Avostanis al va “Oltris”

Par cambiâ il Friûl, e magari ancje il mont, al covente lâ “Oltris”. Al è chest il titul de stagjon 2025 di Avostanis, la manifestazion che la Associazion culturâl Colonos APS e à za puartât indevant par 33 voltis a Vilecjasse di Lestize.
◆ Par fâ 34 Federico Rossi e la so scuadre a àn metût dongje un program di gale, che si ispire ae poesie di Tito Maniacco, che al clamave Oltris, “il plui biel paîs dal mont”, par chest non che al rimande ae necessitât di scjavaçâ confins, lâ indevant viers dal orizont. Come che al à fat Rodolfo Kubik, autôr di “Furlans pal mont”, comedie musicâl in 3 ats che e à screade la rassegne: il progjet, organizât de Associazion Armonie APS dutun cul Centri Studis David Maria Turoldo, al è lât in sene a Lui sot la direzion di Leonardo Grimaz.
◆ Ai 29 di Lui, a son rivâts ai Colonos i RadioZastava, un coletîf unic tal variegât senari da lis bands europeanis dal back-ground etno-balcanic, che al mostre di jessi la miôr espression de Gurize multiculturâl e plurilengâl e al à fat tournée dapardut in Europe montant sul palc cun artiscj di innomine mondiâl come Kultur Shock, Boban Marković, Emir Kusturica & The No Smoking Orchestra, Modena City Ramblers e tancj altris.
◆ Ai 2 di Avost il program al previôt “Cjantade pal Cid. Slançs di libertât pai dîs ch’a vignaràn” cun Danilo De Marco, Angelo Floramo, Massimo Somaglino e la musiche di Paolo Forte e Nicoletta Taricani, lis vôs di Caterina De Biaggio, Michela Franceschina, Chiara Di Gleria: un spetacul par contâ telis di dubis, di reminissencis, di ricuarts, di emozions.
◆ Furtis emozions ancje ai 7 di Avost cun “Lingua mater”, documentari di Massimo Garlatti Costa che al esplore i sentiments leâts a la lenghe mari da lis personis e a la lote da lis comunitâts par la sorevivence da lis lenghis minoritariis, chês leadis al afiet, lant daûr da lis rotis comerciâls da lis nâfs grandononis che a scjavacin mârs e oceans e a coleghin puarts e popui: al pant il grant pericul di omologazion o scancelazion che dutis lis lenghis, plui piçulis o mancul, a son daûr a frontâ in chest moment storic, intun mosaic colorât di intervistis e emozions cjapadis sù in sîs agns di ricercjis e viaçs – da l’Europe a l’Afriche e al Sud Americhe. Il viaç al finìs a Buenos Aires, intune comunitât cetant piçule ma cetant ative di furlans ch’a cirin di mantignî vive la lôr lenghe e la lôr culture.
◆ Ai 13 di Avost il diretôr de Arlef William Cisilino al presentarà in dialic cun Paolo Mosanghini “Ognun al bale cun sô agne”, cun leturis di Paolo Mutti e pipins dal vîf di Daniel Cuello. Chest gnûf libri, ch’al rive dopo “O sin dal gjat” e “Mi capìs ben me”, al è un viaç tal cûr dal Friûl, midiant da lis peraulis che lu rapresentin. Cisilino al à metût adun un piçul “manuâl di istruzions” sul Friûl di vuê te sô realtât sociâl e antropologjiche, cuntun voli fis ae fuarce evocative de sô marilenghe.
◆ Ai 19 di Avost, al larà in sene l’adatament di “Strumîrs e zambarlans” di Alviero Negro pe regjie di Ferruccio Merisi cu lis musichis di Marco Maiero per produzion dal Teatri Stabil Furlan. La rivolte plui popolâr e tragjiche dal Rinassiment talian, che e je jentrade te storie come la “crudel zobia grassa” dal 1511, e ven contade intun test dulà che a son contraponûts la classe nobiliâr e il sotproletariât rurâl. Di une bande, a vegnin analizadis lis tramis dal podê nobiliâr tal contest aministratîf e ta la temude situazion di pericul par la invasion foreste, di chê altre si evidenzie cemût che lis personis a restin esclududis da la storie, patint forsit nome lis consecuencis.
◆ Ai 23 di Avost, te Sale consiliâr di Aquilee al sarà presentât un libri ilustrât su lis ricercjis storichis di pre Gilberto Pressacco di Fiorenzo Innocenti cu la traduzion furlane di Gotart Mitri. Si clame “La gnot di Maqor” e a presentâlu a saran Stefano Montello, pre Romano Michelotti e Federico Rossi. Cheste gnove “graphic novel” e conte une storie inceose, rivant a descrivi cun rigôr storic e teologjic, e tal stes timp cun estri creatîf, i risultâts da lis atrativis ricercjis fatis di Pressacco su la straordenarie origjinalitât da la primitive glesie di Aquilee. La conte e aurìs intun materiâl interdissiplinâr e magmatic che, dutun cui studis di Guglielmo Biasutti e Renato Jacumin, al à marcât un cambiament di paradigme ta la comprension da lis lidrîs storichis furlanis e ta la percezion di un sens gnûf di identitât.
◆ Ai 27 di Avost, “Une tiere par tantis vôs”, conciert cul côr “Le cicale” cu la direzion di Giuseppina Casarin e la colaborazion di Valter Colle.
◆ Ai 30 di Avost, il classic apontament cu lis “Provis viertis di culture furlane” par cognossi ideis gnovis, creativitât, ricercjis e sperimentazions in divignî. Ai 4 di Setembar, escursion storiche a Gurize capitâl europeane de culture cun Hans Kitzmüller, Andrea Bellavite, Maria Chiara Visintin, Marco Grusovin, ae scuvierte dal ideâl european atuâl di une culture multilengâl.
◆ Ai 6 di Setembar, si davuelzarà la cuinte edizion di “A brene vierte”, par cure di Michele Bazzana h 8.00.
◆ L’event al vignarà documentât a traviers di un video cul DVD di pueste, che la presentazion uficiâl si le fasarà ai 25 di Otubar li da la Galarie regjonâl di Art contemporanie Luigi Spazzapan a Gardiscje dal Lusinç.
◆ Ma prin, domenie ai 5 di Otubar, segnaitsi la date; tal dopomisdì si davuelzarà “Stin dongje ae Patrie”, une fieste cun buine musiche, performances creativis e cualchi utile riflession. E sarà une ocasion di incuintri e di scambi di esperiencis tra associazions e personis impegnadis pal avignì de nestre tiere, e soredut une ocasion par cjatâsi cui nestri letôrs: us spietìn… ❚