AI 32 DI MAI. Cemût si sunial par furlan?

Non son plui in tancj, in dì di vuê, chei che a scoltin la musiche classiche. Nissun al è plui usât a chel gjenar di melodie, scuasit nissun al impare a sunâle e a son simpri di mancul chei che a son bogns di lei une partidure. Forsit, alore, si podarès fâ alc par tirâ dongje la int al lengaç musicâl.
Lis indicazions di intensitât, chês che si lein dongje dai pentagrams, par esempli, no son fatis par un furlan. Fortissimo, forte, piano, pianissimo no rindin ben il sens. Trop »fuart» si intindial? Al è masse indefinît. Bisugne savê fevelâ clâr. Par domandâ a un musicist furlan di sunâ plui fuart che al pues, alore, miôr scrivi berlee fûr di misure. Se invezit tu vuelis fâlu sunâ avonde fuart, ma un pôc mancul di prin, berghele al è la soluzion plui juste. E no saressial miôr, invezit di piano o pianissimo, viodi suntune partidure indicazions come sta cidin e tâs? Sigûr si capissin miôr, ancje cence vê studiât musiche.
Ma nol è ancjemò avonde: no esistin dome lis intensitâts, ta lis partiduris, ma ancje i timps: vivace, allegro, andante, adagio, lento. Si viôt subit che a son peraulis masse sofisticadis: il furlan no fevele mai par impressionâ chei altris, ma al dîs pan al pan. Se tu âs voie che un furlan al suni svelt, scrîf spesseiti: al è plui usât a sintîssal a dî (e soredut a dîlu a chei altris, parcè che un furlan al spessee simpri, cence bisugne di cualchidun che jal disi). Spesseâsi no isal avonde? Ancjemò plui svelt? Scrîf Cul morbin. E par fâlu ralentâ, si podarès doprâ comut, a planc a planc o miôr di dut cu la sflacje. Nol è sigûr che il furlan al ubidîsi a un ordin dal gjenar, dal moment che lui e la sflacje no si intindin masse, ma almancul cussì si capìs il sens.
Se lis partiduris a fossin stadis cussì fin dal principi, forsit vuê i furlans a saressin une vore plui famôs tor pal mont par la musiche classiche. Forsit tai teatris no si balarès plui il lago dei cigni, ma il lât dai masurins, e al puest da Lo schiaccianoci, Il gjavestropui. E magari, cuissà,l’imni di Europe nol sarès plui l’Inno alla gioia, ma La ligrie e ven dai zovins.
BETE DI SPERE