ATUALITÂT – La bataie par difindi l’avignî de scuele di Migjee

“PLURICLASSE”_ Salacor il comun di Migjee nol rivarà a tocjâ cuote mil abitants tal censiment de popolazion di chest an, e duncje, stant aes riformis in discussion a Rome, al varès di “metisi adun” cuntune (o plui di une) aministrazion dongje. Dut câs il paîs de Ara Pacis nol vûl pierdi la sô identitât, prin di dut badant al avignî dai siei fruts, scomençant de scuele. Une cuistion peade aes scuelis dal oblic di Migjee e je in pîts zaromai di un pôc, stant che pe anade 2011/12, lant daûr des gnovis disposizions dal ministeri de Istruzion, l’Ufici scolastic regjonâl, traviers une circolâr, nol à permetût al istitût di là dal Judri di vê une prime te scuele di prin grât (lis “vecjis” elementârs): chest par vie che a Rome al è stât decidût che par vê une gnove classe a coventin almancul 15 students, impen che a Migjee i frutins de prime elementâr a saressin stâts 11. La soluzion e je stade chê di fâ une cussì clamade “pluriclasse”, metint adun fruts di prime e di seconde; magari cussì no, il limit par cheste forme slargjade di classe al è di 18 students, si che duncje 7 frutins a àn scugnût lâ tune scuele fûr dal lôr comun.
SINDIC_ «No si pues acetâ une situazion compagne» al proteste il sindic di Migjee, Alberto Bergamin. «O ai fat domande scrite za mês indaûr al Ufici scolastic par vê une rispueste sul parcè che no nus àn permetût di vê une gnove classe su la fonde di ce che e dîs la leç 482/99 a pro de tutele des minorancis linguistichis. Impen,» al zonte il prin citadin, «il Ministeri al à tignût cont che si podin vê des ecezions tal numar di students par classe dome tal câs di paîs di mont, lant cuintri de 482 e dal Dpr 81/2009, che al trate juste des areis li che si fevelin lenghis minoritariis». Secont il sindic, «chest mancjât rispiet al è stât volût di pueste, par no creâ dai precedents in difese des nestris scuelis tai piçui paîs che a son te liste dai comuns de aree furlanofone: par chest, o fasarìn ricors al Tar o al President de Republiche».
PETIZION_ Bergamin al à za tirât sù 1040 firmis, presentadis in Regjon a Triest, li che la Comission Culture e à poiât la sô bataie. «O vin la poie ancje de Provincie di Gurize, dai sindacâts, de Filologjiche, dal Comitât 482. Dut câs,» al marche Bergamin, «i aministradôrs dai comuns dentri te liste pe tutele dal furlan a àn di sveâsi par difindi lis lôr scuelis: lis leçs par no fâlis sierâ a son, cumò e je ore di fâ valê un dirit za previodût».
Alessio Potocco