Il belanç dal turisim tal Istât dal 2024

Tignint cont dal timp atmosferic no simpri biel (ancje cun burlaçs e aiar fuart) e de cressite dai presits (soredut in Cravuazie), il belanç dal turisim vie pal Istât 2024 intai doi Paîs nestris vicins al è lât in maniere diferente: un câl lizêr di turiscj in Slovenie, une cressite fuarte invezit in Cravuazie.
◆ A dispiet de diminuzion dal numar dai turiscj, cemût che al ven ripuartât in timp cuasi reâl dal sisteme informatic dal Istitût nazionâl di statistiche (https://www.stat.si/statweb/Tourism/TourismDaily), li che si palese che l’80% dai turiscj a son stâts locâi e un su cinc al è stât forest (massime todescs, talians e austriacs), un event al à tirât dongje l’interès de Slovenie interie. Ai 8 di Setembar, li dal puart di Cjaudistrie, e à bordât la nâf di crosere numar mil. La rivade di chestis nâfs, ognidune cun miârs di ospits, e je stade inmaneade tal 2005, e juste l’an passât al jere dismontât su la tiere istriane il milionesim passizîr, une statunitense di Houston.
◆ Cheste sorte di turisim e je zaromai ben inviade tal Stât nestri vicin (che al à une cueste tra lis plui piçulis dal mont, cun a pene 46,6 km di lungjece). Tal 2014 a rivarin trê nâfs tal stes timp, biel che l’an passât e bordâ la nâf plui grande mai rivade, cun 4.150 passizîrs. Di no pierdi la mostre fotografiche screade di pueste in citât, che e à par titul “Mil paisaçs marins. Mil nâfs passizîrs e plui di un milion di salûts dal mâr”, tant par dî che Cjaudistrie e la Slovenie (no dome boscs e monts) a son ad implen tra lis tapis plui batudis dal turisim des croseris tal Mâr Mediterani.
◆ E je ben traficade za di agnorums la cueste de Cravuazie, che e pues svantâ di vê une lungjece di 5.835 chilometris (1.777 km de tiereferme e adiriture 4.058 km in graciis des 1.185 isulis). Plui di cualchi turist si è lamentât par vie de cressite dai presits, massime dal mangjâ, però il numar dai ospits al è cressût dal 4% a pet dal an passât, fin a dut Avost a son stâts 16,8 milions. Stant a une proiezion dal Guvier, par chest an lis jentradis dal turisim a varessin di jessi 15,2 miliarts, il 4% in plui a pet dal 2023. Par cont de divignince, prins i todescs, po i locâi, i slovens, i austriacs e i polacs. Dome al sest puest i talians: mancul 5% dal an passât, mancul 23% a pet dal 2019. ❚