AUSTRIE. Kaufhaus Österreich

In Austrie la sierade pal Covid e je stade dispietade tant che la nestre, ma ve che un paîs civîl e evolût al à cirût di dâur un jutori ai citadins pe lôr clausure. Il guvier austriac, dutun cu lis cjamaris di cumierç, al à metût sù un vêr centri comerciâl virtuâl, il “Kaufhaus Österreich” (o ben “Grant Magazen Austrie”), un portâl online che dutis lis buteghis a podaran vê man. Idee bielonone, se o cjalìn che ca di nô a son areis (pensìn dome ae Cjargne) là che nol esist un supermarcjât che al puarti la spese in cjase dai clients! E ancjemò plui biele, tignint cont che la intenzion e jere ancje chê di judâ lis ativitât comerciâls intun moment une vore imberdeât. Cun di fat, tant che o vin za pandût, cualsisei buteghe sul teritori e pues fâ part dal portâl e proferî la sô marcjanzie online.
◆ Par comprâ alc, il procediment al è cetant sempliç: marcâ la categorie produtive, cjatâ la buteghe locâl, ordenâ la marcjanzie… Epûr, al somee che nol sedi lât dut pe miôr. Ben clâr che la cuistion e je stade cjatade une vore positive dai austriacs, che a àn provât daurman a fâ un zîr in chest centri comerciâl. A àn provât ancje i miei amîs di Viene, obleâts al “smart-working” e lâts a parâsi in campagne par scjampâ dal virus.
A dispiet de lôr paronance des tecnologjiis digjitâls, il risultât al è stât in cualchi câs dut di ridi. Si sa che i austriacs a lein plui di nô, e cuâl regâl miôr alore pe viele mari, par un Nadâl in sierai, se no un libri? Di là di dut, no son fastidis di misuris e al è l’ideâl di comprâ online: fracant su la vôs “libris”, la prime sielte e je jenfri “gadgets par oms” e “gadgets par feminis”. Si pues pensâ ae conturbie! Alore bisugne stâ atents al titul, se no cuissà ce che i rivarà ae mame! Al è come lâ a cirî un pâr di scarpis, jentrâ intune scarparie e jessî cui crostulins pai gjats.
◆ No cate che i miei amîs a sedin austriacs DOC, a son cetant matarans e a àn cirût cualchi sclariment a dut chest: che e sedi une bale, une fate di “candid camera” digjitâl? O pûr, un tentatîf di savoltâ i valôrs dal consumisim che nus à fats sclâfs? Salacor un mût par fânus capî ce che al varès di jessi il vêr Nadâl, stant che nancje il lunc sierai al è rivât adore a fânusal capî?
◆ I rimarcs a son stâts indreçâts soredut sui timps falâts de iniziative, che e je rivade cun mês di ritart: il sît al è stât presentât ai 30 di Novembar, cuant che i austriacs, par usance, a scomencin bielzà in Otubar a fâ lis compris di Nadâl e ancje il “Vinars neri” (si disial cussì?) al jere aromai passât. Ma la critiche plui a pinel e je che cheste pensade e varès di jessi stade fate intant de prime sierade e chest al varès lassât il timp par sfrancjâle pe miôr, e rivâ cumò cuntun sisteme pardabon eficient e in stât di sodisfâ lis dibisugnis dai utents: sedi i piçui buteghîrs fruçâts inte lôr economie, sedi i clients, scanâts di cheste presonie cence fin.
◆ Al reste dut câs il fat che, di là des pecjis e des lacunis mostradis, la pensade e je propit gjeniâl par lâ incuintri – si ben che cun ducj i limits che o vin vût dit – aes economiis locâls: une idee che ancje nô o podaressin cjapâ tant che esempli, se no a nivel talian, almancul in regjon, stant che sul nestri teritori o vin lis miôr aziendis informatichis par disvilupâ il software.
◆ O pensìn che bisugnarès fâ rivâ une copie di chest numar de “Patrie” ai nestris governants. Cuissà po che no ur vegni chê di copiâ la idee! ❚