I Savôrs di Malghe de famee Petris, presidi Slow Food

“La nestre e je une famee grande.” – al conte Luca Petris – “O sin in 2 fradis e 4 sûrs. Gno fradi Giovanni al è il titulâr da aziende, dopo o soi jo e une mê sûr che nus jude in malghe e ancje un nestri nevôt che al lavore cun nô. Chês altris sûrs, cuant che a puedin, nus dan une man. La aziende e je ce che o vin ereditât di nestri pari. Cirche vincj agns fa jo e gno fradi o vin tacât insiemi la gnove aventure; o vin cjolt Malghe Lose indulà che ancjemò vuê o lin sù cu lis vacjis de metât di Jugn fint ae fin di Setembar. O savevin fâ dut ma no vevin fat mai di bessôi; di Invier o jerin socis de Cooperative di Denemonç e o vendevin il lat. Tai agns o vin decidût di fâ une piçule latarie in cjase a Dimpeç, prin intun stanzin e dopo si sin slargjâts. Dal an passât o vin fate la latarie gnove e l’agriturisim a Dimpeç. Duncje o vin tacât a produsi lat dut l’an e a trasformâlu; o vin fat un biel progrès.
◆ O vin cirche 40 vacjis e o cirìn di jessi autosuficients e di vê mangjative par chescj numars achì. Di Istât, in mont, o tignìn ancje lis cjavris di altris proprietaris e o rivìn a fâ ancje cualchi prodot cun chest lat. La nestre produzion e ven vendude dute: o vin un piçul spaç tal agriturisim e dopo o lin ancje ator pai marcjâts.
◆ O cirìn ancje di spedî il prodot tes cjasis, ma tai ultins timps al è simpri plui dificil contentâ la int e cussì il servizi lu stin un pôc trascurant… la int e crôt che, ordenant vuê, doman al rivi dut cjase (come chei marcjâts su internet), no calcolant che magari achì al è un metri di nêf e il corîr nol à podût vignî a cjoli il pac. Nus capite di mandâ cualchi prodot ai emigrants che vie pal Istât a son stâts a cerçâ i nestri prodots e che a varessin gust di vêju ancje li di lôr, magari par Nadâl… ma tu âs di pensâ che il formadi che al è stât fat a 2000 metris al à un savôr e metilu intun carton e spedîlu pal mont al piert un pôc la cualitât. I prodots a son di gustâ sul puest, par gno cont. Disìn che o spedìn indulà che o cognossìn il destinatari e a chei che o vin un ciert rapuart.”
◆ Par fâsi une idee dai prodots che a vegnin fats, si pues lâ a dâ un voli sul sît www.famigliapetris.com.
◆ E je interessante ancje la iniziative “adote une vacje”: une buine idee regâl soredut pai fruts che a àn passion di chescj animâi. E je une ocasion par lâ inte stale a cognossiju e a sielzi cuâl adotâ, al ven dât il certificât di adozion e un pôcs di prodots de aziende.
◆ “O fasin dibot dut a man, o vin une stale a la vecje. No doprìn mangjinis di sorte par vê un prodot san e gjenuin. Sul Pure al è il centri di botaniche di Triest e tancj sienziâts a vegnin a studiâ lis plantis; tai agns si è capît che la Cjargne e à une biodiversitât di plantis che di altris bandis si insumiin. Il passon, che e sedi jerbe frescje o secje, al fâs la diference pe bontât dal prodot; no par nuie dal 2017 incà o sin il presidi Slow Food pal çuç di mont.”
◆ Cuant che i domandi a Luca se a son dificoltâts tal so lavôr, mi dîs: “Il timp! Tai ultins timps lis stagjons a son simpri plui sbaladis e nus tocje fâ i conts ancje cui mateçs dal cîl.”
◆ La famee Petris e je organizade ancje tal lavôr che nol à ni fiestis ni dîs di vore: “Di bon che o sin in 3-4 e che o rivìn a organizâsi in maniere che se une sere un di nô al à un impegn, un altri al cjape il so puest e si rive cussì ancje a taiâsi fûr un pôc di timp libar.”
Par cualsisedi altre curiositât, visitâ lis pagjinis Facebook e Instagram. ❚