“Ai preât la biele stele che il Signôr fermi la vuere”

Il vanzeli di cheste ultime domenie di Avrîl nus presente Jesù resurît dai muarts e i siei amîs in gjonde tal cjatâlu, fale Tomâs che i coventarà une prove personâl par rindisi cont di ce che al stave sucedint (Zuan 20, 19-31).
◆ Lis primis peraulis di chest vanzeli a son: “Pâs a voaltris!” e di gnûf ancjemò: “Pâs a voaltris!”.
Fin chê altre dì chestis peraulis a jerin bielis ma no tocjavin il cûr convints che la Union Europeane e ves pardabon metude la fonde de pâs. Chest nol esist plui; lis dodis stelis no dan plui garanzie.
Ce che o calcolavin sigûr si presente vuê balarin; te memorie mi tornin la seconde vuere mondiâl che o ai vivude di frut, cjants e vilotis che soresere si ju sintive tes cjasis, borgadis e paîs.
◆ “O cjampanis de sabide sere / che pe fieste sunais di ligrie, / tignît cont de plui biele armonie / par sunâle a la fin da la vuere! ” E ancje, ricuardant il 27 di Otubar dal 1917: “Fortunâts i muarts sot tiere / che àn finît la lôr stagjon, / che àn sierât i voi adore / e no san cheste passion!”. O ancjemò: “Ai preât la biele stele, / ducj i sants dal paradîs, / che il Signôr fermi la vuere / e il gno ben torni in paîs!”
◆ Scoltant chês melodiis incoradis dentri di me, mi viôt ancjemò frut sot i matucei che a businavin come ucielats, bombis di muart che a colavin dal cîl e il paîs ridusût a culinis di maseriis.
Intant vuê lis vueris a tetin, a saltin fûr come foncs velenôs tes boscaiis velenadis dal mont.
◆ I sfuarçs pe pâs che cumò a stan fasint in Ucraine, Mieze Lune e gjeopolitiche mondiâl a saran necessaris come mâl minôr ma no puartaran a une pâs che e dure. I armaments a cressin, la lote e je satelitâr, prepotencis e bausiis a son pan di ogni dì e la Italie e je la seste tal mont pal cumierç di armis. Il mahatma Gandhi ancjemò tai agns ‘20 si domandave: “Vino di copiâ lis nazions dal Ocident e passâ tal mieç di chês agoniis, par fâ une politiche di veretât e di no violence, di zentilece e di rispiet de justizie e cussì meti jù lis fondis de pâs?”.
Un secul di maçalizis furiôs e di milions di muarts si è ridusût tai fats a retoriche vueide.
◆ E reste la domande eterne: di dulà rivie te persone umane la violence e di consecuence la vuere? Il maçalizi di Caìn su Abêl isal inlidrisât tal DNA dentri di nô?
Al veve reson C. G. Jung, cuant che al scriveve: “Il viaç plui lunc de persone umane nol è chel viers la lune ma chel par jentrâ tal nestri cûr”. I da conferme A. Manzoni in chês peraulis: “Così fatto è questo guazzabuglio del cuore umano”. Al è li che a son insedadis vuere e pâs.
◆ Fra i tancj contribûts di ogni sorte sul argoment, al è di tignî in considerazion ancje che: noaltris ocidentâi di cualchi secul incà o vin fat il disastri di ridusi la veretât a resonaments e ideologjiis.
I studis di neurologjie a pandin invezit che tai mecanisims infinitesimâi dal cerviel, fonde di dut a son i neurons de tenarece, maternitât, amôr. La reson e ven dopo; e à sens dome se insedade in lôr.
Se al è vêr, la nestre culture ocidentâl rimpinade dome te sience e te reson e scuen cambiâ rote.
◆ Di chest o vin une prove a puartade di man. Ducj si comovìn tal scoltâ “Quando sarai piccola” di Simone Cristicchi presentade a San Remo chest an: “Tu mi darai la tua mano, io un bacio sulla fronte / adesso è tardi / … ” Tune interviste, Simone al spieghe che la peraule “amore” e vûl dî: “Voglio che tu non muoia mai. Infatti non riusciamo ad accettare questa legge naturale della morte dentro la nostra vita”. La umanitât e l’afiet a domandin la eternitât.
◆ Al à reson sant Pauli cuant che al scrîf che “ancje la sience si sfantarà, ma l’amôr nol varà mai fin” (cfr. 1 Cor 13, 8).
In chescj discors che o stin fasint, mi reste ancjemò misteriose une peraule di Crist: “Us lassi la pâs, us doi la mê pâs. No us e doi come che le da il mont” (Zn 14, 27). Ce aial di volê dî?
◆ O leievi tun articul che il desideri de persone al è cence fin sedi tal spazi che tal timp. Chest, simpri stant ai studis sui neurons dal cerviel uman. Nissune realtât nus sodisfe, parcè che ogni robe e je limitade par vie che la muart e çoncarà dut. Forsit un alc di là di chest mont al podarès savê di infinît ?
◆ E je la intuizion di sant Ustin di Ipone che ducj o cognossìn: “l’eterni e l’infinît al è Diu, dome tu Signôr tu puedis dâmi la pâs e il gno cûr nol cjate pâs fin che nol polse in te” (Confessions, Libri X, n. 27).
◆ Il Codiç 102 de Biblioteche civiche di Cividât nus tramande un rît aquileiês antîc li che te celebrazion de Pasche un frut al jes dal sepulcri da pît de basiliche, e al nunzie: “Il Signôr al è resurît” e al da la pâs a ducj. Al veve di sedi comovent: te basiliche colme di int, la vôs di un frut tal cidin religjôs de grande messe al donave al popul la pâs! Vuê a son milions i fruts che a nadin tal pantan de miserie e de barbarie de vuere. Dome cuant che, cambiâts cûr e politiche, ur darìn rispiet, pan e culture, i fruts nus disaran “Pâs a ti, pâs a voaltris”. In chei timps e rivarà la vere pâs. ❚