Il gnûf simbul de Comunitât dai talians in Slovenie

O jerin ai 15 di Zenâr dal 1992: Slovenie e Cravuazie come Stâts indipendents a jerin a pene ‘nassûts’. A son passâts 33 agns, la Jugoslavie no esist plui, magari cussì no la situazion politiche e sociâl dai Balcans di soreli a mont no je inmò trancuile e definide dal dut. Une comunitât che e à simpri patît il fat di jessi minorance (cun di plui dividude in doi Paîs; in trê, se o tignìn cont ancje de piçule rapresentance tal Montenegro), che si è simpri messedade par fâ valê i siei dirits tai rapuarts cu la maiorance e i orghins di guvier locâi e statâi. Tal Zenâr dal 1992 al fo firmât un memorandum par une intese tra Italie, Slovenie e Cravuazie in maniere di protezi la minorance taliane. Par dî il vêr, chest acuardi al fo firmât e fat bon dome de Italie e de Cravuazie; a chest si è zontât ancje un acuardi bilaterâl tra chescj doi Paîs, jentrât in vore tal Novembar dal 1996.
◆ Intes ultimis setemanis, i rapresentants des passe 50 Comunitâts sparniçadis tai doi Stâts si son cjatâts par stabilî cuale politiche uniche cjapâ par fâ valê ad in plen il tratât trilaterâl aromai ‘storic’. I obietîfs plui impuartants a son chel di vê sigurece economiche cun finanziaments fis an par an di bande dai Guviers centrâi e po la pussibilitât di ricevi il segnâl di Radio e TV Capodistria in dute la zone bilengâl dai doi Paîs. I esponents des Comunitâts si son cjatâts adun a Cjaudistrie par tornâ a inviâ lis tratativis par rivâ adore a vê un tratament dal dut avuâl di ca e di là dal confin.
◆ Ancje se il memorandum dal ‘92 nol è ancjemò stât fat bon des autoritâts di Lubiane, a son rivadis par intant buinis gnovis sul cont dai finanziaments pai Comuns slovens li che a son ricognossudis lis minorancis taliane e ongjarese. In dut a son rivâts 2.373.366 euros, di dividi tra lis dôs realtâts, vâl a dî cuatri Comuns de cueste adriatiche e cinc al confin cu la Ongjarie. La leç e dîs che il 0,15% dal totâl des risorsis destinadis dal Guvier centrâl a ogni Aministrazion comunâl al sedi zirât aes Comunitâts des minorancis tant che contribût anuâl a pro de tutele des lôr lenghis, culture, tradizions e par cualsisei iniziative par sostignî e valorizâ la realtât des minorancis. Alc al è alc, la bataie pai dirits e va indevant. ❚