CULTURE – Simpri mancul libars

Tes ultimis setemanis si è delineade simpri di plui la situazion di crisi che al sta vivint il mont de informazion furlane e ce che si viôt nol è par nuie confuartant. Al somee di fat che la Radio libare dai furlans, Onde Furlane, insiemi a chês altris emitentis privadis di chenti, no sarà plui tant libare di fâ sintî la sô vôs, la nestre vôs.
Sui gjornâi si son letis opinions contrastantis, soredut di bande dal assessôr Molinaro, che al à dineât che a sedin stâts fats dai tais ai finanziaments pes trasmissions in lenghe furlane su lis radios e lis televisions privadis. Di fat, no son stâts scurtâts, ma azerâts. Tal belanç pal 2010 si à tignût dome il cjapitul su lis convenzions cu la Rai regjonâl (200.00 euros) pe produzion di nancje 30 minûts di programs radiofonics in lenghe furlane e invezit pes emitentis radiotelevisivis privadis al è di zero euros.
Lorenzo Fabbro, vicepresident de cooperative di Informazion Furlane, nus à spiegât cemût che e sta vivint cheste situazion Radio Onde Furlane, marcant il fat che «chest vueit intal finanziament pal 2010 al puartarà dal sigûr a fermâ cualchi program par cetant timp» e soredut che «si scugnarà fâ tais sul personâl. Al è cuasi sigûr che cul mês di Novembar nol larà plui in onde, e no savìn par trop, ancje l’unic radiogjornâl par furlan che o vin inte nestre regjon».
Ma pardabon cheste gnove legnade ae marilenghe e je une conseguence de crisi globâl o isal dome un cantin par sierânus la bocje?
«Dal sigûr la crisi economiche no à nuie a ce viodi cul fat che no si met in vore la leç 29/07, une leç che e previôt che, intal assegnâ lis risorsis disponibilis aes emitentis radiotelevisivis, si intervegni in maniere proporzionâl «ae percentuâl di programs trasmetûts in lenghe furlane e a chei produsûts in propri»» al spieghe Fabbro, «intant che pai sogjets che a davuelzin ativitâts cualificadis e continuativis pe promozion e pe difusion de lenghe furlane si ur domande la disponibilitât di struturis stabilis e di une buine organizazion e si proviodin «finanziaments di pueste proporzionâi ae ativitât davuelte»».
Po dopo, al continue Fabbro, «o domandìn dome che si ricognossi la dignitât e la impuartance dal nestri lavôr. Se po la crisi, che nissun al dinee che e sedi, e oblee a fâ dai tais, nol è nuie che al justifichi l’azerament intal 2010 dai fonts. Si trate dome di une cuistion di volontât politiche e, par altri, al baste cjalâ il belanç de regjon par rindisi cont che a son stadis fatis des sieltis avonde claris e che no si pues platâsi daûr de crisi».
Vêso mai cirût stradis alternativis par jessi mancul condizionâts dai sôi finanziaments publics?
«Sigûr, dome che bisugne ricuardâ che Onde Furlane e à sielzût di jessi une radio comunitarie e no comerciâl par jessi plui dongje dal teritori e de societât furlane, che si pant par mieç di prodots di informazion, aprofondiments, culture e trasmissions di servizi, ma che e oblee a produsi di bessôi la plui part dai programs, e a vê une cuote limitade di publicitât».
«La stesse Regjon e veve fate buine intal 1999 une leç che e dîs che il 50% de publicitât e des comunicazions di servizi de Regjon e dai ents che i son leâts al à di lâ aes radios comunitariis, ma di râr si vise di metile in vore» al fâs presint Fabbro.
«Onde Furlane e je restade un dai ultins mieçs di informazion indipendents che a sorevivin in Friûl e che la lôr gjestion no je tes mans dai grancj grups editoriâi» al siere Fabbro, zontant che in cheste situazion di emergjence si studiaran formis straordenariis di finanziament; par scomençâ, cul conciert dai 9 di Otubar dulà che i tancj amîs de Radio a puartaran il lôr supuart a la «onde libare».
Venusia Dominici