SLOVENIE. Maribor Capitâl europeane de Culture pal 2012

PRIME_ Pe prime volte une citât slovene e à l’onôr di jessi stade sielzude tant che Capitâl europeane de Culture. No si trate dut câs de Capitâl dal Stât nestri vicin, Lubiane, ma ben di Maribor, la seconde citât par impuartance de Slovenie. La sielte e je stade fate di une jurie di pueste li che a jerin rapresentants dai Paîs membris dal Consei che a àn citâts candidadis e di funzionaris des istituzions comunitariis. Come tradizion di cualchi an in ca, a son dôs lis localitâts che a varan chest titul par un an intîr: adun cul cjâflûc de Basse Stirie e je ancje Guimarães, in Portugal.
CAPITÂL_ Nassude cun chê di promovi la culture dal Continent Vieri tacant dai siei stes citadins, la idee di sielzi an par an une o plui citâts tant che centris di manifestazions e apontaments di alt nivel par dute la Europe e je stade cjapade tal Jugn dal 1985 dal Consei dai ministris de Comunitât europeane cu la decision di fâ nassi chest gnûf progjet. Fin al 1999 la definizion e jere chê di “Citât europeane de Culture”: la prime e je stade Atene, po Florence, Amsterdam, Berlin, Parîs e vie indevant. Tal 2000 il non uficiâl al è deventât “Capitâl de Culture”: l’an passât a son stadis Turku (Finlandie) e Talllinn (Estonie), tal 2013 a saran invezit Marsilie e Košice, in Slovachie. Ognidun dai 27 Paîs de Ue al à di fat dirit di vê a turni une sô citât che e pues vê chest titul par un an.
TÜRK_ «La culture nus darà des rispuestis su diviersis dificilis cuistions dal nestri timp»: a son peraulis dal President de Republiche Danilo Türk, nassût propri a Maribor 60 agns indaûr, ai 14 di Zenâr stâts, zornade che e à inviât lis manifestazions di Maribor tant che Capitâl europeane de Culture (Evropska prestolnica Kulture) par chest an. A marcâ la impuartance di chest event pe Slovenie dute, Türk al à volût ricuardâ un scritôr sloven, Alojz Adamič, muart tai Stâts Unîts tal 1951, che al à vût dit che la culture e je “la plui fuarte industrie slovene”. Pal President chest «al è stât vêr, al è vêr e al sarà vêr pal avignî, par vie che il nestri disvilup nol dipent dome de cressite materiâl ma ancje dal disvilup de nestre culture». In plui, Türk, adun cul sindic de citât Franc Kangler, al à invidât ducj i slovens a identificâsi cun Maribor, “capitâl de culture sei europeane sei dal nestri paîs”.
PROGRAM_ In dut i progjets di ca ae fin dal an a saran 412 dividûts in siet diviersis tematichis, cjapant dentri dute la citât par rimirâ mostris di art e di fotografiis, concierts di ogni sorte di musiche, spetacui di teatri, esposizions di architeture; cun di plui, si pues assisti a cines e a incuintris cun scritôrs, artiscj e inteletuâi di dut il Continent.
SCUADRE_ Maribor no je di bessole in chest grant apontament dal 2012. Za par timp, i organizadôrs a àn volût cjapâ dentri ancje cinc altris localitâts de part orientâl de Slovenie: si trate di Ptuj (lontane 30 km di Maribor), Murska Sobota (55 km), Slovenj Gradec (70 km), Velenje (74 km) e Novo mesto (130 km).
Par vê plui informazions lait su www.maribor2012.eu (sît par sloven e par inglês). ■
ALESSIO POTOCCO