Interviste cun Roberto Meroi, gjornalist e scritôr
che al à “metût la çate” in tantis esperiencis impuartantis
pal Friûl dai ultins agns
Roberto Meroi, udinês, classe 1949, gjornalist, scritôr, storic e fotograf, al è un personaç che vie pai agns al à “metût la çate” in scuasit dutis lis esperiencis impuartantis te storie politiche e mediatiche dal Friûl. Cui gjornâi, cui libris, cul Moviment Friûl. Al è stât fra i fondadôrs di Radio Onde Furlane, al à partecipât aes lotis pe Universitât e al è stât e al è presint in tantis associazions che si ocupin di lenghe e de storie furlane.
_
Roberto, dulà sêstu nassût a Udin e ce ambient jerial in cont di lenghe e furlanetât?
O soi nassût in borc di Sante Luzie, cumò vie Mazzini e, jessint in citât, si fevelave il dialet venit udinês. Però si fevelave tant ancje par furlan, par vie che in chei timps Udin e deventave grande cun tante int che e vignive a stâ di dut il Friûl. La mê famee e jere furlanofone: o soi vignût sù fevelant furlan, di zovenut o vevi tacât a talianotâ, par vie di chê solite ande che e diseve che cul furlan no si va di nissune bande, e po dopo lu ai tornât a cjapâ.
_
E cuant ti ise vignude cheste cussience che ti à fat “tornâ ad oremus”?
Cuant che une persone e veve dât a mê sûr cualchi sfuei, un al jere «Int Furlane» di Etelredo Pascolo e chel altri «Friuli d’Oggi», che al jere il periodic dal Moviment Friûl. E cussì o ai tacât a colaborâ cun chei gjornâi, prime scrivint par talian e dopo par furlan. Vie pai agns, o soi stât il prin a scrivi par furlan su tantis altris testadis.
_ E te scriture âstu vût cualchi mestri che tu ti sês ispirât? No, nissun in particolâr, ma o vevi simpri il vocabolari di Gianni Nazzi di riferiment.
_
Cuâi sono par te autôrs impuartants tal cjamp de leterature?
Une leture che mi è plasude tant e je stade il romanç «L’aghe dapît la cleve» di Dino Virgili. E ancje lis poesiis di Novella Cantarutti, Domenico Zannier, Leonardo Zanier.
_ Ce figuris sono stadis impuartantis par te a nivel ideologjic? Etelredo Pascolo che o ai bielzà nomenât il so gjornâl, e Marchetti, pre Josef Marchet, che magari cussì no, no lu ai mai cognossût. Ma lu ai let propit su lis pagjinis de «Patrie dal Friûl». E daspò pre Checo Placerean, par fuarce! Fausto Schiavi, Tiziano Tessitori, Tarcisio Petracco. _
E a nivel politic cui ti aial ispirât?
Fausto Schiavi, segretari dal Moviment Friûl: un om concret e di caratar, che nus à lassâts masse adore. Se lu vessin vût di plui, la storie dal Friûl e sarès cambiade. Po dopo Tiziano Tessitori e Tarcisio Petracco. Tarcisio Tessitori, il pari de Regjon, ancje se no je vignude fûr come che al voleve lui, cul Friûl e vonde. Une figure che le ai studiade tant: o ai let in pratiche dut ce che al à scrit. E cussì mi soi permetût di fâ un libri li che i fâs une interviste imagjinarie. Tarcisio Petracco, il pari vêr de Universitât dal Friûl, nol è une figure politiche a strent, ma chel che al à fat e chel che al à metût dongje al à a ce fâ cu la buine politiche.
_
A proposit di ideologjiis, tu ce ti sintistu? Furlanist, nazionalist, autonomist…
“Furlanist” e je une peraule che no mi plâs, nassude cualchi an indaûr e no sai cui che le à tirade fûr. O vevi let «Le Nazioni proibite» di Sergio Salvi, li che o ai cjatât tancj concets valits. Jo mi sint “furlan”! Un furlan doc che si bat pe sô lenghe e pal so popul e autonomist. Autonomist furlan, no “regjonâl”. O pensi che il nestri grant probleme al sedi chel di condividi cheste Regjon cun Triest. Mi soi simpri batût par che Udin e deventàs a pâr cun Triest tant che citât, metint adun i comuns dongje, par esempli.
_
Stant che tu sês gjornalist, ti domandi di dîmi cualchi non in chel cjamp.
O fâs il non di Mauro Tosoni e il so gjornâl «In Uaite» che al è stât tant impuartant daspò dal taramot e che o ai vût colaborât par tant timp. E ancje Mauro Missana, che a son agns che lu scoltìn ai microfons di Onde Furlane.
__
Ultime domande, un personaç o opare che par te al varès di jessi valutât di plui.
Lucio Peressi, il mestri Luzi di Cjandit, ferbint difensôr de lenghe e de culture furlane: par agns si è batût pal furlan intes scuelis, pai museus etnografics e pe Universitât dal Friûl. Al à regalât ae Filologjiche la sô documentazion su la storie de scuele furlane, 3.000 fotografiis ai museus di Udin e ae Biblioteche de Universitât di Udin passe 600 articui su lis lotis pe Universitât furlane. ❚
………………………………………………..
FOCUS. Il gjornâl
“Int Furlane” al è stât un mensîl scrit fûr par fûr par furlan. Simpri atent ai “interès dal Friûl”, che no son stâts dome chei leâts a strent al regjonalisim, ma ancje ae storie, aes tradizions popolârs, ae leterature, ae ecologjie, ae tutele dal paisaç, al studi dai archivis, ae tutele des minorancis (in Europe, no dome in Italie) e clâr ancje ae lenghe dal Friûl. Al à augurât e al à ilustrât la Alpe Adria intal 1969, prime che e deventàs realtât ai 20 di Novembar dal 1978. La testade e je stade regjistrade dal Tribunâl di Udin cul numar 163 ai 28 di Dicembar dal 1962 e e je stade stampade dal Zenâr dal 1963 al Dicembar dal 1987. Dute la racuelte si pues consultâ inte Biblioteche Comunâl di Udin, Sezion Friûl. ❚
………………………………………………..
FOCUS. Il personaç
Etelredo Pascolo (Basilian 1898 – Udin 1991).
Al è stât politic, gjornalist e protagonist dal autonomisim furlan. Fi unic di une famee di divignince umile, si à diplomât in resonarie intal 1917 e al à scombatût su la Plâf inte Prime vuere mondiâl, otignint medaie di bronç e crôs di vuere. Intal 1920 al devente sindic indipendent di Basilian, ma intal 1923 i fassiscj lu oblein a dimetisi. Arestât intal 1941, al passe cinc mês in preson e dopo al ven confinât in Abruç fin al 1943. Dopo l’armistizi al ripare in Pulie e al partecipe al Congrès di Bari dal 1944, po dopo si trasferìs a Rome dulà che al ven in contat cui politics e inteletuâi plui impuartants de epoche. Tornât a Udin, al puarte indevant la cariere di comercialist, deventant president dal Ordin dai Resonîrs e membri dal consei nazionâl (1956-1974). Intal 1947 al è tra i promotôrs dal Moviment popolâr furlan pe autonomie regjonâl, insiemi a Tessitori, Pasolini, Ermacora e altris. Intal 1963 al fonde il mensîl in lenghe furlane Int Furlane, atîf fin al 1987. Intal 1966 al à partecipât ae fondazion dal Moviment Friûl. Dai agns Otante al à fat part de Union scritôrs furlans. Intal 1984 al intervignì al Consei di Europe a Strasburc a poie de Cjarte des lenghis minoritariis. L’an seguitîf al è inte comission pe codificazion de grafie furlane, che di chê e nassè la “Grafie furlane normalizade” (1986). Al mûr intal 1991, simbul de coerence e dal impegn pe identitât furlane. ❚
