Interviste a Camilla Tuccillo, fondadore
di une realtât che e ten dongje i fantats
di Tarcint cun cors e laboratoris
‘Casa Langer’ e je stade inaugurade tal mês di Setembar dal 2023. Cualis sono lis sôs impressions su chest prin an e mieç di ativitât? Che nus conti lis iniziativis plui impuartantis che o vês puartât indenant in chescj prins timps.”
“Par gno cont, “Casa Langer” si è disvilupade avonde ben; cundut che e je une realtât piçule, lis relazions che a son nassudis tra i siei mûrs a son significatîfs e di grant valôr.
Tra lis tantis iniziativis che o vin presentât in chest prin periodi (cors, laboratoris, leturis di grup, ativitâts ricreativis par adults e picinins, incuintris di aprofondiment di tematichis diviersis di atualitât), par me e merete nomenade la scree di une ativitât di doposcuele indreçade ai fantats des scuelis mediis di Tarcint.
A sugjerî cheste ativitât a son stâts i gjenitôrs dai arlêfs, e la sô ativazion si è podude fâ ancje in graciis di un contribût de Fondazion Pittini.
Cussì, par trê dopomisdîs par setemane fin aes cinc, o condividìn la sede di “Casa Langer” cun chescj fantats, judantju intai compits di scuele ma ancje dantjur la pussibilitât di espression midiant di ativitâts ricreativis, tant che leturis di grup e dissen, dongje di tancj confronts par che a sbrochin i lôr pinsîrs e lis lôr personalitâts.
Fin cumò i fantats che a partecipin al doposcuele a son stâts trê, ma di Setembar indenant a saran sîs, numar che al podarès cressi ancjemò di plui intai mês che a vegnin.
Il valôr principâl di cheste iniziative al è rapresentât dai leams che a nassin in maniere dal dut spontanie; i rapuarts tra i fantats, ma ancje chei tra i fantats e i adults estranis ae lôr famee.”
__
“Cualis ideis e progjets vêso in program pes setemanis e pai mês che a vegnin?”
“Cumò o stin puartant indenant cors e laboratoris. Intal Setembar dal 2024 o vin inviât un apontament mensîl di laboratori, intitulât “drink&paint”, par imparâ la piture cun colôrs acrilics, e al è daûr a cjatâ un bon acet.
◆ Dongje di chest, si son disvilupâts incuintris di leturis di libris ilustrâts, indreçâts a partecipants di etât adulte, che si tegnin une volte al mês. Dilunc di chescj apontaments, i libris si doprin tant che imprescj di condivision e di discussion su temis varis: nol è un cors struturât, ma une ocasion par “vivi” i libris cence dibisugne di lâ daûr di schemis prefissâts.
◆ Une altre iniziative che i ten tant a evidenziâ, e je la ativazion, fate tra Zenâr e Fevrâr dal 2025, di un sportel di scolte par feminis in dificoltât.
A stâ daûr di cheste ativitât o sin un grup di siet volontariis che, a turni, e dome daûr apontament, si interessin di cjatâsi cun chestis feminis te nestre sede par scoltâ la lôr storie e dâur informazions utilis su lûcs presints sul teritori di contatâ par podê otignî un jutori concret.
◆ O vin inmaneât une zornade ecologjiche ai 26 di Avrîl stât, dedicade ae Zornade Mondiâl de Tiere. Cui 3 di Mai al partirà un cors di acuarel naturalistic, intant che sabide ai 10 di Mai si tignarà invezit pe prime volte un laboratori par fâ un zûc olfatîf par cjans, che dilunc di chel o fasarìn zûcs educatîfs di problem solving e di ativazion mentâl, vuidâts di une esperte dal setôr.
◆ Un altri progjet che mi sta tant a cûr al è chel de istituzion di un centri estîf intal Comun di Taipane: e je une novitât assolude pal paîs.
A puartâ cheste propueste e je stade une mestre dal lûc. In graciis de colaborazion cul Comun di Taipane e cu la associazion polisportive, o vin podût organizâ, dal 1n ai 5 di Setembar, un centri estîf pes scuelis elementârs, progjetât dal dut di nô di “Casa Langer”.
◆ Chestis zornadis a saran dedicadis a escursions, laboratoris, zûcs, ativitâts indreçadis plui che si pues a valorizâ il teritori, la nature e il paîs in se. Par nô e je une iniziative impuartante ancje a nivel simbolic, stant che e je une azion che e vûl judâ e puartâ atenzion suntune piçule realtât locâl.” ❚
