No plui ‘vinjeta’ te Istrie slovene

Dome une decision eletorâl in spiete des votazions parlamentârs in calendari te Vierte dal 2026 o ben la volontât di dâ sodisfazion ai passe 8 mil di lôr che a àn metût la lôr firme te petizion di pueste tacade cualchi mês indaûr? Salacor a son dutis dôs chestis motivazions adun. In ogni câs, la gnove tant spietade de int che e vîf tai cuatri comuns de cueste slovene (Ancaran, Cjaudistrie, Isule e Piran) e je rivade par man dal guvier di Robert Golob ai 15 di Otubar stâts. Dal prossim an, vâl a dî di joibe il prin di Zenâr dal 2026, nol coventarà plui comprâ (li dal tabachin, dal benzinâr o vie Internet) il bolin o, par sloven, la ‘vinjeta’ par podê cori cul propri veicul (motociclete, machine, furgon, camper e vie indevant, cun bolins di presits diviers) su lis autostradis di dut il Paîs. Chest sisteme par paiâ il transit dilunc une ‘avtocesta’ (autostrade) o une ‘hitra cesta’ (superstrade) al è tacât in Slovenie il prin di Lui dal 2008, cjapant dentri ancje chel toc che al va dal confin cu la Italie a chel cu la Cravuazie. Si trate di doi tocs di superstrade clamâts H5 (di Škofije a Cjaudistrie) e H6 (di Cjaudistrie a Lucija/Santa Lucia dongje Portorose): in dut a son uns 21 chilometris. La domande di bande de int dal puest par meti chestis superstradis a gratis e jere za tacade almancul dal 2008, cemût che al à ricuardât Felice Ziza, deputât de Cjamare di Stât a Lubiane tal seç di pueste pe minorance taliane. Ziza al à vinçût cheste bataie ancje metint tal mieç il Tratât di Osimo tra Italie e Jugoslavie dal 1975, che al à fat deventâ sore nuie il toc di autostrade in provincie di Triest. A cheste cuistion storiche e internazionâl, si zonte il fat dal trafic di ogni dì dai pendolârs che si movin di un Paîs a di chel altri par lavôr, par studi o par lâ a cjatâ la parintât o a fâ compris. Nol è avonde, parcè che il trafic al devente plui penç vie pal Istât par vie dai turiscj che une vore numerôs a rivin in Istrie di dute la Europe, fermantsi pes feriis te part slovene o lant jù te part cravuate fin in Dalmazie. I doi tocs di strade a deventaran alore ‘strade principâl’, duncje a gratis: l’oblic di cuistâ la ‘vinjeta’ al restarà in pîts dome pai veicui pesants plui di 3,5 toneladis.❚