DI BESSÔI – ENTS LOCÂI. Autoguvier cuntune Regjon lizere

Al è stât chel che al à scrit di so man (“in cinc minûts”, al sigure) la Leç Costituzionâl numar 2 dal 1993 che e assegne al Friûl-VJ la competence primarie in materie di autonomiis locâls. Ma propit par chest Danilo Bertoli si vise une vore ben che cheste prerogative no nasseve di une rivendicazion de nestre Regjon. “O jeri rivât chel martars a buinore in Comission pai Afârs Costituzionâi de Cjamare dai deputâts, li che o jeri component, cence lei l’ordin dal dì. Al jere, jenfri di ches altris robis, ancje il parê su di une propueste di leç par dâ a Val di Aoste e Sardegne la competence primarie sui ents locâi, che za a vevin Trentin-Sudtirôl e Sicilie”.
Il Guvier, presint cun Francesco D’Onofrio, nol veve pensât al Friûl.
“Letis lis cjartis, i ai fat presint che la uniche Regjon a Statut speciâl cence cheste autonomie e sarès stade il Friûl che al jere innomenât par vê doprât ben i podês che al veve vût in deleghe al timp dal taramot. Lui mi à dit che o vevi reson” ma al coventave scrivi di corse l’emendament. “Nancje dite, e lu vevi za scrit: pecjât – al dîs – che in vincj agns cheste competence no je stade a dimplen esercitade e la nestre Regjon e à fat sul teme dome une piçule leç cuadri, che no à vût efiets concrets, se no a bocons cun di plui contraditoris”.
Ma ce covential par une riforme “furlaniste”?
“Bisugne vê une vision globâl sul asset che si vûl dâ ae nestre Regjon. La riforme e varès di cjapâ dentri la dimension de eficienze e ancje la vieste istituzionâl plui juste pe nestre comunitât. E chi si è simpri arenât ogni propuesit di riforme, sot i colps di chei che a crodin che il mont al è cambiât rispiet ae ete cuant che la nestre specialitât e je nassude e vuê a àn pore che a domandâ masse si cori il pericul di pierdi chel pôc che si à”.
La propueste plui inovative su chest teme e je stade che dal Forum di Aquilee. Ce restial di chê idee e di chê stagjon?
“Nô o jerin partîts di un pont fìs, che la Regjon e à di jessi un ent politic, lizêr e snel, cun competencis di legjisazion, programazion e control. Invezit in Italie il Stât al ten plui nivei decisionâi par ogni competence e lis Regjons a son dome un nivel burocratic e un cost in plui, dispès svuedât di reâl podê”. Tal câs de nestre Regjon, “il Forum al pensave che legjislazion, programazion e control a vevin di indreçâsi ae politiche internazionâl e europeane, al control dai ents locâi, ai grancj progjets di infrastruturazion e di logjistiche, ae organizazion dal “welfare” e de sanitât, ae conservazion e valorizazion dal patrimoni storic, archelogjic, artistic ancje in funzion economiche, ae tutele des lenghis. Ma un cont al è se la autonomie e ven calade dal alt, un altri se e ven de iniziative di un popul che al sburte e al à une cussience che dome cul autoguvier si pues lâ indevant. Cumò la specialitât nus permet di resisti a ogni tentatîf dal Stât talian di ridusi lis nestris competencis.
I resonaments che o fasevin tal Forum di Aquilee a partivin de considerazion che la Republiche Taliane e varès vût di deventâ federâl, cu la seconde Cjamare destinade aes Regjons: e o volevin sigurâ la nestre autonomie cuntune sorte di Assemblee costituente regjonâl che e partìs de rivisitazion dal dissen de nestre Regjon”. Dal 1989 incà “al è vignût il timp di cjatâ une gnove sintesi daûr di ce che al diseve Tiziano Tessitori che al voleve Udin capitâl e une autonomie specialissime par Triest. In chest moment di crisi scomponi la Regjon forsit nol è pussibil ma la aree metropolitane di Triest (che si sarès podude creâ fin de leç statâl 142 dal 1990) si scuen fâ, pontant su lis competencis di portualitât e logjistiche. Il rest dal Friûl al va organizât cun struturis provinciâls governadis di Assembleis di Sindics e zontis snelis. In chest contest si pues pensâ a articolazions provinciâls difarentis di chês di cumò dant la possibilitât al Mandament di Puart di vê un model di autonomie par tornâ te Patrie dal Friûl. Il pont di fuarce di cheste gnove struture dal Stât regjonâl furlan al sarès il slizeriment de burocrazie che e varès di jessi pocje e cualificade, par mostrâ cemût che cun pôcs bêçs publics si pues mandâ indevant une organizazion puntuâl e pronte a dâ rispuestis ai citadins”. ■
Walter Tomada