôr di ducj.
◆ Al è inutil stâ a spiegâ che ancje il Friûl si cjate in plen tal cambiament di epoche che al sta sucedint, cambiament che al darà la olme di une muse gnove pai popui tal sisteme globâl. I furlans, savint o no, a stan decidint se continuâ a vivi cuntune lôr origjinalitât o scomparî tal nuie dal mâr grant che dut al glot e al nivele. Il Friûl al à une sô storie che o cognossìn: chê di Aquilee, dai Langobarts, dal Patriarcjât, de servitût a Vignesie, de apatie taliane. Si trate vuê di scomençâ un cjapitul gnûf che al à dibisugne, a disin studis de ment umane, di dôs disposizions: desideri e volontât. E conte la parabule dal siôr e dal puar dal vanzeli di vuê che se un nol desidere e nol vûl, nancje un muart risussitât lu convinçarà a cambiâ. Il Friûl al à devant di se il so destin: o lassâsi murî, ce che fin cumò nol è sucedût, o cjapâ in man la situazion. Il “salt, onest, lavoradôr” de retoriche: masse pôc, nol baste e nol risolf. La Earth Charter – Cjarte de Tiere e podarès dânus cualchi consei e slungjânus une man. ❚