ATUALITÂT – La “None” e va indevant

Intai ultins vincj agns i Fogolârs in Argjentine a son stâts testemonis di une tindence di slontanament di dute une gjenerazion che si pues clamâle «intermedie» par fatôrs che a son stâts diviers. Intal stes timp e à proliferât une vore di materiâl di leture e audiovisîf prodot par furlan, che nol è stât viodût sedial parcè che chei che a podevin leilu no jerin plui, o che pe mancjance di spazi nol jere facil di jessi consultât,.
Doi agns indaûr, il nestri cjâr president Emilio Crozzolo al à vût la preocupazion di sistemâ dut chest materiâl par podê mostrâlu intune biblioteche. Par fâ chest, al à rivât a otignî un contribût de Provincie di Udin, midiant dal ent «Friuli nel Mondo». Magari cussì no, par un incident capitât intal mes di Jugn, Emilio nus à lassât, ma il progjet al è lât indevant.
La biblioteche de Famee furlane di Buenos Aires (420 socis) e varà 1200 libris (la plui part par talian), rivistis ma ancje imprescj multimediâi pe comunicazion di vuê (un projetôr HD e un computer, Internet e une videoteche cun diviers DVD): lûc dulà puartâ indevant lis nestris lidrîs cui gnûf imprescj che nus permetin di continuâ a fâ i nestris cors di lenghe furlane e cognossi la nestre storie.

Chê biblioteche che vuê si à bisugne, no je la stesse che e coventave agns indaûr. Parcè che vuê, e scuen jessi cun di plui une nâf che nus puedi puartâ tal Friûl, o miôr, che e puedi puartânus il Friûl dongje, cu la sperance che al servissi a dutis lis gjenerazions par tirâ dongje chei che a son l’avignî e continuâ il percors tacât ai 6 di Novembar di 1927, cuant che la prime comission e meteve adun nons come Baseggio, Rimati, Caligaro, Ventruscolo, Ridolfi, Cattaruzzi, Del Negro, Di Gaspero, Mattiussi e Tinunin. Intes primis riunions che si davuelzevin li de sartorie di Atilio Conte a cirivin di cjatâ une sede proprie, cjatade l’an dopo. E nasseve cussì «La None dai Fogolârs»: il prin Fogolâr fûr di Italie.
(Eduardo Dino Baschera)