AI 32 DI MAI. Cuant che un furlan al va in citât

Al sucêt avonde dispès che un furlan al vedi di lassâ la sô Patrie e che al ledi a vivi in citât. Al pues jessi par lavorâ, par studiâ, par lavorâ, par amôr, par lavorâ, par plasê o par lavorâ. In cualchi câs, ancje par fâ politiche, che ae fin des fins al è simpri un mût di lavorâ.
No è une robe facil, par un furlan, lâ a vivi in citât: lu podês imagjinâ ducj. Par vie dal trafic? No. Par vie dal incuinament? No. Dai apartaments plui piçui? Dai afits masse alts? No. Chei li a son ostacui che un furlan al salte cui voi sierâts. Il prin probleme, par un furlan che al va in citât, al è propit cu la definizion di citât.
Pal furlan, la citât e je Udin. Anzit, a cjalâ ben, Udin e je bielzà un tic masse grande, che se tu disis a un to amì «si viodin in place», tu as ancje di sielzi di ce place che tu stâs fevelant (il plui des voltis, si finìs par sielzi place Sant Jacum, cussì cui bars e cul marcjât tu cjatis simpri alc ce mangjâ e ce bevi). Cuant che al rive intune citât che se e va ben e je grande il dopli di Udin e e à cuatri voltis i siei abitants,
al furlan i zire il cjâf.
Al è cussì che tal imagjinari dal furlan a jentrin entitâts mai viodudis. Prime di dut, il furlan al  scuvierç la code, o ben: al scuvierç che la code no je simpri fate di todescs e si le cjate ancje fûr dal stradon di Lignan. Po, al scuvierç un grum di lavôrs che prime nol cognosseve, come il parcadôr di machinis, che ti domande i bêçs par vêti mostrât cul dêt un puest che tu vevis bielzà cjatât di bessôl, e il benzinâr di gnot, che al fâs il service cuant che e je ore di self service.
E cambie ancje la television, cuant che il furlan al va in citât: no parcè che si cjapin altris canâi, ma parcé che finalmentri i telegjornâi a fevelin di alc che al sucêt pardabon li ator, come i siopars, lis mostris, lis manifestazions. Une robe che a un furlan no i jere mai sucedude, stant che i gjornaliscj dispès no san nancje dulà che al va l’acent te peraule «Friuli».
Par un pôc, il furlan si lasse ancje esaltâ di dutis chestis novitâts, e al scomence a fâ robis stranis, come clamâ un amì di chê altre bande de citât par domandâ ce timp che al è là, e discuvierzi che al è diferent. O ben, come tal gno câs, al discuvierç la cusine locâl e ducj i ristorants che a son di sielzi, e al pare sù cinc chilos intun an. Par fortune che il furlan nol va mai dal dut fûr dai semenâts e nol dismentee mai lis sôs lidrîs: ae fin, il cûr al bat simpri de bande dal frico.
BETE DI SPERE