Autun, stagjon di ploiis e montanis, fueis e cjastinis

L’Autun meteorologjic, tacât cul prin di Setembar, al è une stagjon di transizion, tant che la Vierte. La esposizion dal nestri emisferi ai rais dal soreli e va in mancul, il pôl nord si disfrede, il contrast termic cu lis zonis tropicâls al devente plui marcât e lis instabilitâts a cressin. La Sierade e je simpri stade e e je, in Friûl, la stagjon cun plui ploie, cun valôrs medis di 150 mm al mês a Udin e di 400 mm al mês a Musi (pont plui ploiôs de Europe) jenfri il 1991 e il 2020. Cetantis des grandis montanis sul Friûl a son vignudis vie pal Autun: tra lis plui impuartantis si puedin ricuardâ chê dai flums Cuar, Cormôr, Tor e Nadison dai 20 di Setembar dal 1920 e chês dal Tiliment dal 2 di Setembar dal 1965 e dai 4 di Novembar dal 1966, chê dai flums dal Friûl ocidentâl dai 24 e 26 di Novembar dal 2002. Une ecezion notevule e je la montane de Valcjanâl dai 29 di Avost dal 2003, che però e à vude une gjenesi di raritât estreme, leade ancje al grant cjalt di chel Istât. Ancje la aghe alte, fenomen causât de cumbinazion de alte maree cui aiars meridionâi e salacor cu la ploie, e tint a jessi plui frecuente vie pe Sierade sedi a Vignesie che a Grau.
◆ La Sierade e jere ancje la stagjon che e tacave a puartâ nêf su lis monts. Al sucêt ancjemò (la ultime volte ai prins di Otubar di chest an) che aiar frêt polâr al rivi adore a jentrâ sul Friûl vie pal Autun e a menâ nêf, ma aromai e je nêf svoladie, che no rive adore a tacâ a fâ sù la coltre invernâl, magari cussì no.
◆ Cun di plui, Setembar al somee simpri plui a un mês estîf, cuntune temperadure medie passade dai 18.5°C dal trenteni 1967-1996 ai 19.3°C dal 1991-2020. 
◆ Se o volìn capî cemût che al sarà l’Autun di doman, al vâl il stes discors fat pe Primevere intal numar di Mai: stant che lis stagjons a son guviernadis de posizion relative de tiere e dal soreli, si varà simpri il passaç di une stagjon plui cjalde a une plui frede, e chest passaç al continuarà a jessi l’Autun. Dut câs, il pas di chest passaç nol sarà chel che o jerin usâts a viodi: par esempli, lis fueis a colin simpri plui tart dai arbui, tant che l’innomenât foliage newyorkês si è movût indenant di une setemane rispiet ae metât dal secul XX. La musiche dal Autun, duncje, e larà indenant a sunâ, ma la sincronie dai siei struments e sarà rote. Un câs emblematic al è chel de vendeme: secont il “Studio conoscitivo sui cambiamenti climatici e di alcuni loro impatti in Friuli – Venezia Giulia” dal 2018, pe fin dal secul la vendeme e podarès colâ jenfri la metât di Lui e i prins di Avost, gjavant ae Sierade un dai siei rituâi plui carateristics. ❚