Cuant che i furlans a sledrosin il Paradîs a fuarce di blestemis

Fabula fertur: l’Homo Furlanus al è un che al dopre un lengaç crût e sclet cuintri Diu, sô Mari e ducj i Sants. Ma propit ducj i Sants dal Paradîs, cjapant dentri ancje la Biele Stele, par citâ une preiere famose. Che pe ocasion e ven savoltade, sledrosade e ribaltade, propit come che si fâs cuant che si blesteme. Cualchidun al à za dimostrât ben che si trate propit di une gramatiche lineâr, tal sens che e smicje simpri ben l’obietîf de Tiere al Cîl, cence falî mai il colp, cjapant a clapadorie specifiche ogni figure de Religjon uficiâl, e no dome intal lûc designât par ecelence, ven a stâi la ostarie, là che e je propit une bombardarie continue, cu la complicitât dal grât alcolic dal vin e de sgnape. Parafrasant Dante, si podarès sostignî che al baste un “mieç tai”, e nol covente jessi “intal mieç”, par sbrissâ dentri dal scûr di chel Bosc scûr che al puarte dret intal font dal Infier. Disìn che ogni moment al pâr bon par pandi cheste sapience blasfeme, e la esplosion e devente un fûc di artifici, cence remission e cence polse verbâl. Ancje la “Foemia Furlana” no je di mancul dal Om, dome plui zentîl, forsit plui fantasiose. E propit chest al è il pont. Si trate di un stereotip condanât di chei che Furlans no son e no rivaran mai a capî il significât simbolic e antropologjic di une costumance ancestrâl tant che cheste, che e meretarès un aprofondiment sociologjic, sociâl, storic e culturâl. La ricercje e meretarès un studi aprofondît e ancje une sô publicazion. Ma o dubiti che cualchi editôr al sedi disponibil. Dut câs noaltris o provarìn a fâlu, intal spazi curt di cheste rubricute! Sperant di no jessi scomunicâts dal dut, dal moment che aromai o sin bielzà su la buine strade. Scomencìn des fondis, dal principi.
◆ La Biblie nus conte che cualchi volte “Diu al duar” (Re, 18,27), ma al pues simpri dismovisi. Par cheste reson cualchi volte bisugne berlâi daûr, cun vôs fuarte, decise, ancje rabiose. Cussì “Diu indurmidît”, doprât cun grande intensitât dal Profete, e podarès someâ cuasi une imprecazion, invezit e je dome une preiere. E grande ancje, plene di intensitât e fuarce mistiche. David Maria Turoldo, subit dopo dal Orcolat dal 1976, al intitulave un so famôs editoriâl propit doprant la stesse rabie, su lis colonis dal “Corriere della Sera”. “Diu indurmidît”. Par furlan. E al precisave che no jere une blesteme, ma une invocazion al Signôr par che si dismovès, propit cuant che lis maseriis a sepulivin il so Popul. E cetantis voltis, intal Mâl universâl o fra lis nestris disgraciis familiârs e personâls, no vino alçât i voi ad alt berlant inte stesse maniere? Magari ancje cence proferî peraule, tal cidinôr de nestre disperazion! Chê invocazion e devente un rivoc che al sgorgole dal sanc torgul e neri dal marum, une domande di jutori, di salvece intal moment dal bandon e de miserie esistenziâl e umane. Une forme altissime di bisugne spontanie di cjatâ cualchidun che ti scolti. Ancje sdrondenantlu par che al vegni jù dal Cîl ae Tiere, dongje di nô, par capînus e magari fânus un cjarin. Duncje chê li e podarès jessi lete come la mari di dutis lis blestemis. Che par altri a vegnin censidis in forme uficiâl dai Statûts Antîcs Furlans, là che la norme su la imprecazion cuintri il Paradîs e siei abitants e je simpri la prime di dute la racuelte. Significative come posizion di preference, no mo? Cuant che si da un grant rilêf a une norme, par solit al vûl dì che je dismenteade o contradite.
◆ Lis blestemis a vignivin tassadis cuntune tarife precise, daûr de gravitât, segnade dal “destinatari”: plui alte la multe se la interessade e jere la Vergjine, plui economiche se une Sante di seconde o tierce categorie. Mi domandi cun cuâl criteri che a sielzessin se e valeve di plui Sante Sabide o Sant Zuan.
◆ Ma in cualchi document no si fâs diference, e il motîf nol è religjôs, come che si rive a intuî subit, ma pluitost utilitaristic. Par esempli, intai Statûts di Buie si proclame: “Par che il non dal Diu onipotent e di sô Mari Gloriose a sedin onorâts cul rispiet religjôs che si comande, o ordenìn e o fissìn che se cualchi abitant di cheste Comunitât di Buie e des Vilis sogjetis al so podê al ves di blestemâ il non di Diu o de Gloriose Vergjine Marie o di cualsisedi altri Sant o Sante di Diu, al paiarà cuatri Marchis di monede aquileiese ae Fabriche de Glesie Venerabile di Sant Laurinç”. Duncje il profit des blestemis al coventave ae Comunitât par fâ oparis di ben o di utilitât publiche. Adiriture par custodî capelis, convents, plêfs, come in chest câs. Cualchidun al dîs che la sioretât di cualchi Comun si spiegave pe grande consistence des jentradis! E che i blestemadôrs a jerin i contribuents plui gjenerôs. Su chest no crôt di vê dubis. Ancje gno nono al predicjave simpri: “Visiti, Agnul, che lis glesiis no vegnin sù cu lis preieris dai predis, ma cu lis blestemis dai muredôrs!” Ma provìn a sburtâsi ancjemò un pôc plui indevant. In Friûl la imprecazion e devente cuasi une espression di fantasie. Une cromie vivarose, che e passe l’eufemisim, che al sa di ipocrisie, e che al devente pluitost virtuosisim, soredut se al sbrisse fûr dai lavris des feminis. La liste e je lungje, ancje masse, impussibil fâ un censiment complet: canarin, crostul, gjat, pavee, bultric, budiel, cai, snacai, pote, dordel, passar, faìne, bilite, spongje, missete, plevan… In timps plui dongje dai nestris ancje “triestin”, par no scomodâ i animâi de stale e dal cjôt, apelatîfs che a sunin plui grivis inte dimension dal riviel Uman cuintri dal Divin. E facil ancje plui scontâts.
◆ Ae liste si podarès zontâ ancje une “cernicule” tal puest de “cereole”. In chest câs la assonance e je plui intrigose e salacor sielte di pueste dal so prin creatôr. Come che ognidun al pues judicâ, no si trate di spirt contrari ae morâl religjose, ma pluitost un esercizi di associazion libare des ideis, e chê costumance cul Sacri che noaltris Aquilegenses o vin simpri mantignût. Come la storie che mi contavin di piçul: di chê femine che e domande une gracie ae Madone, e il Bambin Jesù al insist che no, che no si pues. Ae fin la femine, rabiose, i mole un pataf al frut e e zonte: “Tâs tu, che o stoi fevelant cun tô Mari!”. Cheste, ae fin, e je la gramatiche. E mi pâr che il so significât plui profont al sedi propit une dimension “rusticane” e familiâr de Fede. Par la cuâl, cuant che si vuelisi ben, al pues simpri scjampâ cualchi “porco”. Ae fin si fâs simpri la pâs. Amen. ❚