CJARGNE. Darte e la Cjargne. Viodudis di Mauro

Mauro Löwhenthal al è un gjestôr di albierc che di cuant che al veve pôcs dîs di vite al à tacât a respirâ l’aiar di Darte, cuant che i gjenitôrs a àn decidût di molâ Triest par meti in pîts un albierc a Darte. «Mê mari e diseve simpri che la stagjon e tacave cui 8 di Lui e e finive ai 24 di Avost a Sant Bortul. La setemane dopo si sistemave l’albierc, o lavin in feriis par 15 dîs, e cui prins di Otubar o scomençavi scuele. Di Invier nol jere nuie, e mê mari e gno pari a àn pensât di fâ istès alc pe int metint in pîts seradis di bal. Si balave ogni sere dut l’an, par 30 agns: si tacave aes vot sore sere e ae une di gnot si sierave. Aes 2, mê mari e tirave fûr la butilie di spumant e si faseve un brindis ducj insiemi parcè che la int e saveve divertîsi di plui di cumò. In chei timps tu vevis 1.000 presincis intun an, se la stagjon e lave ben. La int che e vignive tu le viodevis zirâ ancje parcè che no jerin trops mieçs publics e no podeve movisi trop. Vuê, invezit, il numar di presincis al è plui grant ma no si note. Lis personis a tindin a vignî dome a durmî e vie pal dì a cjapin la machine e si movin. Al è cambiât dut. Mi tocje ancje fâ itineraris di ce che a puedin lâ a viodi. Purtrop, si disin ancje robis no veris su Darte, che al tocje meti in clâr. Soredut cuant che si fevele di numars. Par esempli, jo tai mês di Fevrâr, Març, Avrîl, Mai e Jugn o ai vût cirche 3.000 presincis in albierc. Tai agns ’60, chescj numars a jerin un sium!»
Darte e à pierdût di cuant che a son finîts i turiscj mandâts dal Ministeri (e a chei timps, lis presincis a jerin sù par jù su lis 120.000) ma «l’an passât o vin vût 60-70.000 di lôr. Ciert, a Darte a son tantis robis di sistemâ… Lis termis a àn di jessi cjapadis sù dal Comun ma supuartadis de Regjon. O sin daûr a lavorâ ancje nô gjestôrs di albiercs par jentrâ inte societât GIP che e gjestìs lis termis di Grau e di 40 agns l’87% dai bêçs de Regjon. Se a sostegnin par milions di euros lis termis di Grau, parcè no ancje chês altris piçulis come Darte? Sperìn di rivâ insom.»
Mauro, cul timp, al è ancje deventât un cognossidôr di jerbis, di foncs e di storie de Cjargne, e chest so savê lu met a disposizion de int «O ai int che e ven di dut il mont e che mi dîs che culì si sta benon. O vin Trentins che mi disin che il bosc che o vin nô, lôr sal insumiin! Di fat, nô o vin cuasi 6.000 sortis di plantis e a Darte a son cuasi dutis. In Trentin, 2.500. O vin ben robis di valorizâ!» ❚
✒ Marta Vezzi