Anzil e lis dôs provinciis autonomis

Il test di leç pe modifiche dal statût dal Friûl – V.J., che al previôt la costituzion des “areis vastis”, al è pes ultimis tal parlament roman. Dopo fat bon, la bale i passarà al Consei regjonâl di chenti.
◆ E covente une leç de Regjon par definî numar di areis vastis e i lôr teritoris, competencis e sisteme eletorâl. Un pont di discussion interessant tal confront avonde vueit de politiche nostrane. Su chestis tematichis si zuie une partide serie sul teme de autonomie. Fin a ce pont i politics nostrans, Fedriga in primis, àno voie di doprâ lis competencis dal statût speciâl?
◆ In mancjance di ideis, par solit si copie ce che al jere stât. E duncje la vie plui semplice e plui comude e sarès chê di tornâ aes cuatri provinciis di une volte. Nissun al varès nuie in contrari. Ducj contents e une vore di poltronis pes golis dai trombonâts. Ma sono pardabon adatis aes dibisugnis politichis e aministrativis di vuê? Nô o pensìn di no, soredut se a vessin di vê dome lis competencis vecjis: manutenzion des stradis e edilizie scolastiche. Coventaressial un ent eletîf, ven a stâi votât di ducj – come che la maiorance regjonâl e à metût tal so program eletorâl – dome par chês dôs funzions che vuê a vegnin gjestidis dai EDR?
◆ Al sarà interessant ancje viodi il sisteme eletorâl e la forme di governance, soredut se si vûl favorî la partecipazion democratiche intun moment come chel che o vivìn, dulà che e parone la disafezion ae politiche e a son simpri mancul chei che a van a votâ.
◆ Cun di plui, chestis “areis vastis” no laressin pensadis come ents di nature dome aministrative, di fat a cjaparan dentri ancje tematichis identitariis, rapresentant teritoris e comunitâts, intune regjon che presente tantis diversitâts. Par definî confins, duncje, si scugnarà tignî cont di cheste complessitât, prin di dut des dôs realtâts che a componin il F – VJ.: il Friûl e Triest. E se la citât juliane e varès za vuê tal statût la pussibilitât di aministrâsi bessole come citât metropolitane, nuie al definìs invezit il Friûl. E alore, prime di creâ gnovis entitâts, provincie de Montagne, Gurizan e Basse insiemi, Di ca e di là dal Tiliment, Provincie di Pordenon e vie indenant, dividint ancjemò di plui la za dividude “Patrie”, vuê al covente un Ent che al rapresenti in forme istituzionâl lis comunitâts furlanis. Vonde spezzatino. Al è indispensabil un lûc dulà che il Friûl al sedi in stât di cjapâ decisions in maniere unitarie pal so doman.
◆ Su chest, nus plasarès savê ce che al pense il vicegovernadôr Anzil, il plui votât tal so partît, che, cuant che al jere sindic di Rivignan e Teôr, al veve proponût cun fuarce di trasformà il Friûl e Triest in dôs provinciis autonomis sul stamp dal Trentin – Sudtirôl.
◆ Al veve patrocinât une racuelte di firmis – supuartât ancje di une schirie di personaçs impuartants de intellighenzia nostrane, lassant fûr di pueste i partîts. “Meglio non coinvolgerli – al diseve intune interviste in chê volte – hanno sempre meno presa sulla società. Non potrebbero sostenere un’opzione del genere perché dovrebbero spiegare, se è cosa buona, come mai non l’hanno ancora realizzata…” (Il Friuli n. 19-15 maggio 2015 p.9).
◆ Isal ancjemò di chê idee l’avocat di Rivignan o scherçavial? No lu vin plui sintût sul argoment. A son passâts dîs agns ma la cuistion e je ancjemò cjalde, al è ancjemò in timp, e cumò al à ancje il rûl pesant jenfri chei che a decidin. Se no si puedin fâ dôs provinciis autonomis, fasìn almancul dôs “areis vastis”. No varessin voie che ancje lui, come i partîts, pûr jessint une robe buine, nol olsàs puartâle indenant… ❚