Cun caratar e capacitât politiche, il dirigjent
di San Zorç di Noiâr al è stât par 36 agns
intal Comitât regjonâl di canotaç, une dissipline che sot di San Just e je pardabon une religjon
Cuant che un al è bon di fâ une robe di no crodi intun ambient che nol è il so, si dîs che al è bon di vendi glace ai eschimês. Une definizion che si intone une vore ben a Daniele Scaini, furlan di San Zorç di Noiâr, Stele di Arint al merit sportîf dal CONI, dirigjent storic dal canotaç dal Friûl-Vignesie Julie, intune dissipline che, pardabon, a Triest e je come une religjon. Tant che al rivà a comandâ propit il comitât regjonâl, stant in Friûl, e cheste e je une des sôs braùris plui grandis. Vuê al è il so president onorari. Simpri cu la femine, la siore Noela, dongje di lui.
_
Daniele, un furlan a comandâ fra i triestins, inte dissipline plui triestine che e sedi: il canotaç. Cemût sino rivâts a chest?
«Par sigûr al è alc di storic. Par jessi elet, o ai vût 12 vôts su 14: o ai une idee di cui che a jerin i doi che no mi àn dade fiducie, ma no ‘è il câs di tirâ fûr cumò la cuistion. O ai dit che o jeri là par imparâ a fâ canotaç: par mentalitât, intal gno, o soi simpri convint di savê une vore e o ponti simpri il plui pussibil ad alt. Dut câs, bisugne simpri savê a relazionâsi cu la int. O ai tacât intai agns Setante cul DLF, il Dopo Lavoro Ferroviario, sodalizi metût sù di Roberto Ietri e Silvano e Oreste Indri, che daspò al è deventât Cantieri Marina e daspò ancjemò, tai prins agns Otante, al è deventât Canoe di San Zorç. Sul imprin, si faseve ativitât intal puart vecjo di San Zorç, fin cuant che al è vignût Adriano Biasutti a dî che si veve di tirâ sù il gnûf Centri, spindint une vore di bêçs. O jeri zovin e mi soi dât di maravee pe cifre che e coventave. “Se mi dan a mi la metât, le tiri sù jo di bessôl cul badîl”, o ai dit. Al fo gno fradi Adelfi a dîmi di tasê e lis robis a son ladis indenant. A jerin i agns cuant che e je nassude la sezion di canoe, cun Adelfi (cumò conseîr federâl a Rome e par tancj agns dirigjent sportîf massim in Regjon, ndr). Dut câs, la canoe no jere il gno e o soi lâ indenant intal canotaç. Cun Claudio Cristin e Massimiliano Candotti o sin partîts. Intal 1988, in Friûl-Vignesie Julie, la dissipline si faseve dome a Triest, ancje parcè che la federazion internazionâl e je stade metude sù propit a Triest intal 1888, cent agns indaûr, cu la presince di Italie, France, Belgjiche e Svuizare, un svant par dute la citât. Di San Zorç, invezit, o sin rivâts nô e, cun passion e determinazion, cul jutori fondamentâl de mê femine che e jere la vere dirigjente daûr di dutis lis robis, un pôc par volte o sin stâts bulos a jentrâ intal sisteme».
_
E i 36 agns intal Comitât Regjonâl?
«Un periodi une vore biel. La prime volte che o soi lât là o vevi 28 agns. O ai mateât cun int dal nivel di Fabio Vascotto, president dal Pullino di Mugle, che mi stiçave simpri. O pensavi di savê dut di canotaç e di rivâ a insegnâur ai triestins, ma no jere vere. Un an, mi pâr pes votazions dal tierç mandât, mi soi proponût e mi àn dit: “Furlan, mai niente a Trieste” e, chês peraulis, mi àn sustât a lâ indenant, ancjemò plui fuart. Cun me al jere Massimiliano D’Ambrosi (cumò conseîr federâl a Rome, ndr), un zovin dirigjent cun capacitâts parsore de norme, che al pues jessi calcolât il gno cuart fi. Un vulcan di iniziativis: nuie politiche e dut lavôr pe dissipline, pal agonisim, pe promozion dal canotaç. Tantis voltis o jeri jo a tirâlu pe gjachete: no si puedin contâ lis voltis che al telefonave, vie pe gnot, par vê un confront su lis robis di fâ. I risultâts a son sot dai voi di ducj. Daspò dai siei doi mandâts come president, dopo lât a Rome mi à dit che o vevi di jessi jo president regjonâl e cussì al è stât».
_
Il moment plui biel?
«Ducj i cuatri agns dal gno mandât. O vin festezât i 130 agns de fondazion de Federazion internazionâl e, inte gare dal event, o ai domandât ae Federazion taliane di tignî fûr des convocazions i atletis dal Friûl-Vignesie Julie, tant par meti adun une scuadre regjonâl. O soi rivât a tirâ dongje risorsis ancje dal Comun di Triest e al è vignût fûr un spetacul, cul coinvolziment ancje dai atletis cun disabilitâts: cetante sodisfazion. Cun di plui, o soi braurôs di une robe: o ai finît il gno mandât come president cun scuasit 30 mil euros di belanç in atîf pal comitât regjonâl, cence mai lassâ pierdi alc di iniziativis, ativitâts e garis. Une robe che mi bruse? Il fat di vê pierdût la “Esagonâl” in Austrie par doi ponts».
_
Dal 1988 fin in dì di vuê a son vignûts fûr tancj atletis di nivel. Forsit il plui fuart di ducj al è Josef Marvucic, fi di Loredana Taverna (la prime sanzorzine che à vint un titul talian, intal 1982, in cubie cun Marzia Zanon, inte canoe), cumò campion dal mont under 19.
«Josef al è une vore fuart. Dut câs, si scuen fevelâ ancje di Marco Dri, cumò impegnât in Americhe, di Simone Franco, che al à partecipât ae Cope da la Jeunesse. Prime ancjemò o vevin i cuatri fruts, Macor, Zemolin, Schintu e Paulotto, i unics bogns di vinci une gare regjonâl intal ‘cuatri di cubie’ e intal ‘cuatri cence’ cuintri la Lombardie e il Piemont: une robe mai sucedude, prime e dopo di lôr. Ecezionâi».
_
Il svant plui fuart isal che un furlan come Marvucic, nassût a San Zorç, cumò al sedi destinât a jessi un potenziâl campion, denant di tancj atletis triestins?
«Sì. E cumò al è daûr a vignî fûr un altri furlan come Elia Bressan, campion di Italie zovin e bielzà clamât inte Nazionâl taliane. In dutis lis robis che o fâs, o ponti simpri ae colme. O ai un spirt competitîf che mi sburte a bati simpri chel che o ai denant. A San Zorç o ai sustât ducj cu la idee di rivâ a vinci cuintri dal Saturnia di Triest. Al è facil vinci cuintri i plui debii: si scuen bati i plui fuarts par vê fat alc di bon pardabon. In chê volte che, cun Candotti, o sin lâts a Triest a cjoli lis primis barcjis, nus ridevin daûr parcè che si domandavin, denant di ducj, se nô o savevin a vogâ. Vuê si metin a ridi, dut câs o vin tasût e, un tic par volte, o sin rivâts fin ca».
_
Fats 36 agns di dirigjent in comitât, cumò ce sucedial intai 36 che a àn di vignî?
«Viodarìn. Mês indaûr, cuant che no jeri plui president, no mi telefonavin plui tancj di lôr e mi lave ben cussì. Di pôc o soi stât a Gavirate, a une gare nazionâl, cun gno fi. Cun dut che o ai une malatie ai voi che mi frene no pôc, mi è tornât il morbin».
__
Trop grant isal il probleme de malatie ai voi?
«Se no ves vude cheste malatie, o varès finît dut ce che o vevi metût adun. E forsit o rivavi ancje a lâ a Rome, inte Federazion Nazionâl. Bielzà a Triest, la cuistion furlans cuintri triestins e je un cont. A Rome, se un nol è adat, ti mangjin. Dut câs, cul jutori de femine, che mi à sostignût simpri, o soi lât indenant: se no fos stade jê, o varès fat un grum di mancul». ❚
::::::::::::::::::::::::::::::::::::::::::::::::::::::::::::::::::::::::::::
In famee, un derby fis, fra canotaç e canoe.
Une rivalitât simpatiche, dute ‘fate
in cjase’, cun so fradi, so fi e i nevôts
In principi al jere Adelfi cu la canoe e Daniele cul canotaç. I doi fradis a lavin in paralêl, in dôs dissiplinis che si somein, ancje se no son compagnis. Inte canoe si scuen sburtâ la imbarcazion lant indenant, invezit intal canotaç si scuen sburtâle lant par daûr.
◆ Vuê invezit Luca e Samantha, i fîs di Daniele, a son lâts daûr dal barbe inte canoe, ancje a bon nivel. Intant Fabio, chel altri fi di Daniele, e la fie di Adelfi, Grazia, a àn fat canotaç. Dut un miscliçot.
◆ “Une barufe continue – al conferme Daniele –: une barufe buine, sane, dut câs simpri sustade. O ai simpri dit che lôr de canoe no capissin nuie e lôr a àn simpri dit il stes a mi. Di bon che chestis discussions a son simpri restadis dentri dal porton dal centri sportîf”.
◆ Cumò Luca Scaini al è il president de Canoe di San Zorç, clamât doi agns indaûr a cjapâ il puest di Massimo Beggiato tant che massim dirigjent dal sodalizi di Vilegnove.
◆ “Pensait che Lorenzo, il fi di Luca e gno nevôt, ai Zûcs dai Students di chest an al è lât parsore di une barcje di canotaç: miôr no fâ nissun coment, pal moment! Viodìn cemût che i va. La robe plui impuartant al è che al fasedi sport”. ❚
:::::::::::::::::::::::::::::::::::::::::::::::::::::::::::::::::::::::::::::
NO DOME REMSE BARCJIS.
Al è stât ancje president dal balon
di Tor di Zuin
Nol è stât dome president dal comitât regjonâl dal canotaç par un mandât, dal 2020 al 2024, plui cualchi mês cuant che al jere di surogâ Dario Crozzoli, elet a Rome intal 2005, e Massimiliano D’Ambrosi intal 2020, e 16 agns come vice president. Ae fin dai agns Novante, Daniele Scaini al è stât ancje president dal Tor di Zuin di balon.
◆ “O vevin un tabachin in place a Tor – al ricuarde Daniele – e une sere, mi soi cjatât a cene intal istès locâl cun chei de ‘sportive’, intun moment che la societât e jere sot comissariament. Lôr a jerin intune altre taule: dut câs, o vin tacât a fevelâ, mi an incjocât e a cuatri di matine o jeri deventât president. Di balon no savevi nuie: cuant che o soi rivât tal stadi Tonello pe prime volte, o vevin dome cinc zuiadôrs. In cuatri agns o sin lâts sù in Promozion, rivant ancje a meti a puest il cjamp e i disvistidôrs. Un fatarel: jo o jeri president dal Tor e, cu la ativitât di tabachin, o jerin sponsor dal Malisane… Tu capissis che cul sport o sin une famee un tic strambe!” ❚