Aziendis in crisi, ma lis ecelencis no mancjin

Intant che si preparisi a sierâ un an di dificoltât pal setôr metalmecanic al è, par fortune, cui che al sfide la crisi e, in cuintritindince, al assum personâl cualificât.
IL AUTOMOTIVE LIGHTING di Tumieç, la realtât ocupazionâl plui imponente de Cjargne a vuê cun plui di 900 dipendents, dal mês di Setembar e à incressût i turnis di lavôr, passant di 18 a 21 turnis. La decision e je il risultât di un acuardi sindicâl tra lis Rapresentancis Sindicâls Aziendâls de FIM-CISL e la Direzion Aziendâl di Tumieç.
Chest risultât impuartant al è la conferme che il lavôr fat fin cumò in tiermins di turnistiche, di stabilizazion dai lavoradôrs e, plui in gjenerâl, di percors condividûts e concuardâts tra la aziende e i rapresentants sindicâi a son daûr a puartâ gnûfs invistiments de bande dal Grup. Robe, par altri, za sucedude intal 2013 cun ricjadudis ocupazionâls pardabon buinis par un teritori no tant siôr di ativitâts produtivis.
L’implant di Tumieç al è stât viert intal 1969 e al è cognossût ancjemò, ai plui, tant che Seima, la sô denominazion origjinarie.
Dal 2000 al è il centri di ecelence di Automotive Lighting, societât dal grup Magneti Marelli, pe produzion di ferâi posteriôrs (lûs pes machinis pes plui grandis cjasis automobilistichis mondiâls).
Intun unic comprensori, el cjape dentri l’implant, il centri di ricercje e di disvilup, il centri di ricercje plast-optica e la oficine pe produzion di stamps.
Di dut chest al beneficie ancje l’indot. A son numerosis, di fat, lis aziendis dal Tumiecin, e no dome, che a lavorin e che a dan ocupazion in graciis de esternalizazion di cualchi component de produzion Automotive.
Nô de FIM-CISL si sin batûts pai gnûfs invistiments e par altris assunzions. Par otignî dut chest o vin garantît, cun previdence, la flessibilitât necessarie. Naturalmentri, guviernade! E i risultâts si viodin.
L’ Automotive e je une Aziende che, in timps di crisi gjenerâl, e à savût rilançâsi e cressi in maniere fisse, pontant su la cualitât dal prodot e acompagnant i propris dipendents a un grât di professionalitât simpri plui alt.
La formazion continue dai lavoradôrs e je e e restarà un obietîf prioritari che nô de FIM-CISL o perseguirìn ogni dì intes aziendis. O sin, di fat, convinçûts in maniere ferme che il fatôr cualitât al rapresenti un vantaç competitîf insostituibil. Dome cuntun personâl formât di un continui si puedin vinci lis sfidis che il marcjât globâl nus met devant ogni dì.
Cheste grande realtât produtive, l’Automotive, e je li a dimostrâ che la Cjargne e pues jessi une zone trative par chei insediaments industriâi tant necessaris par dâ un futûr ocupazionâl e di benstâ a dute la comunitât. ❚
Giorgio Spelat, FIM-CISL Provincie di Udin